2 यूहन्ना 1 - Halbi

सियानमन चो बाटले चुनलो बितामन के जुहार

¹ मय सियान चो बाटले हुन चुनलो बिती बायले आउर हुनचो पिलामन चो नाव, जोनमन ले मय सते मया संगाऊ आय, आउर मात्र मय ची नाई मान्तर हुनमन सपाय बले मया संगाऊ आत जोन सत के जानोत;

² हुन सत जोन आमचो ने थीर रऊ आय, आउर हरमेशा आमचो संगे अटल रये दे;

³ माहापुरू बुआ, आउर बुआ चो बेटा ईशु मसीह चो बाटले अनुग्रह आउर दया आउर शान्ति, सत आउर मया संगे आमचो संगे रये दे।

मसीह चो हुकुममन ने चलतोर

⁴ मय खुबे हरिक होले कि मय तुचो खिन्डिक पिलामन के हुन हुकुम चो अनुसार, जोन आमके बुआ चो बाटले मिरून रये, सत थाने चलतोर भेटले।

⁵ अदायं हे बायले लेकी, मय तुके कोनी नवा हुकुम नाई, मान्तर हुनी जोन मुर ले आमचो लगे आसे, लिकें से; आउर तुचो ले गुहार करें से कि आमी गोटक दुसर ले मया संगाऊ।

⁶ आउर मया ऐ आय कि आमी हुनचो हुकुममन चो अनुसार चलु; ऐ हुनी हुकुम आय जोन तुमनमन मुर ले सुनसास, आउर तुमके ऐ थाने चलतोर बले आसे।

मसीह बयरी चो धोका ले खबड़दार

⁷ कसनबल्लोने खुबे असन भरमातो बिता जगत ने निकरून ईला सोत, जोन ऐ नी मानोत कि ईशु मसीह देंह ने होऊन भाती ईलो, भरमातो बिता आउर मसीह चो बिरोधी ऐई आय।

⁸ आपलो बारे ने चलाक राहा, कि जोन मसागत आमी करलु से हुनके तुमी नी हजाहा, बल्ले हुनचो पुरा करलो फल पाहा।

⁹ जोन कोनी मसीह चो सिक्या ले पयले बडुन जाऊ आय आउर हुन थाने बनुन नी रये, हुनचो लगे माहापुरू निआय, जोन कोनी हुनचो सिक्या ने थीर रऊ आय, हुनचो लगे बुआ बले आसे आउर बेटा बले।

¹⁰ अगर कोनी तुमचो लगे ऐओ आउर ऐई सिक्या नी देओ, हुनके न तो घर ने ऐऊक दिआस आउर न जुहार करा।

¹¹ कसनबल्लोने जोन कोनी असन जन के जुहार करू आय, हुन हुनचो खराप काममन ने शामिल होऊ आय।

आखरी जुहार

¹² मोके खुबे असन गोठमन तुमके लिकतोर आसे, मान्तर कागत आउर सीआई ले लिकुक नी चाहायें, मान्तर आशा आसे कि मय तुमचो लगे ऐयें दें आउर छमा-छम गोठ बात करें दें, जेचो ले तुमचो हरिक पुरा होओ।

¹³ तुचो चुनलो बिती भईन चो पिलामन तुके जुहार बले सोत।