2 कुरिन्थियो 1 - Halbi

जुहार

¹ पौलुस चो बाटले जोन माहापुरू चो इच्छा ले मसीह ईशु चो पठालोबिता आय। आउर भाई तीमुथियुस चो बाटले ले माहापुरू चो हुन कलीसिया चो नाव, जोन कुरिन्थुस ने आसे आउर सपाय अखाया चो सपाय पवितर लोगमन चो नाव:

² आमचो बुआ माहापुरू आउर परबु ईशु मसीह चो बाटले तुमके अनुग्रह आउर शान्ति मिरते रओ।

शान्ति चो माहापुरू

³ आमचो परबु ईशु मसीह चो माहापुरू आउर बुआ चो धन्यबाद होओ, जोन दया चो बुआ आउर सपाय परकार चो शान्ति चो माहापुरू आय।

⁴ हुन आमचो सपाय कलेशमन ने शान्ति देऊ आय; बल्ले आमी हुन शान्ति चो लागुन जोन माहापुरू आमके देऊ आय, हुनमन के बले शान्ति देऊक सकु जोन कोनी परकार चो कलेश ने आसोत।

⁵ कसनबल्लोने जसन मसीह चो दुखमन ने आमी खुबे शामिल होऊ आंव, असने ची आमी शान्ति ने बले मसीह चो लागुन खुबे शामिल होऊ आंव।

⁶ अगर आमी कलेश पाऊ आंव, तेबे ऐ तुमचो शान्ति आउर मुक्ति चो काजे आय; आउर अगर शान्ति पाऊ आंव, तो ऐ तुमचो शान्ति चो काजे आय; जेचो असर ले तुमी धीरज चो संगे हुन कलेशमन के सहु आहास, जोनमन के आमी बले सऊं आंव।

⁷ आमचो आशा तुमचो बारे ने जमखम आय; कसनबल्लोने आमी जानु से कि तुमी जसन आमचो दुखमन ने, असने ची शान्ति ने बले शामिल हुआ।

दुक ले बचालो

⁸ हे भाईमन आमी नी चाहाऊं कि तुमी आमचो हुन कलेश ले अनजान राआ जोन आसिया ने आमचो उपरे पढ़ली; आमी असन खुबे बोजा ले चेपाय होऊन रऊं, जोन आमचो सामरत ले बाहरे रये, ऐ थानले कि आमी जीवना ले बले हाथ धोऊन बसु रलु।

⁹ मान्तर आमीमन आपलो मन ने समजुन रऊ कि आमचो उपरे मरना चो हुकुम होऊन चुकली से, बल्ले आमी आपलो भरसा नी संगाऊ मान्तर माहापुरू चो जोन मरलो बितामन के जिआलो से।

¹⁰ हुनी आमके मरना चो असन बड़े संकट ले बचालो, आउर बाचाये दे; आउर हुनचो उपरे आमचो ऐ आशा आसे कि हुन पयले बले बचाते रयदे।

¹¹ तुमी बले मिसुन भाती पारथना चो बाटले आमचो सायता करा से कि जोन बर खुबेमन चो लागुन आमके मिरली, हुनचो लागुन खुबे लोग आमचो बाटले धन्यबाद करोत।

शुद्ध बिबक

¹² कसनबल्लोने आमी आपलो बिबक चो ऐ गोहई थाने घमण्ड करूं से, कि जगत ने आउर खास करून तुमचो मंजी, आमचो गुन माहापुरू चो लायक असन पवितरता आउर सत संगे रये, जोन शारीरिक गिआन ले नाई मान्तर माहापुरू चो अनुग्रह चो संगे रये।

¹³ आमी तुमके आउर काई नी लिकुं, मात्र हुन जोन तुमी पडु आहास आउर मानु बले आहास, आउर मोके आशा आसे कि आखरी ले बले मानते राआसे।

¹⁴ जसन तुमीमन ले कितलोमन मानला सोत आमी तुमचो घमण्ड चो कारन आंव, असने ची तुमी बले परबु ईशु चो दिने आमचो काजे घमण्ड चो कारन ठेबासे।

¹⁵ ऐई भरसा ले मय चाहते रयें कि पयले तुमचो लगे ऐयें दें कि तुमके गोटक आउर दान मिरो;

¹⁶ आउर तुमचो लगले होऊन भाती मकिदुनिया ने जायें, आउर फेर मकिदुनिया ले तुमचो लगे ऐयें दें; आउर तुमी मोके यहूदिया चो बाटे खिन्डिक दूर ले पहुँचाआ।

¹⁷ “ऐईकाजे मय जोन ऐ इच्छा करू रयें तो काय मय उबागरी दकाले? नाहले जोन करतोर चाहायें से काय देंह चो अनुसार करतोर चाहायें से कि मय गोठ ने ‘हव, हव’ बले करें दें आउर ‘नाई-नाई’ बले करेंदे?

¹⁸ माहापुरू बिश्वास लायक गवा आय कि आमचो हुन बचन ने जोन तुमचो ले बल्लो ‘हव’ आउर ‘नाई’ दुनो नी पाया जाओत।

¹⁹ “कसनबल्लोने माहापुरू चो बेटा ईशु मसीह जेचो आमचो बाटले बल्लोने मोचो आउर सिलवानुस आउर तीमुथियुस चो बाटले तुमचो मंजी ने परचार होली, हुन थाने ‘हव’ आउर ‘नाई’ दुनो नी रये, मान्तर हुन थाने ‘हव’ ची ‘हव’ होली।

²⁰ कसनबल्लोने माहापुरू चो जितरो बायदामन आसे, हुन सपाय हुनी थाने ‘हव’ चो संगे आसे। ऐईकाजे हुनचो बाटले आमीन बले होली कि आमचो बाटले माहापुरू चो महिमा होओ।”

²¹ आउर जोन आमके तुमचो संगे मसीह ने जमखम करू आय, आउर जोन आमचो अभिषेक करलो हुनी माहापुरू आय,

²² जोन आमचो उपरे छाप बले करून दिलो से आउर बयाना ने आत्मा के आमचो मन मन ने दिलो।

²³ मय माहापुरू के गोहई करून बलेंसें कि मय ऐबे ले कुरिन्थुस ने ऐईकाजे नी ईले, कि मोके तुमचो उपरे तरस ऐते रये।

²⁴ ऐ नाई कि आमी बिश्वास चो बारे ने तुमचो उपरे परभुता जतातोर चाहाऊं से; मान्तर तुमचो हरिक ले सायक आय कसनबल्लोने तुमी बिश्वास ची ले थीर रऊ आस।