3 यूहन्ना 1 - Halbi

शुभकामनामन

¹ मय सियान चो बाटले लाड़रा गयुस चो नाव, जेचो ले मय सते मया संगाऊ आंय।

² हे लाड़रा मोचो ऐ पारथना आय कि जसन तुय आत्मिक उन्नती करे सीस, असने ची तुय सपाय गोठमन ने उन्नती कर आउर भला चेंगा रा।

³ कसनबल्लोने जिदलदाय भाईमन ऐऊन भाती तुचो हुन सत चो गोहई दिला, जोन थाने तुय सत-सत चलु आस, तेबे मय खुबे ची हरिक होले।

⁴ मोके ऐचो ले बडुन भाती आउर कोनी हरिक निआय कि मय सुनें दें, कि मोचो पिलामन सत थाने चले सोत।

दया काजे सहरातोर

⁵ हे लाड़रा, जोन काई बले तुय हुन भाईमन चो संगे करू आस, जोन परदेशीया आत, हुनके बिश्वासी चो रूप ने करू आस।

⁶ हुनमन कलीसिया चो पुरे तुचो मया चो गोहई दीला सोत। अगर तुय हुनमन के हुन परकार बिदा कर से जोन परकार माहापुरू चो लोगमन काजे ठीक आय तेबे अच्छा कर से।

⁷ कसनबल्लोने हुनमन हुन नाव चो काजे निकरला सोत, आउर दुसर जातिमन ले काई नी धरोत।

⁸ ऐईकाजे असनमन चो स्वागत करतोर आसे, जेचो ले आमी बले सत चो बाट ने हुनमन चो सकरमी होऊ।

दियुत्रिफेस आउर दिमेत्रियुस

⁹ मय कलीसिया के काई लिकु रलें, मान्तर दियुत्रिफेस जोन हुनमन थाने बड़े बनुक चाहायें से, आमके गरहन नी करे।

¹⁰ ऐईकाजे जिदलदाय मय ऐयें दें तेबे हुनचो काममन चो बाटे जोन हुन करे से, सुरता करायें दें, कि हुन आमचो बारे ने घिन-घिना गोठमन बकरू आय; आउर ऐ थाने बले संतुष्ट नी करून खुद ची भाईमन के गरहन नी करे, आउर हुनमन के जोन गरहन करूक चाहाय सोत मना करू आय आउर कलीसिया ले निकराऊन देऊ आय।

¹¹ हे लाड़रा, खराप चो नाई मान्तर भलाई चो करतो बिता हो। जोन भलाई करू आय, हुन माहापुरू चो बाटले आय; मान्तर जोन खराप करू आय, हुन माहापुरू के नी दकलो।

¹² दिमेत्रियुस चो बारे ने सपाय, मान्तर सत बले खुद ची गोहई दिलो; आउर आमी बले गोहई देऊ सें, आउर तुय जानीस कि आमचो गोहई सते आय।

आखरी शुभकामनामन

¹³ मोके तुके खुबे काई लिकतोर तो रली, मान्तर सीआई आउर कलम ले लिकुक नी चाहायें।

¹⁴ मान्तर मोके आशा आसे कि तुचो ले झटके भेट करें, तेबे आमी छमा-छम गोठ बात करवां।

¹⁵ तुके शान्ति मिरते रओ। ऐथा चो मीत तुके जुहार बले सोत। हुता चो मितमन ले नाव धरून-धरून भाती जुहार बोलुन देस।