1 थिस्सलुनीकियो 5 - Halbi

दुबारा ऐतो बेरा काजे तिआर राहा

¹ मान्तर हे भाईमन, ऐचो जरूरत नाई कि समयामन आउर कालमन चो बारे ने तुमचो लगे काई लिका जाओ।

² कसनबल्लोने तुमी खुदे ठीक जानास कि जसन राती बेरा चोर ऐऊ आय, असने ची परबु चो दिन बले ऐतो बिती आय।

³ जिदलदाय लोग बोलते रदे, “अच्छा आय, आउर काई डर निआय,” तेबे हुनमन उपरे हटात्रे बिनाश ऐऊन पड़े दे, जसन परकार देंहबारी चो उपरे दुका; आउर हुनमन कोनी रीति ले नी बाचदे।

⁴ मान्तर हे भाईमन, तुमी तो अंधार ने निआस कि हुन दिन तुमचो उपरे चोर चो असन ऐऊन पड़ो।

⁵ कसनबल्लोने तुमी सपाय उजरमन चो पिला आउर दिन चो पिलामन आहास; आमी ना राती चो आव, ना अंधार चो आंव।

⁶ ऐईकाजे आमी दुसरमन चो असन सोहते नी रऊँ, मान्तर चेता आउर खबड़दार रऊँ।

⁷ कसनबल्लोने जोन सोऊ आत हुनमन राती ची दाय सोऊ आत, आउर जोन मतवार होऊ आत हुनमन राती के ची मातु रऊ आत।

⁸ मान्तर आमी जोन दिन चो आंव, बिश्वास आउर मया चो झिलम पिन्दुन भाती आउर मुक्ति चो आशा चो टोप पिन्दुन भाती खबड़दार राहा।

⁹ कसनबल्लोने माहापुरू आमके रीस चो काजे नाई, मान्तर ऐईकाजे ठेबालो से कि आमी आपलो परबु ईशु मसीह चो बाटले मुक्ति परापत करू।

¹⁰ हुन आमचो काजे ऐई कारन मरलो कि आमी भले चेता रऊँ भले सोहते रऊँ, सपाय मिसुन भाती हुनचेई संगे जीऊ।

¹¹ ऐई कारन गोटक दुसर के शान्ति दिआस आउर गोटक दुसर चो उन्नती चो कारन बना, जसन कि तुमी करू बले आहास।

कलीसिया के उपदेश

¹² हे भाईमन, आमी तुमचो ले गुहार करूं से कि जोन तुमनमन ने मसागत करू आत, आउर परबु ने तुमनमन चो अगुवा आत, आउर तुमके सिक्या देऊ आत, हुनमन चो मान करा।

¹³ आउर हुनमन चो काम चो कारन मया चो संगे हुनमन के खुबे ची मान चो लायक समजा। आपस ने मेल मिलाप ले राहा।

¹⁴ हे भाईमन, आमी तुमके समजाऊँ से कि जोन अच्छा चाल नी चलोत हुनमन के समजाहा, डरहामन के हिम्मत दिआस, बलनाहलो लोग के सम्भाला, सपाय चो बाटे सयनशक्ति दकाहा।

¹⁵ खबड़दार! कोनी काचीई ले बुराई चो पलटा बुराई नी करा; मान्तर सदा भलाई करतो थाने लगु राहा, आपस ने आउर सपाय ले बले भलाई ची चो कोशिश करा।

¹⁶ सदा हरिक ने राहा।

¹⁷ हरमेशा पारथना ने लगुन राहा।

¹⁸ सपाय गोठ ने धन्यबाद करा; कसनबल्लोने तुमचो काजे मसीह ईशु ने माहापुरू चो ऐई इच्छा आसे।

¹⁹ आत्मा के नी बुझाहा।

²⁰ अगम गोठमन के तुच्छ नी जाना।

²¹ सपाय गोठमन के परका; जोन अच्छा आय हुनके धरून रहा।

²² सपाय परकार चो खराप ले बाचुन राहा।

आशिर्बाद

²³ शान्ति चो माहापुरू खुदे ची तुमके पुरा रीति ले पवितर करो; आउर तुमचो आत्मा आउर जीव आउर देंह आमचो परबु ईशु मसीह चो ऐतो दाय ले पुरा आउर बेकसूर सुरक्षित रओत।

²⁴ तुमचो हाग देऊ बिता बिश्वास लायक आय, आउर हुन असने ची करे दे।

²⁵ हे भाईमन, आमचो काजे पारथना करा।

²⁶ सपाय भाईमन के पवितर चुमा ले जुहार करा।

²⁷ मय तुमके परबु चो किरिया देयेसे कि ऐ चिठ्ठी सपाय भाईमन के पढुन भाती सुनाया जाओ।

²⁸ आमचो परबु ईशु मसीह चो अनुग्रह तुमचो उपरे होते रओ।