2 थिस्सलुनीकियो 2 - Halbi

पाप चो माने बल्लोने बिनाश चो बेटा

¹ हे भाईमन, अदायं आमी आपलो परबु ईशु मसीह चो ऐतोर, आउर हुनचो लगे आपलो रूंड़ा होतोर चो बारे ने तुमके गुहार करूंसे

² कि कोनी आत्मा, नाहले बचन, नाहले चिठ्ठी चो बाटले, जोन कि माना आमचो बाटले होओ, ऐ समजुन भाती कि परबु चो दिन ऐऊन अमरली से, तुमचो मन उधापड़े अथीर नी होऊन जाओ आउर ना तुमी घबराआ।

³ कोनी रीति ले काचीई धोका ने नी ईआ, कसनबल्लोने हुन दिन नी ऐये जिदलदाय ले धरम चो तियाग नी होये, आउर हुन अधरमी चो माने बल्ले बिनाश चो पिला परकट नी होओ।

⁴ जोन बिरूद करू आय, आउर हरकोनी ले जोन ईश्पर नाहले पुजय बलाया जाऊ आय, आपन खुद के बड़े ठेबाऊ आय, ऐथा ले कि हुन माहापुरू चो मंदिर ने बसुन भाती आपन खुद के ईश्पर ठेबाऊ आय।

⁵ काय तुमके सुरता निआय कि जिदलदाय मय तुमचो थाने रले, तेबे तुमचो ले ऐ गोठमन बोलते रले?

⁶ तुमी हुन तीज के जानास, जोन हुनके ऐबे ठेबा ये से कि हुन आपलो ची समया ने परकट होओ।

⁷ कसनबल्लोने अधरम चो भेद ऐबे बले काम करते जाऊ आय, मान्तर ऐबे गोटक ठेबातो बिता आसे, आउर जिदलदाय ले हुन लापी नी होऊन जाए हुन ठेबाऊन रयदे।

⁸ तेबे हुन अधरमी परकट होयेदे, जोन के परबु ईशु आपलो टोंड चो फुक ले मारून पकाये दे, आउर आपलो ऐतो दाय चो तेज ले भसम करेदे।

⁹ हुन अधरमी चो ऐतोर शयतान चो काम चो अनुसार सपाय परकार चो फंदी सामरत, आउर चिना, आउर भयंकर काम चो संगे,

¹⁰ आउर नाश होतो बितामन चो काजे अधरम चो सपाय परकार चो धोका चो संगे होयेदे; कसनबल्लोने हुनमन सत ले मया नी करला जेचो ले हुनमन चो मुक्ति होती।

¹¹ ऐई कारन माहापुरू हुनमन ने गोटक भुलकाऊन देतो बिती सामरत के पटायेदे कि हुनमन फंद चो बिश्वास करोत,

¹² तेबे जितरो लोग सत चो बिश्वास नी करोत, मान्तर अधरम ले हरिक होऊ आत, हुनमन सपाय डण्ड पाओत।

जमखम बनु राआ

¹³ हे भाईमन, आउर परबु चो लाड़रा लोगमन, जरूरी आय कि आमी तुमचो बारे ने सदा परबु चो धन्यबाद करते रऊँ, कसनबल्लोने माहापुरू मुर ले तुमके चुनुन धरलो कि आत्मा चो बाटले पवितर बनुन भाती, आउर सत चो बिश्वास करून मुक्ति पाआ,

¹⁴ जेचो काजे हुन तुमके आमचो नगतखबर चो बाटले हाग दिलो, कि तुमी आमचो परबु ईशु मसीह चो महिमा के पाआ।

¹⁵ ऐईकाजे हे भाईमन, थीर राहा; आउर जोन-जोन गोठमन तुमी चाहलास बचन नाहले चिठ्ठी चो बाटले आमचो ले सिकलासास, हुनमन के धरू राआ।

¹⁶ आमचो परबु ईशु मसीह खुद ची, आउर आमचो बुआ माहापुरू, जोन आमचो ले मया संगालो आउर अनुग्रह ले अमर शान्ति आउर अच्छा आशा दिलोसे,

¹⁷ तुमचो मन-मन ने शान्ति देओ आउर तुमके हरकोनी बड़ीया काम आउर बचन ने बरसक बनाओ।