2 कुरिन्थियो 3 - Halbi

मसीही जिन्दा चिठ्ठी

¹ काय आमी फेर आपलो बड़ाई करूक मुरयालु? नाहले आमके दुसर लोगमन चो असन गुहार चो चिठ्ठीमन तुमचो लगे आनतोर नाहले तुमचो ले धरतोर आय?

² आमचो चिठ्ठी तुमी ची आहास जोन आमचो मन थाने लिकलोर आसे आउर हुनके सपाय माने चिताऊ आत आउर पढु आत।

³ ऐ परकट आय कि तुमी मसीह चो चिठ्ठी आस, जोन के आमी सेवा करूमन चो असन लिकलु, आउर जोन सीआई ले नाई मान्तर जीवता माहापुरू चो आत्मा ले, पकना चो पटटीमन थाने नाई, मान्तर मन चो मास रूपी पट्टीमन थाने लिकलोर आसे।

पौलुस चो बल

⁴ आमी मसीह चो बाटले माहापुरू चो उपरे असने ची भरसा संगाऊ आंव।

⁵ ऐ नाई कि आमी आपन खुद ले ऐ लायक आंव कि आपलो बाटले कोनी गोठ चो बिचार करूक सकवां, मान्तर आमचो लायकता माहापुरू चो बाटले आय,

⁶ जोन आमके नवा बायदा चो सेवक होतोर लायक बले करलो, शब्द चो सेवक नाई मान्तर आत्मा चो; कसनबल्लोने शब्द मारू आय, मान्तर आत्मा जिआऊ आय।

नवा बायदा चो महिमा

⁷ अगर मरना चो हुन बायदा जेचो अखर पकनामन थाने गोदलोर रये, ऐथा ले तेजमय होली कि मूसा चो मुंह थानचो तेज चो कारन जोन घटते बले जाते रये, इस्राएल हुनमन चो मुंह थाने नंजराऊक नी सकते रवत,

⁸ तेबे आत्मा चो बायदा आउर बले तेजमय केंव नी होये दे?

⁹ कसनबल्लोने जिदलदाय दोषी ठेबातो बिती बायदा तेजमय रली, तेबे धरमी ठेबातो बिती बायदा आउर बले तेजमय केंव नी होये दे?

¹⁰ आउर जोन तेजोमय रली, हुन बले हुन तेज चो कारन जोन हुनचो ले बडुन भाती तेजमय रली, काई तेजमय नी ठेबली।

¹¹ कसनबल्लोने जिदलदाय हुन जोन घटते जाते रये तेजमय रली, तेबे हुन जोन थीर रये दे आउर बले तेजमय केंव नी होये?

¹² ऐईकाजे असन आशा संगाऊन भाती आमी हिम्मत चो संगे बोलु आंव,

¹³ आउर मूसा चो असन नाई, जोन आपलो मुंह थाने परदा ढापु रलो बल्ले इस्राएली हुन घटतो बिती तेज चो सरासरी के नी दकोत।

¹⁴ मान्तर हुनमन बया होऊन गेला, कसनबल्लोने आजी ले जुना नियम पढ़तो समया हुनमन चो मनमन थाने हुनी परदा पढु रऊ आय, मान्तर हुन मसीह ने उठून जाऊ आय।

¹⁵ आजी ले जिदलदाय केबीई मूसा चो किताब पढ़ा जाऊ आय, तेबे हुनमन चो मन थाने परदा पडु रऊ आय।

¹⁶ मान्तर जिदलदाय केबीई हुनमन चो मन परबु चो बाटे फिरे दे, तेबे हुन परदा उठून जाय दे।

¹⁷ परबु तो आत्मा आय: आउर जाहांय बले परबु चो आत्मा आसे हुता छुटछाड़ा आसे।

¹⁸ मान्तर जिदलदाय आमी सपाय चो उगाढ़लोर मुंह ले परबु चो तेज असन परकार परकट होऊ आय, जोन परकार दरपन ने, तेबे परबु चो बाटले जोन आत्मा आसे, आमी हुनी तेजमय रूप ने भाग-भाग करून बदलते जाऊ आंव।