2 थिस्सलुनीकियो 3 - Halbi

पारथना चो गुहार

¹ आखरी ने, हे भाईमन, आमचो काजे पारथना करते राआ कि परबु चो बचन असन झटके फयलो आउर महिमा पाओ, जसन तुमचो ने होली,

² आउर आमी टेड़ा आउर दुष्ट मानेमन ले बाचु रऊ कसनबल्लोने हरकोनी ने बिश्वास निआय।

³ मान्तर परबु बिश्वास लायक आय हुन तुमके बरसक ले थीर करेदे आउर हुन दुष्ट ले बचाऊन संगायदे।

⁴ आमके परबु ने तुमचो उपरे भरसा आसे कि जोन-जोन हुकुम आमी तुमके देऊ आंव, हुनमन के तुमी मानु आहास, आउर मानते बले राआ से।

⁵ माहापुरू चो मया आउर मसीह चो धीरज चो बाटे परबु तुमचो मन चो अगुवाई करो।

ठग चो बिरूद जनातोर

⁶ हे भाईमन, आमी तुमके आमचो परबु ईशु मसीह चो नाव ले हुकुम देऊँ से कि तुमी हरकोनी असन भाई ले अलग राआ जोन खराप चाल चलु आय आउर जोन सिक्या हुन आमचो ले पावलो हुनचो अनुसार नी करे।

⁷ कसनबल्लोने तुमी खुद ची जानेसास कि कोन रीति ले आमचो असन चाल चलतोर आय, कसनबल्लोने आमी तुमचो मंजी ने खराप चाल नी चलु,

⁸ आउर काचीई रोटी फोकाहा ने नी खादलु; मान्तर मसागत आउर कष्ट ले राती दिना काम धन्धा करते रलु कि तुमचो ने काचीई उपरे बोजा नी होओ।

⁹ ऐ नाई कि आमके अधिकार निआय, मान्तर ऐईकाजे कि आपन खुद के तुमचो काजे नमूना ठेबा ओ कि तुमी आमचो असन चाल चला।

¹⁰ कसनबल्लोने जिदलदाय आमी तुमचो थाने रलु, तेबे बले ऐ हुकुम तुमके देते रलु कि अगर कोनी काम करूक नी चाहायें तो खाऊक बले नी पाओ।

¹¹ आमी सुनु आंव कि कितलो लोग तुमचो मंजी ने ठग चाल चलु आत, आउर काई काम नी करोत मान्तर दुसरमन चो काम ने हाथ लगाया करू आत।

¹² असनमन के आमी परबु ईशु मसीह ने हुकुम देऊ आंव आउर समजाऊँ आंव कि चिमनाय काम करून भाती आपलो ची रोटी खाओत।

¹³ तुमी, हे भाईमन, भलाई करतो ने हिम्मत नी छांडा।

¹⁴ अगर कोनी आमचो ऐ चिठ्ठी चो गोठ के नी मानोत तेबे हुनचो उपरे नजर संगावा, आउर हुनचो संगती नी करा, जेचो ले हुन लाजे होओ।

¹⁵ तेबे बले हुनके बयरी नी समजा, मान्तर भाई जानुन भाती समजाहा।

आखरी शुभकामनामन

¹⁶ अदायं परबु जोन शान्ति चो झरन आय खुद ची तुमके सदा आउर हर परकार ले शान्ति देओ। परबु तुमी सपाय चो संगे रओ।

¹⁷ मय, पौलुस, आपलो हाथ ले जुहार लिकेंसें। सपाय चिठ्ठी ने मोचो ऐई चिना आसे; मय ऐई परकार ले लिकु आंय।

¹⁸ आमचो परबु ईशु मसीह चो अनुग्रह तुमी सपाय चो उपरे होते रओ।