2 पतरस 1 - Halbi

शुभकामनामन

¹ शिमोन पतरस चो बाटले, जोन ईशु मसीह चो दास आउर पठालोबिता आय, हुन लोगमन चो नाव जोनमन आमचो माहापुरू आउर मुक्ति करू ईशु मसीह चो धारमिकता ले आमचो असन बड़े मोल बिश्वास परापत करला से।

² माहापुरू चो आउर आमचो परबु ईशु चो पयचान चो दुवारा अनुग्रह आउर शान्ति तुमनमन ने खुबे ले खुबे बड़ते जाओ।

बिश्वास ने बाड़ती

³ कसनबल्लोने हुनचो माहापुरू चो सामरत ने सपाय तीज जोन जीवना आउर भक्ति ले सम्बंध संगाऊ आय, आमके हुनचेई पयचान चो दुवारा दिलो से, जोन आमके आपलो ची महिमा आउर सद गुन चो अनुसार हाग दिलो से।

⁴ जोनमन चो दुवारा हुन आमके बड़े मोल आउर खुबे बड़े बायदामन दिलो से बल्ले ऐ मन चो दुवारा तुमी हुन कुवतोर ले छुटुन भाती, जोन संवसार ने खराप मनमानीमन ले होऊ आय, माहापुरू चो स्वभाव चो शामिल होऊन जाहा।

⁵ आउर ऐई लागुन तुमी सपाय परकार चो कोशिश करून आपलो बिश्वास थाने सद गुन, आउर सद गुन थाने समज,

⁶ आउर समज थाने सहन, आउर सहन थाने धीरजा, आउर धीरजा थाने भक्ति,

⁷ आउर भक्ति थाने भाईचारा चो लाड़, आउर भाईचारा चो लाड़ थाने मया बड़ाते जाहा।

⁸ कसनबल्लोने अगर ऐ गोठमन तुमनमन ने ऐबे रओ आउर बड़ते जाओ, तेबे तुमके आमचो परबु ईशु मसीह चो पयचान ने बेकार आउर नीसफल नी होऊक देये दे।

⁹ कसनबल्लोने जेचो थाने ऐ गोठमन निआय, हुन आन्दा आय आउर झांवर दकु आय, आउर आपलो पयले चो पापमन ले धोऊन भाती शुद्ध होतो के भुलकुन बसलो से।

¹⁰ ऐई लागुन हे भाईमन, आपलो हाग दिलोर, आउर चुनलो के सिद्ध करतोर अच्छा तरीका ले कोशिश करते जाहा, कसनबल्लोने अगर असन करा से तो केबीई बले ठोकरना नी खाआ से;

¹¹ मान्तर ऐई रीति ले तुमी आमचो परबु आउर मुक्ति करू ईशु मसीह चो अमर राज ने बड़े ईजीत चो संगे ओलुक सका से।

पतरस चो आखरी समया

¹² ऐईकाजे अगर तुमी ऐ गोठमन जानास, आउर जोन सत बचन तुमके मिरली से हुन थाने बनुन राआ, तेबले बले मय तुमके ऐ गोठमन चो सुरता दियातोर हरमेशा तिआर रयें दे।

¹³ मय ऐ आपलो काजे अच्छा समजे से कि जिदलदाय ले मय ऐ डेरा ने आसे, हुदलदाय ले तुमके सुद्धि दियाऊन भाती उभारते रयें दे।

¹⁴ कसनबल्लोने ऐ जाने से कि मोचो डेरा के घसराया जातोर समया झटके ऐतो बिती आय, जसन कि आमचो परबु ईशु मसीह मोचो उपरे परकट करलो से।

¹⁵ ऐईकाजे मय असन कोशिश करें दें कि मोचो काई करलोर पाचे तुमी ऐ सपाय गोठमन के हरमेशा सुरता करूक सका।

मसीह चो महिमा चो दरशन

¹⁶ कसनबल्लोने जिदलदाय आमीमन तुमके आपलो परबु ईशु मसीह चो सामरत चो आउर आगमन चो खबर देऊ रलु, तेबे हुन चलाक ले घड़लो बिती कहनीमन चो नकल नी रली मान्तर आमीमन खुद ची हुनचो परताप के दकु रलु।

¹⁷ कसनबल्लोने जिदलदाय हुन माहापुरू बुआ ले ईजीत आउर महिमा पावलो आउर हुन परतापमय महिमा थानले ऐ आवाज ईली, “ऐ मोचो लाड़रा बेटा आय, जेचो ले मय हरिक आंसे।”

¹⁸ तेबे आमी हुनचो संगे पवितर डोंगरी थाने रलु आउर सरग ले ऐ आवाज ऐतोर सुनलु।

¹⁹ आमचो लगे जोन अगम गिआनीमन चो बचन आसे, हुन ऐ घटना ले जमखम ठेबली। तुमी ऐ अच्छा करेसास जोन ऐ समजुन भाती हुन उपरे धिआन करू आस कि हुन गोटक दीया आय, जोन अंधार जगा ने हुन समया ले उजर देते रऊ आय जिदलदाय ले कि बिहान नी होये आउर बड़े बिहान चो तारा तुमचो मन-मन ने नी बरे।

²⁰ मान्तर पयले ऐ जाना कि पवितर शास्त्र चो कोनी बले अगम गोठ काचीई आपली ची सोच बिचार चो आधार थाने पुरा नी होये

²¹ कसनबल्लोने कोनी बले अगम गोठ माने चो इच्छा ले केबीई नी होली, मान्तर भगत जन पवितर आत्मा चो दुवारा उभरुन जाऊन भाती माहापुरू चो बाटले बोलते रवत।