1तीमुथियुस 4 - Halbi

फंदी उपदेश देऊ मन ले खबड़दार

¹ मान्तर आत्मा छुकछुका ले बले से कि ऐतो बिती समयामन ने कितलो लोग भरमातो बिती आत्मामन, आउर दुष्टआत्मामन चो सिक्यामन थाने मन लगाऊन भाती बिश्वास ले भहकुन जादे।

² ऐ हुन फंदी मानेमन चो कपट चो लागुन होये दे, जेचो बिबक माना जरतो बिती लुआ ले दागा गेलीसे,

³ जोन बिहा करतोर ले ठेबा दे, आउर भोजन चो काई तीजमन ले अनजान रतोर हुकुम देदे, जोनमन के माहापुरू ऐईकाजे बनालो कि बिश्वासी आउर सत चो चिता तो बितामन हुनमन के धन्यबाद चो संगे खाओत।

⁴ कसनबल्लोने माहापुरू चो बनालो बिती हरकोनी तीज अच्छा आय, आउर कोनी तीज अस्वीकार करतोर लायक नुआय; मान्तर ऐ कि धन्यबाद चो संगे खाया जाओ,

⁵ कसनबल्लोने माहापुरू चो बचन आउर पारथना चो दुवारा शुद्ध होऊन जाऊ आय।

⁶ अगर तुय भाईमन के ऐ गोठमन चो सुद्धि दिआते रसे, तो मसीह ईशु चो अच्छा सेवक ठेब से; आउर बिश्वास आउर हुन अच्छा उपदेश चो गोठमन ले, जोन तुय मानते ईली सीस, तुचो पालन पोषन होते रयदे।

⁷ मान्तर अशुद्ध आउर डोकरीमन चो असन कहनीमन ले अलग रा; आउर भक्ति चो साधना कर।

⁸ कसनबल्लोने देंह चो साधना ले कम लाब होऊ आय, मान्तर भक्ति सपाय गोठमन चो काजे लाब दायक आय, कसनबल्लोने ऐ समया चो आउर ऐतो बिती जीवना चो बले बायदा ऐचीई काजे आय।

⁹ ऐ गोठ सत आउर हर परकार ले मानतो लायक आय।

¹⁰ कसनबल्लोने आमी मसागत आउर कोशिश ऐईकाजे करूं आंव कि आमचो आशा हुन जीवता माहापुरू थाने आसे, जोन सपाय मानेमन चो आउर नीज करून बिश्वासीमन चो मुक्तिकरू आय।

¹¹ ऐ गोठमन चो हुकुम देस आउर सिकाते रा।

सेवा थाने धिआन संगातोर

¹² कोनी तुचो जुआनी के तुच्छ नी समजुक पाओत; मान्तर बचन, आउर चाल चलन, आउर मया, आउर बिश्वास, आउर पवितरता ने बिश्वासीमन चो काजे नमूना बनुन जा।

¹³ जिदलदाय ले मय नी ऐये, हुदलदाय ले पढ़तोर आउर उपदेश देतोर आउर सिकातो ने मतभुल रा।

¹⁴ हुन बर चो परति जोन तुचो थाने आसे, आउर अगम गोठ चो दुवारा सियानमन चो हाथ संगातो समया तुके मिरू रये, बेफिकर नी रा।

¹⁵ ऐ गोठमन के बिचारते रा आउर ऐ थाने आपलो धिआन लगाऊन रा, बल्ले तुचो उन्नती सपाय थाने परकट होओ।

¹⁶ आपलो आउर आपलो उपदेश के तिआर संगाऊन। ऐ गोठमन थाने थीर रा, कसनबल्लोने अगर असन करते रसे तो तुय आपलो आउर आपलो सुनतो बितामन चो काजे बले मुक्ति चो कारन होसे।