2 कुरिन्थियो 5 - Halbiआमचो सरग चो घर 1 कसनबल्लोने आमी जानु से कि जिदलदाय आमचो धरतनी थाने डेरा असन घर घसराया जाय दे, तेबे आमके माहापुरू चो बाटले सरग थाने गोटक असन भवन मिरे दे जोन हाथमन ले बनलो बिती घर नुआय, मान्तर नी घसरतो बिती आय। 2 ऐ थाने तो आमी कहरते आउर बड़े आशा संगाऊ आंव कि आपलो सरग चो घर के पिन्दुन रऊं। 3 कि ऐचो पिन्दलो ले आमी बिन फटीई नी पाया जाऊं। 4 आउर आमी ऐ डेरा ने रते-रते बोज ले चेपाय कहरते रऊ आंव, कसनबल्लोने आमी हिटातोर नाई मान्तर आउर पिंदुक चाहाऊ आंव, बल्ले हुन जोन मरनहार आय जीवना ने बुडून जाओ। 5 जोन आमके ऐई गोठ चो काजे तिआर करलो से हुन माहापुरू आय, जोन आमके बयाना ने आत्मा बले दिलोसे। 6 आउर आमी सदा हिम्मत बान्दुन रऊ आंव आउर ऐ जानु से कि जिदलदाय ले आमी देंह ने रऊ आंव, हुदलदाय ले परबु ले अलग आसु। 7 कसनबल्लोने आमी रूप के दकुन भाती नाई, मान्तर बिश्वास ले चलु आंव। 8 ऐईकाजे आमी हिम्मत बान्दते रऊ आंव, आउर देंह ले अलग होऊन भाती परबु चो संगे रतोर आउर बले उत्तम समजु आंव। मसीह चो नियाय आसन 9 ऐई लागुन आमचो मन चो उदुम ऐ आय कि भले संगे रऊं भले अलग रऊं, मान्तर आमी हुनके भावते रऊं। 10 कसनबल्लोने जरूरी आय कि आमी सपाय चो हाल मसीह चो नियाय आसन चो पुरे खुलुन जाओ, कि हरकोनी माने आपलो-आपलो अच्छा खराप काममन चो पलटा जोन हुन देंह चो दुवारा करलो से पाओ। माहापुरू ले मेल-मिलाप चो सेवा 11 ऐईकाजे परबु चो भय मानुन भाती आमी लोगमन के समजाऊँ आंव; मान्तर माहापुरू थाने आमचो हाल परकट आसे, आउर मोचो आशा ऐ आय कि तुमचो बिबक थाने बले परकट होली से होती। 12 आमी फेर बले आपलो बड़ाई तुमचो पुरे नी करू, मान्तर आमी आपलो बारे ने तुमके घमण्ड करतोर मवका देऊं से कि तुमी हुनमन के जबाप देऊक सका, जोन मन थाने नाई मान्तर दकावटी गोठमन थाने घमण्ड करू आत। 13 अगर आमी बेसुद आसु तो माहापुरू चो काजे, आउर अगर चेत आसु तो तुमचो काजे आय। 14 कसनबल्लोने मसीह चो मया आमके बेबस करून देऊ आय; ऐईकाजे आमी ऐ समजु आंव कि जिदलदाय गोटक सपाय चो काजे मरलो तेबे सपाय मरून गेला। 15 आउर हुन ऐईकाजे सपाय चो काजे मरलो कि जोन जीव आसोत, हुनमन पयले ले आपलो काजे नी जीओत मान्तर हुनचो काजे जोन हुनमन काजे मरलो आउर फेर जीव उठलो। मसीह ने नवा रचना 16 आउर अदायं ले आमी काकीई देंह चो अनुसार नी समजु। अगर आमीमन मसीह के बले देंह चो अनुसार जानु रलु, तेबले बले अदायं ले हुनके असन नी जानुदें। 17 ऐईकाजे अगर कोनी मसीह ने आसे तो हुन नवा रचना आय: जुना गोठमन बीतुन गेली से; दका, सपाय गोठमन नवा होऊन गेली से। 18 ऐ सपाय गोठमन माहापुरू चो बाटले आय, जोन मसीह चो दुवारा आपलो संगे आमचो मिला-मिसा करलो, आउर मिला-मिसा चो सेवा आमके सोपुन दिलोसे। 19 बल्लोने माहापुरू मसीह ने होऊन भाती आमके आपलो संगे संवसार चो मिला-मिसा करलो, आउर हुनमन चो अपराधमन चो दोष हुनमन उपरे नी लगालो, आउर हुन मिला-मिसा चो बचन आमके सोपुन दिलोसे। 20 ऐईकाजे आमी मसीह चो राजदूत आंव; माना माहापुरू आमचो दुवारा गुहार करे से। आमी मसीह चो बाटले गुहार करूं से कि माहापुरू चो संगे मिला-मिसा करा। 21 जोन पाप ले अनजान रये, हुनी के हुन आमचो काजे पाप ठेबालो कि आमी हुन थाने होऊन भाती माहापुरू चो धारमिकता बनुन जाऊं। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation