2 तीमुथियुस 4 - Halbi

बचन चो परचार कर

¹ माहापुरू आउर मसीह ईशु के गोहई करून जोन जीवतामन आउर मरलो बितामन चो नियाय करे दे, आउर हुनचो परकट होतोर आउर राज चो सुद्धि दियाऊन भाती मय तुके हुकुम देयें से

² कि तुय बचन चो परचार कर, समया आउर असमया तिआर रा, सपाय परकार चो सयनशक्ति आउर सिक्या चो संगे उलाहना देस आउर खिज आउर समजाव।

³ कसनबल्लोने असन समया ऐये दे जिदलदाय लोग खर उपदेश के नी सहुक सक दे, मान्तर कानमन चो खजरी चो लागुन आपलो इच्छामन चो अनुसार आपलो काजे खुबे असन उपदेश देऊ सकल दे,

⁴ आउर आपलो कान सत ले फिरून भाती कथा कहनीमन थाने लगा दे।

⁵ मान्तर तुय सपाय गोठमन ने बाचुन रा, दुख उठाव, नगतखबर परचार चो काम कर, आउर आपलो सेवा के पुरा कर।

⁶ कसनबल्लोने अदायं मय पुजा ने चेगालो तीज चो असन रिकाया जाऊँ आंय, आउर मोचो निकरून जातोर समया ऐऊन पहुँचली से।

⁷ मय अच्छा कुसती लडुन चुकले से, मय आपलो दौड़ पुरा करले से, मय बिश्वास चो राका करले से।

⁸ अगम ने मोचो काजे धरम चो हुन मुकुट संगालोर आसे, जेके परबु जोन धरमी आउर नियायी आय, मोके हुन दिने देये दे, आउर मोके ची नाई मान्तर हुन सपाय के बले जोन हुनचो परकट होतो के लाड़ जानु आत।

खुद चो खबर

⁹ मोचो लगे झटके ऐतोर कोशिश कर।

¹⁰ कसनबल्लोने देमास ऐ जगत के लाड़ जानुन भाती मोके छांडुन दिलो से आउर थिस्सलुनीके ने जाते गेलो से। क्रेसकेंस गलातिया ने आउर तीतुस दलमतिया ने जाते गेलो से।

¹¹ मात्र लूका मोचो संगे आसे। मरकुस के धरून भाती ऐते आव; कसनबल्लोने सेवा चो काजे हुन मोचो खुबे काम चो आय।

¹² तुखिकुस के मय इफिसुस ने पठाले से।

¹³ जोन लुगा पाठा मय त्रोआस ने करपुस चो थाने छांडुन ईले से, जिदलदाय तुय ऐ से तेबे हुनके आउर किताबमन खास करून चरमपतरमन के धरून आव।

¹⁴ सिकन्दर कुमार मोचो ले खुबे बुराईमन करलो से; परबु हुनके हुनचो काममन चो अनुसार पलटा देये दे।

¹⁵ तुय बले हुनचो ले खबड़दार रा, कसनबल्लोने हुन आमचो गोठमन चो खुबे ची बिरूद करलो से।

¹⁶ मोचो पईले जबाप चो जबाप समया कोनी बले मोचो साथ नी दिला, मान्तर सपाय मोके छांडुन देऊ रओत। अच्छा होओ कि ऐचो हुनमन के लेखा देऊक नी पड़ो!

¹⁷ मान्तर परबु मोचो संगे रलो आउर मोके सामरत दिलो, बल्ले मोचो कारन पुरा-पुरा परचार होओ आउर सपाय दुसर जातिमन सुनोत। मय डुरका चो मुंह ले छंडाया गेले।

¹⁸ आउर परबु मोके हरकोनी खराप काम ले बचाए दे, आउर आपलो सरग राज ने अच्छा ले अमराय दे। हुनचेई महिमा जुग-जुग होते रओ। आमीन।

आखरी शुभकामनामन

¹⁹ प्रिसकिला आउर अकविला के आउर उनेसिफुरूस चो घरलोगमन के जुहार।

²⁰ इरास्तुस कुरिन्थुस ने रऊन गेलो, आउर त्रुफिमुस के मय मीलेतुस ने बेमार छांडले से।

²¹ सीतकार ले पयले ऐते ऐतोर कोशिश कर। यूबूलुस, आउर पुदेंस, आउर लीनुस आउर क्लौदिया, आउर सपाय भाईमन चो तुके जुहार।

²² परबु तुचो आत्मा चो संगे रओ। तुमचो उपरे अनुग्रह होते रओ।