2 थिस्सलुनीकियो 1 - Halbi

शुभकामनामन

¹ पौलुस आउर सिलवानुस आउर तीमुथियुस चो बाटले थिस्लुनिकीमन चो कलीसिया चो नाव, जोन आमचो बुआ माहापुरू आउर परबु ईशु मसीह ने आसे:

² आमचो बुआ माहापुरू आउर परबु ईशु मसीह चो बाटले तुमके अनुग्रह आउर शान्ति मिरते रओ।

नियाय चो दिन

³ हे भाईमन, तुमचो बारे ने आमके हर समया माहापुरू चो धन्यबाद करते रतोर आय, आउर ऐ ठीक बले आय, ऐईकाजे कि तुमचो बिश्वास खुबे बड़ते जाऊ आय, आउर तुमी सपाय चो मया आपस ने खुबे ची बड़ते जाऊ आय।

⁴ ऐथा ले कि आमी खुद माहापुरू चो कलीसिया ने तुमचो बारे ने घमण्ड करूं आंव कि जितरो झंझट आउर कष्ट तुमी सहु आहास, हुन सपाय ने तुमचो धीरज आउर बिश्वास परकट होऊ आय।

⁵ ऐ माहापुरू चो सत नियाय चो छुकछुका सबुत आय कि तुमी माहापुरू चो राज चो लायक ठेबा, जेचो काजे तुमी दुख बले उठाऊ आहास।

⁶ कसनबल्लोने माहापुरू चो लगे ऐ नियाय आसे कि जोन तुमके कष्ट देऊ आत, हुनमन के पलटा ने कष्ट देओ

⁷ आउर तुमी, जोन झंझट होऊ आहास, आमचो संगे आराम देओ; हुन समया जिदलदाय कि परबु ईशु आपलो सामरती दूतमन चो संगे, ढ़क-ढ़क तो आईग ने सरग ले परकट होये दे,

⁸ आउर जोन माहापुरू के नी चिता ओत आउर आमचो परबु ईशु चो नगतखबर के नी मानोत हुनमन ले पलटा धरे दे।

⁹ हुनमन परबु चो पुरे ले आउर हुनचो शक्ति चो तेज ले लापी होऊन भाती अमर बिनाश चो डण्ड पावदे।

¹⁰ ऐ हुन दिने होये दे, जिदलदाय हुन आपलो पवितर लोगमन ने महिमा पावतो आउर सपाय बिश्वास करतो बितामन ने अकचकित चो कारन होऊक लाय ऐये दे; कसनबल्लोने तुमीमन आमचो गोहई थाने बिश्वास करलास।

¹¹ ऐईकाजे आमी सदा तुमचो काजे पारथना बले करूं आंव कि आमचो माहापुरू तुमके ऐ हाग दिया जातोर चो लायक समजो, आउर भलाई चो हरकोनी इच्छा आउर बिश्वास चो हरकोनी काम के सामरत संगे पुरा करो,

¹² बल्ले आमचो माहापुरू आउर परबु ईशु मसीह चो अनुग्रह चो अनुसार आमचो परबु ईशु चो नाव तुमचो ने महिमा पाओ, आउर तुमी हुनचो ने।