2 कुरिन्थियो 9 - Halbi

सायता चो सिक्या

¹ अदायं हुन सेवा चो बारे ने जोन पवितर लोगमन चो काजे करा जाऊ आय, मोके तुमके लिकतोर जरूरी नुआय।

² कसनबल्लोने मय तुमचो मन चो तिआर के जाने, जेचो लागुन मय तुमचो बारे ने मकिदुनिया रतो बितामन चो पुरे घमण्ड दकाऊ आंय कि अखाया चो लोग गोटक बरक ले तिआर होला सोत, आउर तुमचो हरिक आउर खुबेमन के बले उठाला से।

³ मान्तर मय भाईमन के ऐईकाजे पठाले से कि आमी जोन घमण्ड तुमचो बारे ने दकालु, हुन ऐ गोठ ने फकाहा नी ठेबो; मान्तर जसन मय बल्ले असने ची तुमी तिआर राहा,

⁴ असन नी होओ कि अगर कोनी मकिदुनियावासी मचो संगे ऐ दे आउर तुमके तिआर नी पाओत, तेबे होऊक सके कि ऐ भरसा चो लागुन आमी (ऐ नी बोलु कि तुमी) लाजे पड़ा।

⁵ ऐईकाजे मय भाईमन ले ऐ बिनती करतोर जरूरी समजले कि हुनमन पयले ले तुमचो लगे जाओत, आउर तुमचो उदारता चो फल जेचो बारे ने पयले ले बचन दिया जाऊ रली, तिआर करून संगा ओत कि ऐ दबाव ले नाई मान्तर आशीष चो फल चो असन तिआर होओ।

अच्छा दान देतो बिता

⁶ मान्तर गोठ ऐ आय, जोन खिन्डिक बुनु आय, हुन खिन्डिक काटे दे बले; आउर जोन खुबे बुनु आय, हुन खुबे काटे दे।

⁷ हर गोटक जन जसन मन ने ठानो असने ची दान करो; ना गुरमुरुन आउर ना दबाव ले, कसनबल्लोने माहापुरू हरिक ले देतो बितामन ले मया संगाऊ आय।

⁸ माहापुरू सपाय परकार चो अनुग्रह तुमके खुबे ले खुबे देऊक सके जेचो ने सपाय गोठ ने आउर हर समया, सपाय काई, जोन तुमके जरूरत आसे, तुमचो लगे रओ; आउर हरकोनी अच्छा काम चो काजे तुमचो लगे खुबे काई होओ।

⁹ जसन लिकलोर आसे, “हुन बिकरलो, हुन कंगालमन के दान दिलो, हुनचो धरम हरमेशा बनु रये दे।”

¹⁰ आउर जोन बुनतो बिता के बीज आउर खातो काजे रोटी देऊ आय, हुन तुमके बीज देये दे, आउर हुनके फरायदे; आउर तुमचो धरम चो फल के बड़ाये दे।

¹¹ तुमी सपाय गोठ ने सपाय परकार चो उदारता चो काजे जोन आमचो दुवारा माहापुरू चो धन्यबाद कराऊ आय, सवकार करा जाहा।

¹² कसनबल्लोने ऐ सेवा चो पुरा करलो ने ना मात्र पवितर लोगमन चो जरूरतमन पुरा होऊ आय, मान्तर लोगमन चो बाटले माहापुरू चो बले खुबे धन्यबाद होऊ आय।

¹³ कसनबल्लोने ऐ सेवा के सबुत मानुन हुनमन माहापुरू चो महिमा परकट करू आत कि तुमी मसीह चो नगतखबर के मानुन भाती हुनचो अधीन रऊ आहास, आउर हुनमन चो बाटे सपाय चो सायता करतो ने उदारता परकट करते रऊ आहास।

¹⁴ आउर हुनमन तुमचो काजे पारथना करू आत; आउर ऐईकाजे कि तुमचो उपरे माहापुरू चो बड़े ची अनुग्रह आसे, तुमचो आशा करते रऊ आत।

¹⁵ माहापुरू चो, हुनचो हुन दान चो काजे जोन बरनन ले बाहरे आसे, धन्यबाद होओ।