2 तीमुथियुस 2 - Halbi

बड़ीया वीर

¹ ऐईकाजे हे मोचो बेटा, तुय हुन अनुग्रह ले जोन मसीह ईशु ने आसे, बलबीता हो,

² आउर जोन गोठमन तुय खुबे असन गोहईमन चो पुरे मोचो ले सुनली सीस, हुनमन के बिश्वासी मानेमन के सोपुन देस; जोन दुसर के बले सिकातोर लायक होओ।

³ मसीह ईशु चो अच्छा लड़तो बिता चो असन मोचो संगे दुख उठाव।

⁴ जिदलदाय कोनी लड़ीईकरू लड़ीई थाने जाऊ आय, तेबे ऐईकाजे कि आपलो भरती करू बिता के हरिक करो आपन खुद के जगत चो काममन ने नी फसाये।

⁵ फेर लड़ीई होतो जगा ने लड़तो बिता अगर नियम चो अनुसार नी लड़े तो मुकुट नी पाये।

⁶ जोन खेतीयार मसागत करू आय, फर चो भाग पयले हुनके मिरतोर आसे।

⁷ जोन मय बोलु आय हुन थाने धिआन देस, आउर परबु तुके सपाय गोठमन चो समज देयेदे।

⁸ ईशु मसीह के सुरता करू रा, जोन दाऊद चो पुरखा ले होलो आउर मरलो बितामन थानले जीव उठलो, आउर ऐ मोचो नगतखबर चो अनुसार आय।

⁹ जेचो काजे मय कुकरमी चो असन दुख उठाऊँ आय, ऐथा ले कि कयद बले आंसे; मान्तर माहापुरू चो बचन कयद निआय।

¹⁰ ऐई लागुन मय चुनलो लोगमन चो काजे सपाय काई सहु आंय कि हुनमन बले हुन मुक्ति के जोन मसीह ईशु ने आसे अमर महिमा चो संगे पाओत।

¹¹ ऐ गोठ सत आय, कि अगर आमी हुनचो संगे मरलु से तो हुनचो संगे जिऊन्दे बले;

¹² अगर आमी धीरज ले सहते रवां तो हुनचो संगे राज बले करवां; अगर आमी हुनचो इन्कार करवां, तो हुन बले आमचो इन्कार करेदे;

¹³ अगर आमी अन्दबिश्वासी बले होऊ तेबले बले हुन बिश्वास लायक बनुन रऊ आय कसनबल्लोने हुन खुद आपलो इन्कार नी करूक सके।

बड़ीया मिस्तरी

¹⁴ ऐ गोठमन चो सुद्धि हुनमन के दियाव आउर परबु चो पुरे जनाऊन देस कि शब्दमन थाने हेर-फेर नी करोत, जेचो ले काई लाब नी होये मान्तर सुनतो बितामन नसुन जाऊ आत।

¹⁵ आपन खुद के माहापुरू चो गरहन लायक आउर असन काम करतो बिता ठेबातोर कोशिश कर, जोन लाज होऊक नी सको, आउर जोन सत चो बचन के अच्छा रीति ले काम ने आनु आय।

¹⁶ मान्तर अशुद्ध गोठ ले बाचुन रा कसनबल्लोने असन लोग आउर बले अभक्ति ने बड़ते जादे,

¹⁷ आउर हुनमन चो बचन कुहलो घाव चो असन फयलते जायदे। हुमिनयुस आउर फिलेतुस हुनीमन थानले आत,

¹⁸ जोन ऐ बोलुन भाती कि जीव उठतोर होऊन चुकली से सत ले भटकुन गेला से, आउर कितलो चो बिश्वास के उलटा पुलटा करून देऊ आत।

¹⁹ तेबले बले माहापुरू चो पक्का पाया बनुन रऊ आय, आउर हुन थाने ऐ छाप लगली से: “परबु आपलो लोग के चिताऊ आय,” आउर “जोन कोनी परबु चो नाव धरू आय हुन अधरम ले बाचुन रओ।”

²⁰ बड़े घर ने मात्र सोना चाँदी ची चो, मान्तर काट आउर माटी चो बरतन बले होऊ आय कोनी-कोनी ईजीत, आउर कोनी-कोनी बेईजित चो काजे।

²¹ अगर कोनी आपन खुद के ऐ मन ले शुद्ध करे दे, तेबे हुन ईजीत चो बरतन आउर पवितर ठेबे दे; आउर मालिक चो काम ऐये दे आउर हर बड़ीया काम चो काजे तिआर होयेदे।

²² ठेंगवा दाय चो इच्छामन ले पराव, आउर जोन शुद्धमन ले परबु चो नाव धरू आत हुनमन चो संगे धरम, आउर बिश्वास, आउर मया, आउर मिला मिसा के पीछा कर।

²³ मान्तर मुरक आउर बिनगिआन चो झगड़ा ले अलगे रा, कसनबल्लोने तुय जाने सीस कि ऐचो ले झगड़ा उपजास होऊ आय।

²⁴ परबु चो दास के झगड़ाहा नी होतोर आय, मान्तर हुन सपाय चो संगे कोमल आउर सिक्या ने भरून आउर सहतो बिता होओ।

²⁵ हुन बिरूदीमन के नम्रता ले समजाओ, काय जाने माहापुरू हुनमन के मन फिराव चो मन देओ कि हुनमन बले सत के चिता ओत,

²⁶ आउर ऐचो लागुन हुनचो इच्छा पुरा करतो काजे चेत होऊन भाती शयतान चो फान्दा ले छुटुन जाओ।