2 कुरिन्थियो 4 - Halbi

नगतखबर चो उजर

¹ ऐईकाजे जिदलदाय आमचो उपरे असन दया होली कि आमके ऐ सेवा मिरली, तेबे आमी हिम्मत नी छांडु।

² मान्तर आमी लाज चो गुपत काममन के तियागुन दिलु, आउर ना चलाक ले चलु आंव आउर ना माहापुरू चो बचन ने मिलावट करू आंव; मान्तर सत के परकट करून, माहापुरू चो पुरे हरकोनी माने चो बिबक ने आपलो भलाई बसाऊ आत।

³ मान्तर अगर आमचो नगतखबर थाने परदा पढ़ली से, तो ऐ नष्ट होतो बितामन चो काजे पढ़ली से।

⁴ आउर हुन बिश्वासिमन काजे, जेचो अकल ऐ संवसार चो ईश्पर आन्दा करून दिलो से, बल्ले मसीह जोन माहापुरू चो सवरूप आय, हुनचो तेजमय नगतखबर चो उजर हुनमन उपरे नी बरो।

⁵ कसनबल्लोने आमी आपन चो नाई, मान्तर मसीह ईशु चो परचार करू आंव कि हुन परबु आय; आउर आपलो बारे ने ऐ बोलु आंव कि आमी ईशु चो लागुन तुमचो सेवक आंव।

⁶ ऐईकाजे कि माहापुरू ची आय, जोन बल्लो, “अंधार थानले उजर बरो,” आउर हुनी आमचो मन-मन ने बरली कि माहापुरू चो महिमा चो पयचान चो उजर ईशु मसीह चो थोमना ले उजर होओ।

माटी चो भण्डवामन ने धन

⁷ मान्तर आमचो लगे हुन धन माटी चो भण्डवामन ने संगालोर आसे कि ऐ असीम सामरत आमचो बाटले नाई, मान्तर माहापुरू चो बाटले ठेबो।

⁸ आमी चारो बाटले कलेश तो भोगु आंव, मान्तर संकट ने नी पडु; निरूपाय तो आंव, मान्तर मुरमुरा नी होऊं;

⁹ कन्दराया तो जाऊ आंव, मान्तर तियागा नी जाऊं; घसराया तो जाऊ आंव, मान्तर नष्ट नी होऊं।

¹⁰ आमी ईशु चो मरना के आपलो देंह ने हर समया धरून फिरू आंव कि ईशु चो जीवना बले आमचो देंह ने परकट होओ।

¹¹ कसनबल्लोने आमी जीवता-जीवता हरमेशा ईशु चो लागुन मरना चो हाथ ने सोपा जाऊ आंव कि ईशु चो जीवना बले आमचो मरनहार देंह ने परकट होओ।

¹² ऐ परकार मरना तो आमचो उपरे असर डालु आय आउर जीव तुमचो उपरे।

¹³ ऐईकाजे कि आमचो थाने हुनी बिश्वास चो आत्मा आसे, जेचो बारे ने लिकलोर आसे, “मय बिश्वास करले, ऐईकाजे मय बल्ले।” आउर आमी बले बिश्वास करू आंव, ऐईकाजे बोलु आंव।

¹⁴ कसनबल्लोने आमी जानु से कि जोन परबु ईशु के जिआलो, हुनी आमके बले ईशु ने भागी जानुन भाती जिआय दे, आउर तुमचो संगे आपलो पुरे हाजिर करेदे।

¹⁵ कसनबल्लोने सपाय तीजमन तुमचो काजे आय, बल्ले अनुग्रह खुबेमन चो दुवारा खुबे होऊन भाती माहापुरू चो महिमा चो काजे धन्यबाद बले बड़ाओ।

¹⁶ ऐईकाजे आमी हिम्मत नी छांडु; अगर आमचो बाहरी मानेरूप नष्ट होते जाऊ आय तेबले बले आमचो भीतरी मानेरूप दिन-दिन नवा होते जाऊ आय।

¹⁷ कसनबल्लोने आमचो डण्डिक चो खिन्डिक असन कलेश आमचो काजे खुबे ची जरूरी आउर अमर महिमा उपजास करते जाऊ आय;

¹⁸ आउर आमी तो दकलो बिती तीजमन के नाई मान्तर नी दकलो बिती तीजमन के दकते रऊ आंव; कसनबल्लोने दकलो बिती तीजमन खिन्डिक ची दिन चो आय, मान्तर नी दकलो बिती तीजमन हरमेशा बनुन रऊ आय।