1तीमुथियुस 2 - Halbi

सपाय काजे पारथना

¹ अदायं मय सपाय ले पयले ऐ गुहार करें से कि गुहार, आउर पारथना, आउर गुहार, आउर धन्यबाद सपाय मानेमन चो काजे कराय जाओ।

² राजामन आउर सपाय ऊँचा पन बितामन चो लागुन ऐईकाजे कि आमी आराम आउर असतीर चो संगे सपाय भक्ति आउर गमभीरता ले जीवना बिताऊ।

³ ऐ आमचो मुक्तिकरू माहापुरू के अच्छा लागु आय आउर भाऊ बले आय,

⁴ जोन ऐ चाहाऊं आय कि सपाय मानेमन चो मुक्ति होओ, आउर हुनमन सत के नुकु-नुकु चिता ओत।

⁵ कसनबल्लोने माहापुरू गोटकी ची आय, आउर माहापुरू आउर मानेमन चो मंजी ने बले गोटकी ची मंजीमन्या आय, बल्लोने मसीह ईशु जोन माने आय।

⁶ जोन आपन खुद के सपाय चो छुटकारा चो दाम ने देऊन दिलो, आउर हुनचो गोहई ठीक समया थाने दियाय गेली।

⁷ मय सत बलेंसें, झूठ नी बोलें कि मय ऐई बिचार ले परचारक आउर पठालोबिता आउर दुसर जातिमन चो काजे बिश्वास आउर सत चो उपदेशक ठेबाय गेलो।

कलीसियामन ने बायले लेकी आउर माने के समजातोर

⁸ ऐईकाजे मय चाहायें से कि हर जगा माने, बिना रीस आउर झगड़ा चो पवितर हाथमन के उठाऊन भाती पारथना करोत।

⁹ असने ची बायले लेकीमन बले संका आउर सहन चो संगे कायसुन्दर फटीईमन ले आपन खुद के सजा ओत; ना कि केश गाततोर आउर सोना आउर मोतीमन आउर खुबे मोल फटीईमन ले,

¹⁰ मान्तर अच्छा काममन ले, कसनबल्लोने माहापुरू चो भक्ति करतो बिती बायले लेकीमन के ऐई अच्छा बले आय।

¹¹ बायले लेकी के ओगाय पुरा अधीन ले सिकतोर जरूरी आय।

¹² मय बलेंसें कि बायले लेकी ना उपदेश करोत आउर ना माने उपरे हुकुम चला ओत, मान्तर ओगाय रओत।

¹³ कसनबल्लोने आदम पयले, हुनचो पाचे हव्वा बनाय गेली;

¹⁴ आउर आदम बयकाया नी गेलो, मान्तर बायले लेकी दुसर चो गोठ ने ऐऊन भाती अपराधिन होली।

¹⁵ तेबले बले बायले लेकी पिला जनमातोर लागुन मुक्ति पायेदे, अगर हुन सहन संगे बिश्वास, मया, आउर पवितरता ने थीर रओ।