2 कुरिन्थियो 13 - Halbi

आखरी जनातोर

¹ अदायं तीसर हार मय तुमचो लगे ऐयें सें: दुय नाहले तीन गोहईमन चो मुंह ले हरकोनी गोठ ठेबाया जाय दे।

² जसन मय जिदलदाय दुसरहार तुमचो संगे रयें, असने ची अदायं लापी रते-रते हुन लोगमन ले जोनमन पयले पाप करला, आउर दुसर सपाय लोगमन ले अदायं पयले ले बोलुन देयें से कि अगर मय फेर ऐयें दें तो नी छांडे,

³ कसनबल्लोने तुमी तो ऐचो सबुत चाहायसास कि मसीह मोचो थाने बोलु आय, जोन तुमचो काजे कमजोर नुआय मान्तर तुमीमन ने सामरती आय।

⁴ हुन कमजोरी चो लागुन कुरूस उपरे चेगाया गेलो, तेबले बले माहापुरू चो सामरत ले जीव आसे। आमी बले हुन थाने कमजोर आंसु, मान्तर माहापुरू चो सामरत ले जोन तुमचो काजे आसे, हुनचो संगे जिऊन्दे।

⁵ आपन खुद के परका कि बिश्वास ने आसास कि नाई। आपन खुद के जाचा। काय तुमी आपलो बारे ने ऐ नी जानास कि ईशु मसीह तुमचो ने आसे? नी होले तुमी जाच ने ठग निकरलासास।

⁶ मान्तर मोचो आशा आसे कि तुमी जाना से कि आमी ठग नुआवं।

⁷ आमी आपलो माहापुरू ले ऐ पारथना करूं से कि तुमी कोनी खराप नी करा ऐईकाजे नाई कि आमी चंट दका पडु, मान्तर ऐईकाजे कि तुमी अच्छा करा, भले आमी ठग ची ठेबवां।

⁸ कसनबल्लोने आमी सत चो बिरूद ने काई करूक नी सकु, मान्तर सत चो काजे ची करूक सकु आंव।

⁹ जिदलदाय आमी कमजोर आंसु आउर तुमी बलवन्त हुआ, तेबे आमी हरिक होऊ आंव, आउर ऐ पारथना बले करू आंव कि तुमी सिद्ध होऊन जाआ।

¹⁰ ऐ कारन मय तुमचो पाट पाटे ऐ गोठमन लिकें से, कि हाजिर होऊन भाती मोके हुन अधिकार चो अनुसार जेके परबु नशातो काजे नाई मान्तर बनातो काजे मोके दिलो से, कड़ाई ले काई करूक नी पड़ो।

शुभकामना आउर आशिर्बाद

¹¹ आउर हे भाईमन, हरिक राआ; सिद्ध बनते जाआ; हिम्मत संगाआ; गोटक ची मन संगाआ; मिलुन राआ। आउर मया आउर शान्ति चो देतो बिता माहापुरू तुमचो संगे रये दे।

¹² गोटक दुसर के पवितर चुमा ले जुहार करा।

¹³ सपाय पवितर लोग तुमके जुहार बोल सोत।

¹⁴ परबु ईशु मसीह चो अनुग्रह आउर माहापुरू चो मया आउर पवितर आत्मा चो भागीदारी तुमी सपाय चो संगे होते रओ।