2 कुरिन्थियो 10 - Halbi

आत्मिक लड़ीई

¹ मय हुनी पौलुस जोन तुमचो पुरे सोज आंय मान्तर पाट पाटे तुमचो बाटे साआस करू आंय, तुमके मसीह चो नम्रता आउर कोमलता चो कारन समजायें से।

² मय ऐ बिनती करें से कि तुमचो पुरे मोके निरभय होऊन भाती साआस करूक नी पड़ो, जसन मय कितलो लोगमन थाने जोन आमके देंह चो अनुसार चलतो बितामन समजु आत, साआस दकातोर चो बिचार करू आंय।

³ कसनबल्लोने अगर आमी देंह ने चलूं से फिरूं से, तेबले बले देंह चो अनुसार नी लडु।

⁴ कसनबल्लोने आमचो लड़ीई चो हत्यार शारीरिक नुआय, मान्तर गढ़मन के घसरातो काजे माहापुरू चो दुआरा सामरती आय।

⁵ ऐईकाजे आमी कलपनामन चो आउर हरकोनी ऊँचा गोठ चो, जोन माहापुरू चो पयचान चो बिरूद ने उठु आय, खंडन करू आत, आउर हरकोनी भावना के कयद करून मसीह चो हुकुम मानु बनान देऊ आंव,

⁶ आउर तिआर रऊ आंव कि जिदलदाय तुमचो हुकुम मानतोर पुरा होऊन जाओ, तेबे हरकोनी परकार चो हुकुम नी मानतोर के डण्ड दे ओत।

पौलुस चो अधिकार

⁷ तुमी हुनी गोठमन के दका, जोन आँईक चो पुरे आसे। अगर कोनी के आपलो उपरे ऐ भरसा होओ कि मय मसीह चो आंय, तेबे हुन ऐ बले जानो कि जसन हुन मसीह चो आय असने ची आमी बले आंव।

⁸ कसनबल्लोने अगर मय हुन अधिकार चो बारे ने आउर बले घमण्ड दकायें दे, जोन परबु तुमके नशातो काजे नाई मान्तर बनातो काजे आमके दिलो से, तेबे लाज नी होयें।

⁹ ऐ मय ऐईकाजे बलें सें कि चिठ्ठीमन चो दुवारा तुमके डरातो बिता नी ठेबें।

¹⁰ कसनबल्लोने हुनमन बोलु आत, “हुनचो चिठ्ठीमन गंभीर आउर असरदार आय; मान्तर जिदलदाय हुन पुरे होऊ आय, तेबे हुन देंह चो कमजोरी आउर जबापदारी ने उसास जान पडु आय।”

¹¹ जोन असन बोलु आय, हुन ऐ समजुन संगा ओ कि जसन पाट-पाटे चिठ्ठीमन ने आमचो बचन आसे, असने ची तुमचो पुरे आमचो काम बले होये दे।

पौलुस चो अधिकार चो संदी

¹² कसनबल्लोने आमके ऐ साआस निआय कि आमी आपन खुद के हुनमन चो संगे गेनु, नाहले हुनमन संगे आपन के मिसाऊं, जोन आपलो बड़ाई खुद करू आत, आउर आपन खुद के आपस ने नापुन तवलुन भाती गोटक दुसर ले मिलान करून मुरक ठेबु आत।

¹³ आमी तो संदी ले बाहरे घमण्ड केबीई नी करूं, मान्तर हुनी संदी तक जोन माहापुरू आमचो काजे ठेबाऊन दिलो से, आउर हुन थाने तुमी बले ऐऊन गेलासास, आउर हुनचेई अनुसार घमण्ड बले करवां।

¹⁴ कसनबल्लोने आमी आपलो संदी ले बाहरे आपन खुद के बड़ाऊक नी चाहाऊं, जसन कि तुमचो लगले नी अमरतोर हाल ने होते, मान्तर मसीह चो नगतखबर सुनाते-सुनाते तुमचो लगले अमरून चुकलु से।

¹⁵ आमी संदी ले बाहरे दुसर चो मसागत थाने घमण्ड नी करूं; मान्तर आमके आशा आसे कि जसन-जसन तुमचो बिश्वास बाड़ते जाय दे असने-असने आमी आपलो संदी चो अनुसार तुमचो लागुन आउर बले बड़ते जांवा।

¹⁶ बल्ले आमी तुमचो संदी ले पुरे बडुन भाती नगतखबर सुनाऊ, आउर ऐ नाई कि आमी दुसरमन चो संदी चो भीतरे बने बुनालो काममन थाने घमण्ड करूं।

¹⁷ मान्तर जोन घमण्ड करो, हुन परबु उपरे घमण्ड करो।

¹⁸ कसनबल्लोने जोन आपलो बड़ाई करू आय हुन नाई, मान्तर जेचो बड़ाई परबु करू आय, हुनी गरहन करा जाऊ आय।