2 पतरस 2 - Halbi

नशातो बिती असुल

¹ जोन परकार हुन लोगमन ने फंदी अगम गिआनी रवत, हुनी परकार तुमचो थाने बले फंदी उपदेशक हो दे, जोन नाश करतो बिता पाखंडी चो उदघाटन लुकुन-लुकुन भाती कर दे, आउर हुन मालिक चो जोन हुनमन के घेनलो से इन्कार कर दे, आउर आपन खुद के झटके बिनाश ने डाल दे।

² खुबे असन हुनमन चो असन ढीलाढाला कर दे, जेचो लागुन सत चो बाट चो निन्दा करा जाय दे।

³ हुनमन लोग चो काजे गोठमन गडुन भाती तुमके आपलो लाब चो कारन बना दे, आउर जोन डण्ड चो हुकुम हुनमन उपरे पयले ले होऊन चुकली से हुनचो ऐतोर ने काई बले बेर निआय, आउर हुनमन चो बिनाश झुमु नुआय।

फंदी गुरजीमन चो नियाय

⁴ कसनबल्लोने जिदलदाय माहापुरू हुन सरग दूतमन के जोनमन पाप करला नी छांडलो, मान्तर नरक ने पटाऊन भाती अन्धार कुण्डमन ने डालुन दिलो बल्ले नियाय चो दिन तक बन्दी रवत;

⁵ आउर पयले जुग चो संवसार के बले नी छांडलो मान्तर भगतहीन संवसार थाने माहा पानी परलय पठालो, मान्तर धरम चो परचारकरू नूह संगे आंट मानेमन के बचालो;

⁶ आउर सदोम आउर अमोरा चो नंगरमन के बिनाश चो असन डण्ड दिलो कि हुनमन के भसम करून लाकड़ी ने मिसान दिलो बल्ले हुनमन ऐतो बिती भगतहीन लोगमन चो सिक्या चो काजे गोटक कहनी बनोत,

⁷ आउर धरमी लूत के जोन अधरमीमन चो अशुद्ध चाल-चलन ले खुबे दुखी रये छुटकारा दिलो।

⁸ (कसनबल्लोने हुन धरमी हुनमन चो मंजी ने रते-रते आउर हुनमन चो अधरम चो काममन के दकुन-दकुन भाती आउर सुनुन-सुनुन भाती, रोजे दिना आपलो सत मन के डण्ड करते रये।)

⁹ तेबे परबु भगतमन के परीक्षामन थानले निकरातोर आउर अधरमीमन के नियाय चो दिन ले डण्ड चो दसा ने संगाऊक बले जाने,

¹⁰ खास करून हुनमन के जोन अशुद्ध मनमानीमन चो पाट-पाट देंह चो अनुसार चलु आत आउर परभुता के तुच्छ जानु आत। हुनमन नीलज, आउर कुअढ़ आत, आउर बड़े पन बितामन के अच्छा खराप बोलतो ले नी डरोत,

¹¹ तेबे बले सरगदूत जोन शक्ति आउर सामरत ने हुनमन ले बड़े आत, परबु चो पुरे हुनमन के अच्छा खराप बोलुन भाती दोष नी लगा ओत।

फंदी गुरजीमन चो खराप आचरन

¹² मान्तर ऐ लोग निरबुद्धि पशुमन ची असन आत, जोन धराय होतोर आउर नाश होतो काजे उपजास होला से; आउर जोन गोठमन के जानोत ची नाई हुनचो बारे ने दुसर के अच्छा खराप बोलु आत, हुनमन आपलो कुआलो बिती ने खुदे ची कुऊन जादे।

¹³ दुसर चो अधरम करतोर पलटा हुनीमन चो खराप होये दे। हुनमन के दिन दुय पाहार खातो-पिवतोर अच्छा लागु आय। ऐ कलंक आउर दोष आय; जिदलदाय हुनमन तुमचो संगे खाऊ पिऊ आत, तेबे आपलो बाटले पेरम भोज करून खाऊ आत पीऊ आत।

¹⁴ हुनमन चो आँईकमन ने बेबीचार बसली से, आउर हुनमन पाप करलो बिना ठेबुक नी सकोत। हुनमन चुल-चुल मन बिता के फुसयाऊ आत। हुनमन चो मन के लोभ करतोर आदत होऊन गेली से; हुनमन दुक चो पिला आत।

¹⁵ हुनमन सीदा बाट के छांडुन भाती भुलकुन गेला से, आउर बओर चो बेटा बिलाम चो बाट थाने होऊन गेला से, जोन अधरम चो भुती के लाड़ जानला;

¹⁶ मान्तर हुनमन चो अपराध चो बारे ने शिकायत दिया गेली, ऐथा ले कि नी बोलतो बिती गदही माने चो बोली ले हुन अगम गिआनी के हुनचो बोयापन ले ठेबालो।

¹⁷ ऐ लोग सुकलो चुंआ, आउर लेहरा चो उड़ालो बिती बादरी आत; हुनमन काजे अमर अंधार ठेबाया गेली से।

फंदी गुरजीमन चो धोका

¹⁸ हुनमन फकाहा घमण्ड चो गोठमन करून-करून भाती ढीलाढाला चो काममन चो दुवारा, हुन लोगमन के देंह चो मनमानीमन ने फसाऊन धरू आत जोन भुलकलो लोगमन थानले ऐबे ची निकरे सोत।

¹⁹ हुनमन-हुनमन के छुटछाड़ातोर बायदा तो करू आत, मान्तर खुदे ची कुहलोर दास आत; कसनबल्लोने जोन माने जेचो ले हारलो से, हुन हुनचो दास बनुन जाऊ आय।

²⁰ जिदलदाय हुनमन परबु आउर मुक्तिकरू ईशु मसीह चो पयचान चो दुवारा संवसार चो नाना परकार चो अशुद्धता ले बाचुन निकरला, आउर फेर हुन थाने फसुन भाती हारला, तेबे हुनमन चो पाचे चो दशा पयले ले बले खराप होऊन गेली से।

²¹ कसनबल्लोने धरम चो बाट के नी जानतोर ची हुनमन काजे ऐचो ले अच्छा होती कि हुनके जानुन भाती, हुन पवितर हुकुम ले फिरून जाता जोन हुनमन के सोपा जाऊ रली।

²² हुनमन उपरे ऐ कहका ठीक बसु आय, कि कुकूर आपलो छाट चो बाटे आउर नाहान दिलो बिती बराहां चीकल ने घोंडरतो काजे फेर जाते जाऊ आय।