2 कुरिन्थियो 6 - Halbi

सेवा काम चो जानकारी

¹ आमी जोन माहापुरू चो संगे कामकरू आंव ऐ बले समजु आंव कि हुनचो अनुग्रह जोन तुमचो उपरे होली, हुनके फकाहा नी जाऊक दिआस।

² कसनबल्लोने हुन तो बोलु आय, “आपलो हरिक चो समया मय तुचो सुनले, “आउर मुक्ति चो दिने मय तुचो सायता करले।” दका, ऐबे हुन हरिक चो समया आय; दका, ऐबे हुन मुक्ति चो दिन आय।

पौलुस चो मशकिलमन

³ आमी कोनी गोठ ने ठोकरना खातोर कोनी बले मवका नी देऊं बल्ले आमचो सेवा थाने कोनी दोष नी ऐओ।

⁴ मान्तर हर गोठ ले माहापुरू चो सेवकमन चो असन आपलो सदगुणमन के परकट करू आत, बड़े धीरज ले, कलेशमन ले, दरिदरता ले, संकटमन ले,

⁵ कोड़ा खादलो ले, कयद होलो ले, कोलारमन ले, मसागत ले, चेता रलो ले, उपास करलो ले,

⁶ पवितरता ले, गिआन ले, धीरज ले, किरपा ले, पवितर आत्मा ले,

⁷ सत मया ले, सत चो बचन ले, माहापुरू चो सामरत ले, धारमिकता चो हत्यारमन ले, जोन उजा डेबरी हाथमन ने आसे,

⁸ मान आउर नीरादर ले, दूर नाव आउर सुन्दर नाव ले। अगर भरमातो बितामन चो जसन जान पडु आत तेबले बले सत आत;

⁹ अनजानमन चो समान आत, तेबले बले नामचीन आत; मरतो बितामन चो समान आत आउर दका जीव आसोत; मार खातो बितामन चो समान आत मान्तर जीव ले मारा नी जाओत;

¹⁰ दुक करतो बितामन चो असन आत, मान्तर हरमेशा हरिक करू आत; कंगालमन चो असन आत, मान्तर खुबेमन के सवकार बनान देऊ आत; असन आत जसन आमचो लगे काई निआय तेबले बले सपाय काई संगाऊ आत।

¹¹ हे कुरिन्थिमन, आमी खुलम खुला तुमचो ले गोठयालु से, आमचो मन तुमचो बाटे खुल्ला होली से।

¹² तुमचो काजे आमचो मन ने काई संका निआय, मान्तर तुमचो मनमन ने संका आसे।

¹³ मान्तर आपलो पिला जानुन भाती तुमके बलेंसें कि तुमी बले हुनचो पलटा ने आपलो मन के खोलुन दिआस।

आमी माहापुरू चो मंदिर आंव

¹⁴ बिश्वासिमन चो संगे असमान जुआंड़ी ने नी जोपा, कसनबल्लोने धारमिकता आउर अधरम चो काय मेल-जोल? नाहले उजर आउर अंधार चो काय मेल?

¹⁵ आउर मसीह चो बलियाल चो संगे काय लगाव? नाहले बिश्वासी चो संगे अबिश्वासी चो काय नाता?

¹⁶ आउर मुरतीमन चो संगे माहापुरू चो मंदिर ले काय सम्बंध? कसनबल्लोने आमी तो जीवता माहापुरू चो मंदिर आंव; जसन माहापुरू बल्लो से, “मय हुनमन थाने बसेंदें आउर हुनमन थाने चला फिरा करेंदे; आउर मय हुनमन चो माहापुरू होयेंदें, आउर हुनमन मोचो लोग होदे।”

¹⁷ ऐईकाजे परबु बलेंसें, “हुनमन चो मन्जारे ले निकरा आउर अलगे राआ; आउर अशुद्ध तीज के नी छिंया, तेबे मय तुमके गरहन करेंदे;

¹⁸ आउर मय तुमचो बुआ होयेंदें, आउर तुमी मोचो बेटा आउर बेटीमन हुआ से। “ऐ सर्वशक्तिमान परबु माहापुरू चो बचन आय।”