2 पतरस 3 - Halbi

परबु चो ऐतोर दिन

¹ हे लाड़रामन, अदायं मय तुमके दुसर चिठ्ठी लिकें से, आउर दुनो थाने सुरता दियाऊन भाती तुमचो शुद्धमन के उभरायें से,

² कि तुमी हुन गोठमन के जोन पवितर अगम गिआनीमन पयले बल्ला सोत, आउर परबु आउर मुक्तिकरू चो हुन हुकुम के सुरता करा जोन तुमचो पठालोबितामन चो दुवारा दिया जाऊ रली।

³ आउर ऐ पयले जाना, कि आखरी दिनमन ने हंसी मजाक करतो बितामन ऐ दे, जोन आपली ची मनमानीमन ची अनुसार चल दे

⁴ आउर बोल दे, “हुनचो ऐतोर बायदा काहां गेली। कसनबल्लोने जिदलदाय ले बुआ दादी सोऊन गेला से, सपाय तीज असने ची आसे जसन ब्रमांड चो मुर ले रये?”

⁵ हुनमन तो जानुन बुजुन भाती ऐ भुलकुन गेला कि माहापुरू चो बचन चो बाटले बादरी जुना जुग ले हाजिर आसे आउर धरतनी बले पानी थानले बनली आउर पानी ने थीर आसे,

⁶ ऐचीई लागुन हुन जुग चो जगत पानी ने बुडून भाती नष्ट होऊन गेली।

⁷ मान्तर ऐबे जुग ने बादरी आउर धरतनी हुनी बचन चो दुवारा ऐईकाजे संगाया गेली से कि जराया जाओ; आउर ऐ भगतहीन मानेमन चो नियाय आउर नष्ट होतोर दिन ले असने ची संगाऊन रदे।

⁸ हे लाड़रामन, ऐ गोठ तुमचो ले लुकुन नी रओ कि परबु चो थाने गोटक दिन हजार बरक चो बराबर आय, आउर हजार बरक गोटक दिन चो बराबर आय।

⁹ परबु आपलो बायदा चो बारे ने बेर नी करे, जसन बेर कितलो लोग समजु आत; मान्तर तुमचो बारे ने धीरज धरू आय, आउर नी चाहाय कि कोनी नष्ट होओ मान्तर ऐ आय कि सपाय के मन फिरातोर मवका मिरो।

¹⁰ मान्तर परबु चो दिन चोर चो असन ऐये दे, हुन दिने बादरी बड़े घुड़-घुड़ चो शब्द ले जाते रये दे आउर तत्व खुबे ची तपुन भाती गलुन जादे आउर धरतनी आउर हुन थानचो काम जरून जाय दे।

¹¹ जसन कि ऐ सपाय तीजमन ऐ रीति ले पिघल तो बिती आय, तेबे तुमके पवितर चाल-चलन आउर भक्ति ने कसन माने होतोर आसे,

¹² आउर माहापुरू चो हुन दिन चो बाट कोन रीति ले टाकतोर आसे आउर हुनचो झटके ऐ तो काजे कसन कोशिश करतोर आय, जेचो लागुन बादरी आईग ले गलुन जाय दे, आउर बादरी चो गढ़ खुबे ची तपुन भाती गलुन जाय दे।

¹³ मान्तर हुनचो बायदा चो अनुसार आमी गोटक नवा बादरी आउर नवा धरतनी चो आस दकु से जोन थाने धारमिकता वास करे दे।

चेता ने आउर तिआर राहा

¹⁴ ऐईकाजे, हे लाड़रामन, जसन कि तुमी ऐ गोठमन चो आस दकेसास, तेबे कोशिश करा कि तुमी शान्ति ले हुनचो पुरे निसकलंक आउर निर्दोष ठेबा,

¹⁵ आउर आमचो परबु चो धीरज के मुक्ति समजा, जसन आमचो लाड़रा भाई पौलुस बले हुन गिआन चो अनुसार जोन हुनके मिरली, तुमके लिकलो से।

¹⁶ हुसने ची हुन आपलो सपाय चिठ्ठीमन ने बले ऐ गोठमन चो चरचा करलो से, जोन थाने कितलो गोठमन असन आय जेके समजतोर मशकिल आय, आउर अपढ़ आउर चुल-चुल लोग हुनचो अरतमन के बले पवितर शास्त्र चो दुसर गोठमन चो असन बड़ा-चड़ा करून आपलो ची नाश चो कारन बनाऊ आत।

¹⁷ ऐईकाजे हे लाड़रामन, तुमीमन पयले ची ले ऐ गोठमन के जानुन भाती चेता राहा, बल्ले अधरमीमन चो भरम ने फसुन भाती आपलो ची थीरता के काहांय हाथ ले हजाऊन नी दिआस।

¹⁸ मान्तर आमचो परबु आउर मुक्तिकरू ईशु मसीह चो अनुग्रह आउर पयचान ने बड़ते जाआ। हुनचेई महिमा ऐबे बले होओ, आउर जुग-जुग होते रओ। आमीन।