2 कुरिन्थियो 2 - Halbi

आपलो मया के जानतोर

¹ मय आपलो मन ने ऐ ठानु रयें कि फेर तुमचो लगे मुर-मुरा करूक नी ऐयें।

² कसनबल्लोने अगर मय तुमके मुर-मुरा करेंदे, तो मोके हरिक देतो बिता कोन होयेदे, मात्र हुनी जेके मय मुर-मुरा करले?

³ आउर मय ऐ गोठ तुमके ऐईकाजे लिकले कि काहांय असन नी होओ कि मोचो ईलो ने, जेचो ले मोके हरिक मिरतोर आसे मय हुनचो ले मुर-मुरा होयेंदे; कसनबल्लोने मोके तुमी सपाय उपरे ऐ गोठ चो भरसा आसे कि जोन मोचो हरिक आय, हुनी तुमी सपाय चो बले आय।

⁴ बड़े कलेश आउर मन चो कष्ट ले मय खुबे असन आँसु बहाऊन-बहाऊन भाती तुमके लिकु रयें, ऐईकाजे नाई कि तुमी मुर-मुरा हुआ मान्तर ऐईकाजे कि तुमी हुन बड़े मया के जाना, जोन मोके तुमचो ले आसे।

पापी के छमा

⁵ अगर कोनी मुर-मुरा करला से, तो मोके ची नाई मान्तर (कि हुनचो संगे खुबे कड़क नी करें) खिन्डिक-खिन्डिक तुमी सपाय के बले मुर-मुरा करलो से।

⁶ असन जन चो काजे ऐ डण्ड जोन भाईमन थानले खुबेमन दिला खुबे आय।

⁷ ऐईकाजे ऐचो ले नुकु ऐ आय कि हुनचो अपराध के छमा करा आउर शान्ति दिआस नी होओ कि असन माने खुबे मुर-मुरा ने बुडून जाओ।

⁸ ऐ कारन मय तुमके बिनती करें से कि हुनके आपलो मया चो सबुत दिआस।

⁹ कसनबल्लोने मय ऐईकाजे बले लिकुन रयें कि तुमके परकेदें कि तुमी मोचो सपाय गोठमन के मानतो काजे तिआर आसास कि नाई।

¹⁰ जेचो तुमी काई छमा करू आस हुनके मय बले छमा करू आंय, कसनबल्लोने मय बले जोन काई छमा करले से, अगर करले से, तो तुमचो कारन मसीह चो जगा ने होऊन भाती छमा करलो से।

¹¹ कि शयतान चो आमचो उपरे दाँव नी चलो, कसनबल्लोने आमी हुनचो चालमन ले अनजान निआव।

मकिदुनिया चो काजे यातरा

¹² जिदलदाय मय मसीह चो नगतखबर सुनातो काजे त्रोआस ईले, आउर परबु मोचो काजे गोटक कपाट उगाढुन दिलो,

¹³ तेबे मोचो मन ने आराम नी मिरली, ऐईकाजे कि मय आपलो भाई तीतुस के नी पावले; ऐईकाजे हुनमन ले बिदा होऊन मय मकिदुनिया ने जाते गेले।

मसीही सेवक-जीवना चो बास

¹⁴ मान्तर माहापुरू चो धन्यबाद होओ जोन मसीह ने सदा आमके जय चो हरिक ने धरून फिरू आय, आउर आपलो गिआन चो बास आमचो बाटले हर जगा फयलाऊ आय।

¹⁵ कसनबल्लोने आमी माहापुरू चो लगे मुक्ति पावतो बितामन आउर नाश होतो बितामन दुनो चो काजे मसीह चो बास आंव।

¹⁶ कितलो चो काजे तो मरना चो कारन मरना गंद, आउर कितलो चो काजे जीव चो कारन जीव चो बास। अच्छा ऐ गोठमन चो लायक कोन आय?

¹⁷ कसनबल्लोने आमी हुन खुबेमन चो असन नाई जोन माहापुरू चो बचन ने मिलावट करू आत; मान्तर मन चो सत ले आउर माहापुरू चो बाटले माहापुरू के हाजिर जानुन भाती मसीह ने बोलु आंव।