2 कुरिन्थियो 7 - Halbi

¹ आउर हे लाडरामन, जिदलदाय कि ऐ बायदामन आमके मिरली से, तो ईआ, आमी आपन खुद देंह आउर आत्मा चो सपाय मईल ले शुद्ध करूं, आउर माहापुरू चो भय संगाते-संगाते पवितरता के सिद्ध करूं।

हरिक आउर पसतातोर

² आमके आपलो मन ने जगा दिआस। आमी ना कोचीई संगे अनियाय करलु, ना कोनी के नशालु, आउर ना कोनी के ठगलु।

³ मय तुमके दोषी ठेबातो काजे ऐ नी बोलें। कसनबल्लोने मय पयले ची बोलुन चुकले से कि तुमी आमचो मन ने असन बसुन गेलासास कि आमी तुमचो संगे मरतो जीवतो काजे तिआर आंसु।

⁴ मय तुमके खुबे हिम्मत चो संगे बलेंसें, मोके तुमचो उपरे बड़े घमण्ड आसे; मय शान्ति ले भरून गेले से। आपलो पूईतराय कलेश ने मय हरिक ले खुबे भरपूर रऊं आय।

⁵ कसनबल्लोने जिदलदाय आमी मकिदुनिया ने ईलु, तेबे बले आमचो देंह के आराम नी मिरली; मान्तर आमी भोंवरक ले कलेश पावते रलु; बाहरे लड़ीईमन रली, भीतरे भयंकर गोठमन रली।

⁶ तेबले बले दिनमन के शान्ति देतो बिता माहापुरू तीतुस चो ईलो ले आमके शान्ति दिलो;

⁷ आउर ना मात्र हुनचो ईलो ले मान्तर हुनचो हुन शान्ति ले बले, जोन हुनके तुमचो बाटले मिरू रली। हुन तुमचो लालच, तुमचो दुक, आउर मोचो काजे तुमचो धुन चो खबर आमके सुनालो, जेचो ले मोके आउर बले हरिक होली।

⁸ कसनबल्लोने अगर मय आपलो चिठ्ठी ले तुमके दुकी करले, मान्तर हुनचो ले पसतायें नाई जसन कि पयले पसताते रले, कसनबल्लोने मय दकेंसें कि हुन चिठ्ठी ले तुमके दुक तो होली मान्तर हुन डण्डिक चो काजे रये।

⁹ अदायं मय हरिक आंसे मान्तर ऐईकाजे नाई कि तुमके दुक पोंहचली, मान्तर ऐईकाजे कि तुमी हुन दुक चो लागुन मन फिरालास, कसनबल्लोने तुमचो दुक माहापुरू चो इच्छा चो अनुसार रली कि आमचो बाटले तुमके कोनी गोठ ने हानि नी पोंवचो।

¹⁰ कसनबल्लोने माहापुरू-भक्त चो दुक असन पश्तावा पयदा करू आय जेचो फल मुक्ति आय आउर फेर हुनचो ले पश्ताऊक नी पढ़े। मान्तर संवसार चो दुक मरना पयदा करू आय।

¹¹ आउर दका, ऐई गोठ ले कि तुमके माहापुरू भक्ति चो दुक होली तुमचो ने कितलो उदुम आउर जबाप चो जबाप आउर रीस, आउर भय, आउर लालच, आउर धुन आउर डण्ड देतोर बिचार पयदा होली? तुमीमन सपाय परकार ले ऐ सिद्ध करून दकालास कि तुमी ऐ गोठ ने निर्दोष आस।

¹² फेर मय जोन तुमचो लगे लिकुन रले, हुन ना तो हुनचो लागुन लिकले जोन अनियाय करला आउर ना हुनचो लागुन जेचो उपरे अनियाय करा गेली, मान्तर ऐईकाजे कि तुमचो उदुम जोन आमचो काजे आय, हुन माहापुरू चो पुरे तुमचो उपरे परकट होऊन जाओ।

¹³ ऐईकाजे आमके शान्ति मिरली। आमचो ऐ शान्ति चो संगे तीतुस चो हरिक चो कारन आउर बले हरिक होले कसनबल्लोने हुनचो जीव तुमी सपाय चो लागुन हरा भरा होऊन गेलीसे।

¹⁴ कसनबल्लोने अगर मय हुनचो पुरे तुमचो बारे ने काई घमण्ड दकाले, तेबे लाज नी होले, मान्तर जसन आमी तुमचो ले सपाय गोठमन सत-सत बोलुन देऊ रलु, असने ची आमचो घमण्ड दकातोर तीतुस चो पुरे बले सत निकरली।

¹⁵ जिदलदाय हुनके तुमी सपाय चो हुकुम मानु होतोर सुरता ऐऊ आय कि कसन तुमी डरते आउर थरथरते-थरथरते हुनचो संगे भेट करलास; तेबे हुनचो मया तुमचो बाटे आउर बले बाड़ते जायसे।

¹⁶ मय हरिक आंसे कसनबल्लोने मोके हर गोठ ने तुमचो उपरे पुरा भरसा आसे।