1तीमुथियुस 1 - Halbi

शुभकामनामन

¹ पौलुस चो बाटले जोन आमचो मुक्तिकरू माहापुरू आउर आमचो आशा चो आधार मसीह ईशु चो हुकुम ले मसीह ईशु चो पठालोबिता आय,

² तीमुथियुस चो नाव जोन बिश्वास ने मोचो सत बेटा आय: बुआ माहापुरू, आउर आमचो परबु मसीह चो बाटले तुके अनुग्रह, आउर दया आउर शान्ति मिरते रओ।

फंदी सिक्यामन चो बिरूद जनातोर

³ जसन मय मकिदुनिया ने जातो बेरा तुके समजाऊन रये, कि इफिसुस ने रऊन भाती कितलो लोगमन के हुकुम देस कि दुसर परकार चो सिक्या नी देओत,

⁴ आउर हुन कहनीमन आउर अनंत बंसावलीमन थाने मन नी लगा ओत जेचो ले बिवाद होऊ आय, आउर माहापुरू चो हुन जुगाड़ चो अनुसार नाई, जोन बिश्वास थाने टिकला सोत। असने ची फेर बल्ले बलेंसें।

⁵ हुकुम चो सारांश ऐ आय कि शुद्धमन आउर अच्छा बिबक, आउर कपट रहित बिश्वास ले मया उपजास होओ।

⁶ ऐ मन के छांडुन भाती कितलो लोग बकवास चो बाटे भटकुन गेला सोत,

⁷ आउर नियमकारी तो होतोर चाहाय सोत, मान्तर जोन गोठमन बोलु आत आउर जोन के जमखम ले बोलु आत, हुनके समजोत बले नाई

⁸ मान्तर आमी जानु से कि अगर कोनी नियम के अच्छा रीति ले काम ने ऐऊक देस तो हुन अच्छा आय।

⁹ ऐ जानुन भाती कि नियम धरमी जन चो काजे नुआय मान्तर अधरमीमन, निरंगकुसमन, भक्तिहिनमन, पापीमन अपवितर आउर अशुद्ध मानेमन, आया बुआ चो घात करतो बितामन, हत्यारामन,

¹⁰ बेबीचारीमन, माने गामीमन, मानेमन के बिकतो बितामन, झुठ बोलतो बितामन, आउर झूठा किरिया खातो बितामन, आउर ऐ मन के छांडुन खर उपदेश चो सपाय बिरूदीमन चो काजे ठेबाए गेलीसे।

¹¹ ऐई परमधन्य माहापुरू चो महिमा चो हुन नगतखबर चो अनुसार आय जोन मोके सोपाय गेलीसे।

पौलुस चो गोहई

¹² मय आपलो परबु मसीह ईशु चो जोन मोके सामरत दिलो से, धन्यबाद करें से कि हुन मोके बिश्वास लायक समजुन भाती आपलो सेवा चो काजे ठेबालो।

¹³ मय तो पयले निन्दा करतो बिता, आउर कन्दरातो बिता, आउर अंधेर करतो बिता रले; तेबले बले मोचो उपरे दया होली, कसनबल्लोने मय अबिश्वास चो दसा ने बिना समजुन बुजुन ऐ कामकरू रले।

¹⁴ आउर आमचो परबु चो अनुग्रह हुन बिश्वास आउर मया चो संगे जोन मसीह ईशु ने आसे, खुबे ले खुबे होली।

¹⁵ ऐ गोठ सत आउर हर परकार ले बिश्वास लायक आय कि मसीह ईशु पापीमन चो मुक्ति करतो काजे जगत ने ईलो, जोन थाने सपाय ले बड़े पापी मय आंय।

¹⁶ मान्तर मोचो उपरे ऐईकाजे दया होली कि मय सपाय ले बड़े पापी ने ईशु मसीह आपलो पुरा सयनशक्ति दकालो, कि जोन लोग हुनचो उपरे अमर जीवना चो काजे बिश्वास कर दे हुनमन काजे मय गोटक नमूना बने।

¹⁷ अदायं जुग-जुग चो राजा बल्लोने अमर, नी दकलो, गोटक मात्र माहापुरू चो ईजीत आउर महिमा जुग-जुग होते रओ। आमीन।

तीमुथियुस चो जबापदारी

¹⁸ हे बेटा तीमुथियुस, हुन अगम गोठमन चो अनुसार जोन पयले तुचो बारे ने कराय जाऊ रली, मय ऐ हुकुम सोपें सें कि तुय हुनमन चो अनुसार अच्छा लड़ीई के लड़ते रा,

¹⁹ आउर बिश्वास आउर हुन अच्छा बिबक के थामुन रा, जेके दूर करतोर लागुन कितलोमन चो बिश्वास रूपी जाहाज बुडून गेली।

²⁰ हुनीमन थानले हुमिनयुस आउर सिकन्दर आत, जोन के मय शयतान के सोपुन दिले से कि हुनमन माहापुरू चो निन्दा करूक नी सिकोत।