2 तीमुथियुस 1 - Halbi

शुभकामनामन

¹ पौलुस चो बाटले जोन, हुन जीवन चो बायदा चो असन जोन मसीह ईशु ने आसे, माहापुरू चो इच्छा ले मसीह ईशु चो पठालोबिता आय,

² लाड़रा बेटा तीमुथियुस चो नाव। माहापुरू बुआ आउर आमचो परबु मसीह ईशु चो बाटले तुके अनुग्रह आउर दया आउर शान्ति मिरते रओ।

बिश्वास लायक काजे उच उचियातोर

³ जोन माहापुरू चो सेवा मय आपलो बुआ दादीमन चो रीति थाने शुद्ध बिबक ले करें से, हुनचो धन्यबाद होओ कि मय आपलो पारथनामन ने तुके सरलगा सुरता करूं आंय,

⁴ आउर तुचो आँसुमन चो सुद्धि करून-करून रात दिन तुचो ले भेट करतोर आशा संगाऊ आय कि हरिक ले भरून जायें।

⁵ मोके तुचो हुन निष्कपट बिश्वास चो सुद्धि ऐऊ आय, जोन पयले तुचो दीदी लोईस आउर तुचो आया यूनीके ने रली, आउर मोके तय आसे कि तुचो थाने बले आसे।

⁶ ऐई लागुन मय तुके सुद्धि दिलायें से कि तुय माहापुरू चो हुन बर के जोन मोचो हाथ संगालोर चो कारन तुके मिरली से फेर ले बरते रओ।

⁷ कसनबल्लोने माहापुरू आमके भय चो नाई मान्तर सामरत आउर मया आउर सहन चो आत्मा दिलो से।

नगतखबर काजे लाजे नी हुआ

⁸ ऐईकाजे आमचो परबु चो गोहई ले, आउर मोचो ले जोन हुनचो कयदी आंय, लाजे नी हो, मान्तर हुन माहापुरू चो सामरत चो असन नगतखबर चो काजे मोचो संगे दुख उठाव

⁹ जोन आमचो मुक्ति करलो आउर पवितर बुलाहट ले हाग दिलो, आउर ऐ आमचो काममन चो असन नुआय; मान्तर हुनचो उद्देश्य आउर हुन अनुग्रह चो कारन आय जोन मसीह ईशु ने पयले ले आमचो उपरे होली से,

¹⁰ मान्तर अदायं आमचो मुक्तिकरू मसीह ईशु चो परकट होतोर लागुन परकाशीत होली, जोन मरना चो नाश करलो आउर जीवन आउर अमरता के हुन नगतखबर चो लागुन परकाशमान करून दिलो।

¹¹ जेचो काजे मय परचारक, आउर पठालोबिता, आउर उपदेशक बले ठेबले।

¹² ऐई लागुन मय ऐ दुखमन के बले उठायें सें, मान्तर लाज नी होयें, कसनबल्लोने मय हुनके जेचो उपरे मय बिश्वास करले से जाने; आउर मोके तय आसे कि हुन मचो अमानत चो हुन दिन ले राका करूक सके।

बिश्वास चो बारे ईमानदार

¹³ जोन खर गोठमन तुय मोचो ले सुनली सीस हुनके हुन बिश्वास आउर मया चो संगे, जोन मसीह ईशु ने आसे, आपलो नमूना बनान भाती संगाव।

¹⁴ आउर पवितर आत्मा चो दुवारा जोन आमीमन ने बसली से, ऐ अच्छा अमानत चो राका कर।

¹⁵ तुय जानीस कि आसिया बितामन सपाय मोचो ले फिरून गेला से, जोन मन ने फूगिलुस आउर हिरमुगिनेस आसोत।

¹⁶ उनेसिफुरूस चो घरलोगमन उपरे परबु दया करो, कसनबल्लोने हुन खुबे हार मोचो जीव के सितर करलो आउर मोचो सिकरामन ले लाज नी होलो।

¹⁷ मान्तर जिदलदाय हुन रोम ने ईलो, तेबे बड़े सुरता करून आउर डगराऊन भाती मोचो ले भेट करलो

¹⁸ परबु करो कि हुन दिने हुनचो उपरे परबु चो दया होओ-आउर जोन-जोन सेवा हुन इफिसुस ने करलो से हुनमन के बले तुय नुकु-नुकु जानीस।