2 कुरिन्थियो 8 - Halbi

हरिकमन ले दान देतोर

¹ अदायं हे भाईमन, आमी तुमके माहापुरू चो हुन अनुग्रह चो खबर देऊ से जोन मकिदुनिया चो कलीसियामन थाने होली से।

² कि कलेश चो बड़े परीक्षा ने हुनमन चो भारी हरिक आउर भारी कंगालपन ने हुनमन चो उदारता खुबे बडुन गेली।

³ हुनमन चो बारे ने मोचो ऐ गोहई आय कि हुनमन आपलो सामरत भर मान्तर सामरत ले बले बाहरे, मन ले दिला।

⁴ आउर ऐ दान ने आउर पवितर लोगमन चो सेवा ने शामिल होतोर अनुग्रह चो बारे ने, आमचो ले घन-घन खुबे बिनती करला,

⁵ आउर जसन आमी आशा करू रलु, असने ची नाई मान्तर हुनमन परबु के फेर माहापुरू चो इच्छा ले आमके बले आपन खुद के देउन दिला।

⁶ ऐईकाजे आमी तीतुस के समजालु कि जसन हुन पयले मुरयाऊ रलो, असने ची तुमचो मंजी ने ऐ दान चो काम के पुरा बले करोत।

⁷ ऐईकाजे जसन तुमी हर गोठ ने बल्लोने बिश्वास, बचन, गिआन आउर सपाय परकार चो कोशिश ने, आउर हुन मया ने जोन आमचो ले संगाऊ आस, बाड़ते जाऊ आस, असने ची ऐ दान चो काम ने बले बाड़ते जाआ।

मसीह आमचो समान

⁸ मय हुकुम चो रीति थाने तो नाई, मान्तर दुसरमन चो उदुम ले तुमचो मया चो सत के जांचतो काजे बलेंसें।

⁹ तुमी आमचो परबु ईशु मसीह चो अनुग्रह जानसास कि हुन सवकार होऊन भाती बले तुमचो काजे कंगाल बनुन गेलो, बल्ले हुनचो कंगाल होऊन जातो ले तुमी सवकार होऊन जाआ।

¹⁰ ऐ गोठ ने मोचो सला ऐई आय: ऐ तुमचो काजे अच्छा आय, जोन गोटक बरक ले ना तो मात्र ऐ काम के करतो ची ने, मान्तर ऐ गोठ चो चाह लो ने बले पयला होऊ राआस,

¹¹ ऐईकाजे अदायं ऐ काम पुरा करा कि जसन इच्छा करतो ने तुमी तिआर राआस, असने ची आपलो-आपलो पुंजी चो अनुसार पुरा बले करा।

¹² कसनबल्लोने अगर मन चो तिआर होओ तेबे दान हुनचो अनुसार गरहन बले होऊ आय जोन हुनचो लगे आसे, ना कि हुनचो अनुसार जोन हुनचो लगे निआय।

¹³ ऐ नाई कि दुसरमन के आराम आउर तुमके कलेश मिरो,

¹⁴ मान्तर बराबरी चो बिचार ले ऐ समया तुमचो बाड़ती हुनमन चो घटी ने काम ऐओ, बल्ले हुनमन चो बाड़ती बले तुमचो घटी ने काम ऐओ कि बराबर होऊन जाओ।

¹⁵ जसन लिकलोर आसे, “जोन खुबे बिनलो हुनचो काई आगर नी निकरली, आउर जोन खिन्डिक बिनलो हुनचो काई कम नी निकरली।”

तीतुस चो कुरिन्थुस ने पटाया जातोर

¹⁶ माहापुरू चो धन्यबाद होओ, जोन तुमचो काजे हुनी उदुम तीतुस चो मन ने डालुन दिलो से।

¹⁷ कि हुन आमचो समजातोर मानलो मान्तर खुबे उदुम होऊन भाती हुन आपलो इच्छा ले तुमचो लगे गेलो से।

¹⁸ आमी हुनचो संगे हुन भाई के बले पठालु से जेचो नाव नगतखबर चो बारे ने सपाय कलीसियामन ने फयली से;

¹⁹ आउर ईतली ची नाई, मान्तर हुन कलीसिया बाटले थेबाया बले गेलो कि ऐे दान चो काम चो काजे आमचो संगे जाओ। आमी ऐ सेवा ऐईकाजे करू आंव कि परबु चो महिमा आउर आमचो मन चो तिआर परकट होऊन जाओ।

²⁰ आमी ऐ गोठ ने हुसीयार रऊ आंव कि ऐ उदारता चो काम चो बारे ने जेचो सेवा आमी करू आंव, कोनी आमचो उपरे दोष नी लगाऊक पाओत।

²¹ कसनबल्लोने जोन गोठमन मात्र परबु ची लगे नुआय, मान्तर मानेमन चो लगे बले नुकु आय आमी हुनमन चो चिन्ता करू आंव।

²² आमी हुनचो संगे आपलो भाई के बले पठालु से जोन के आमी घन-घन परकुन खुबे गोठमन ने उदुम पावलु से; मान्तर अदायं तुमचो उपरे हुनके बड़े भरसा आसे, ऐ लागुन हुन आउर बले जादा उदुम आसे।

²³ अगर कोनी तीतुस चो बारे ने पचार दे, तेबे हुन मोचो संगवारी आउर तुमचो काजे मोचो संगे कामकरू आय; आउर अगर आमचो भाईमन चो बारे ने पचारो, तेबे हुनमन कलीसियामन चो पठालोबिता आउर मसीह चो महिमा आत।

²⁴ आउर आपलो मया आउर आमचो हुन घमण्ड जोन तुमचो बारे ने आसे कलीसियामन चो पुरे सिद्ध करून हुनमन के दकाहा।