2 कुरिन्थियो 12 - Halbi

पौलुस के दिव्य दरशन

¹ मान्तर घमण्ड करतोर मोचो काजे ठीक नुआय तेबले बले करूक पडु आय; ऐईकाजे मय परबु चो दिलो बिती दरशनमन आउर परकाशनमन के चरचा करें दें।

² मय मसीह ने गोटक माने के जाने; चवदा बरक होली कि नी जाने देंह संगे, नी जाने देंह संगे, माहापुरू जाने से; असन माने तीसर सरग लगले उठाऊन निया गेलो।

³ मय असन माने के जाने नी जाने देंह संगे, नी जाने देंह संगे माहापुरू ची जाने।

⁴ कि सरग लोग थाने उठाऊन निया गेलो, आउर असन गोठमन सुनले जोन बोलतोर नुआय; आउर जेचो मुंह थाने आनतोर माने के नगत नुआय।

⁵ असन माने उपरे तो मय घमण्ड करें दें, मान्तर आपलो उपरे आपली कमजोरी के छांडुन, आपलो बारे ने घमण्ड नी करें दें।

⁶ कसनबल्लोने अगर मय घमण्ड करतोर चाहायें दे बले तेबे मुरक नी होयें दे, कसनबल्लोने सते बलें दे; तेबले बले ठेबुन जाऊँ आंय, असन नी होओ कि जसन कोनी मोके दकु आय नाहले मोचो ले सुनु आय, मोके हुनचो ले बडुन समजा।

देंह ने काटा

⁷ ऐईकाजे कि मय परकाशनमन चो खुबे होलो ने फुलुन नी जायें, मोचो देंह ने गोटक काटा गड़ाया गेली, बल्लोने शयतान चो गोटक दूत चो मोके ठुसा मारोत बल्ले मय फुलुन नी जाए।

⁸ ऐचो बारे ने मय परबु ले तीन हार बिनती करले कि मोचो ले ऐ दूर होऊन जाओ।

⁹ मान्तर हुन मोचो ले बल्लो, “मोचो अनुग्रह तुचो काजे खुबे आसे; कसनबल्लोने मोचो सामरत कमजोरी ने सिद्ध होऊ आय।” ऐईकाजे मय बड़े हरिक ले आपलो कमजोरीमन थाने घमण्ड करें दें कि मसीह चो सामरत मोचो उपरे छांई होते रओ।

¹⁰ ऐई कारन मय मसीह चो काजे कमजोरीमन ने, आउर निन्दामन ने, आउर दरिदरता ने, आउर उपद्रव ने, आउर संकटमन ने हरिक आंसे; कसनबल्लोने जिदलदाय मय कमजोर होऊँ आंय तेबे बलवन्त होऊ आंय।

गोटक पठालोबिता चो गुन

¹¹ मय मुरूक तो बनले, मान्तर तुमी ची मोके ऐ करतो काजे मजबूर करलास। तुमी तो मोके सहरातोर रली, कसनबल्लोने मान्तर मय काई बले नुआय, तेबले बले हुन बड़े ले बड़े पठालोबितामन ले कोनी गोठ ने कम नुआय।

¹² पठालोबितामन चो चिना बले तुमचो मंजी सपाय परकार चो धीरज संगे चिनामन, आउर भयंकर काममन, आउर सामरत चो काममन दकाया गेली।

¹³ तुमी कोन असन गोठ ने दुसर कलीसियामन ले कम राआस, मात्र ऐ थाने कि मय तुमचो उपरे आपलो भार नी डालले मोचो ऐ अनियाय छमा करा।

कलीसिया काजे मया

¹⁴ दका, मय तीसर हार तुमचो लगे ऐतो काजे तिआर आंसे, आउर मय तुमचो उपरे काई भार नी संगाये, कसनबल्लोने मय तुमचो धनमाल नाई मान्तर तुमके ची चाहाऊं आंय। कसनबल्लोने पिला-झिला के आया-बुआ चो काजे धन रूंड़ा नी करतोर आय, मान्तर आया-बुआ के पिलाझिला चो काजे।

¹⁵ मय तुमचो आत्मामन काजे खुबे हरिक ले खरचा करें दें, मान्तर खुद बले खरचा होऊन जायें दें। काय जितरो बडुन भाती मय तुमचो ले मया संगाऊ आंय, हुतली ची घटुन भाती तुमी मोचो ले मया संगाआ से?

¹⁶ असन होऊक सके कि मय तुमचो उपरे बोजा नी डालले, मान्तर चलाकी ले तुमके ठगुन भाती फासुन दिले!

¹⁷ नुकु, जोनमन के मय तुमचो लगे पठाले, काय हुनमन थानले कोचीई बाटले मय छंद करून तुमचो ले काई धरले?

¹⁸ मय तीतुस के समजाऊन भाती हुनचो संगे हुन भाई के पठाले, तेबे काय तीतुस छंद करून तुमचो ले काई धरलो? काय आमी गोटक ची आत्मा चो चलालोर नी चललु? काय गोटक ची बाट थाने नी चललु?

¹⁹ तुमी ऐबले समजेसास होती कि आमी तुमचो पुरे जबाप उपरे जबाप देऊँ से। आमी तो माहापुरू के हाजिर जानुन भाती मसीह ने बोलु से, आउर हे लाड़रामन, सपाय गोठमन तुमचो उन्नती चो काजे बोलूं से।

²⁰ कसनबल्लोने मोके डर आसे, काहांय असन नी होओ कि मय ऐऊन भाती जसन चाहें से, हुसन तुमके नी पायें; आउर मोके बले जसन तुमी नी चाहस हुसनी ची पाहा; आउर तुमीमन ने झगड़ा, डाह, रीस, बिरूद, इरका, खुद, घमण्ड आउर झनझट होओ;

²¹ आउर काहांय असन नी होओ कि मोचो माहापुरू मोचो फेर ले तुमचो थाने ऐ तो काजे मोचो उपरे दबाव डालो आउर मोके खुबेमन चो काजे फेर दुक करूक पड़ो, जोनमन पयले पाप करू रओत आउर अशुद्ध काम आउर बेबीचार आउर ढीलाढाला ले, जोन हुनमन करला, मन नी फिराला।