1 थिस्सलुनीकियो 4 - Halbi

पवितरता चो काजे हाग देतोर

¹ ऐईकाजे हे भाईमन, आमी तुमके गुहार करूं से आउर तुमके परबु ईशु ने समजाऊँ से कि जसन तुमी आमचो ले लायक चाल चलतोर आउर माहापुरू के हरिक करतोर सिकलासास, आउर जसन तुमी चलेसास बले, असने ची आउर बले बड़ते जाहा।

² कसनबल्लोने तुमी जानेसास कि आमीमन परबु ईशु चो बाटले तुमके कोन-कोन बिती हुकुम अमरालु।

³ कसनबल्लोने माहापुरू चो इच्छा ऐ आय कि तुमी पवितर बना बल्लोने बेबीचार ले बाचुन राहा,

⁴ आउर तुमनमन ले हरकोनी पवितरता आउर मान चो संगे आपलो बायले के परापत करूक जाना,

⁵ आउर ऐ काम इच्छा ले नाई, आउर ना हुन जातिमन चो समान जोन माहापुरू के नी जानोत,

⁶ कि ऐ गोठ ने कोनी आपलो भाई के नी ठगो, आउर ना हुनचो उपरे दाँव चला ओ, कसनबल्लोने परबु ऐ सपाय गोठमन चो पलटा धरू बिता आय; जसन कि आमीमन पयले ची तुमचो ले बोलु आउर जनाऊन बले रलु।

⁷ कसनबल्लोने माहापुरू आमके अशुद्ध होतो काजे नाई, मान्तर पवितर होतो काजे हाग दिलो से।

⁸ ऐई लागुन जोन ऐके तुच्छ जानु आय, हुन माने के नाई मान्तर माहापुरू के तुच्छ जानु आय, जोन आपलो पवितर आत्मा तुमके देऊ आय।

मया आउर काम

⁹ मान्तर भाईचारा चो मया चो बारे ने ऐ जरूरी नुआय कि मय तुमचो लगे काई लिकेन्दे, कसनबल्लोने आपस ने मया संगातोर तुमनमन खुदे ची माहापुरू ले सिकलासास;

¹⁰ आउर सपाय मकिदुनिया चो सपाय भाईमन चो संगे असन करू बले आहास। मान्तर हे भाईमन, आमी तुमके समजाऊँ से कि आउर बले बड़ते जाहा,

¹¹ आउर जसन आमीमन तुमके हुकुम दिलु से, असने ची ओगाय रतोर आउर आपलो-आपलो काम धाम करतोर आउर आपलो-आपलो हाथमन ले कमातोर कोशिश करा;

¹² बल्ले बाहार बितामन ले मान परापत करा, आउर तुमके कोनी तीज चो घटी नी होओ।

मसीह चो दुबारा ऐतोर

¹³ हे भाईमन, आमी नी चाहाऊं कि तुमी हुनमन चो बारे ने जोन सोऊ आत, अगिआनी राहा; असन नी होओ कि तुमी दुसरमन चो असन दुख करा जेके आशा निआय।

¹⁴ कसनबल्लोने अगर आमी बिश्वास करूं आंव कि ईशु मरलो आउर जीव बले उठलो, तेबे असने ची माहापुरू हुनमन के बले जोन ईशु ने सोहला से, हुनचेई संगे धरून ऐये दे।

¹⁵ कसनबल्लोने आमी परबु चो बचन चो अनुसार तुमनमन ले ऐ बोलु आंव कि आमी जोन जीव आंसु आउर परबु चो ऐतो दाय ले बाचुन रवां, सोहलो लोगमन ले केबीई पुरे नी बड़ दे।

¹⁶ कसनबल्लोने परबु खुदे ची सरग ले उतरे दे; हुन समया ललकार, आउर परधान दूत चो शब्द सुना देये दे, आउर माहापुरू चो तुरी फुका जाय दे; आउर जोन मसीह ने मरला से, हुनमन पयले जीव उठ दे।

¹⁷ तेबे आमी जोन जीव आउर बाचुन रउन्दे हुनमन चो संगे बादरी उपरे उठाऊन निया जाऊँ दे कि लेहरा ने परबु ले मिलूं; आउर ऐई रीति ले आमी सदा परबु चो संगे रउन्दे।

¹⁸ ऐई परकार ऐ गोठमन ले गोटक दुसर के शान्ति दिया करा।