1 थिस्सलुनीकियो 3 - Halbi

बिश्वास काजे चिन्ता

¹ ऐईकाजे जिदलदाय आमचो ले आउर नी रऊक होली, तेबे आमीमन ऐ ठेबालु कि एथेन्स ने ऐकला रऊन जाऊ;

² आउर आमीमन तीमुथियुस के, जोन मसीह चो नगतखबर ने आमचो भाई आउर माहापुरू चो सेवाकरू आय, ऐईकाजे पठाले कि हुन तुमके थीर करो आउर तुमचो बिश्वास चो बारे ने तुमके समजाओ,

³ कि कोनी ऐ कलेशमन चो लागुन ऐ बाटे हुन बाटे नी जाओत। कसनबल्लोने तुमी खुद जानसास कि आमी ऐई मन चो काजे ठेबाया गेलु से।

⁴ कसनबल्लोने पयले बले, जिदलदाय आमी तुमचो थाने रऊँ तेबे तुमके बोलते रऊँ कि आमके कलेश उठाक पढ़े दे, आउर असने ची होली से, जसन कि तुमी जानास बले।

⁵ ऐई लागुन जिदलदाय मोचो ले आउर नी रऊक होली, तेबे तुमचो बिश्वास चो हाल जानतो काजे पठाले, कि काहांय असन नी होओ कि परीक्षा धरतो बिता तुमचो परीक्षा धरलो से, आउर आमचो मसागत फकाहा होऊन गेली से।

तीमुथियुस बाटले हरिक

⁶ मान्तर ऐबे तीमुथियुस, जोन तुमचो लगले आमचो थाने ऐऊ रलो, तुमचो बिश्वास आउर मया चो नगतखबर सुनालो आउर ऐ गोठ के बले सुनालो कि तुमी सदा मया चो संगे आमके सुरता संगाऊ आस, आउर आमके दकतोर आशा संगाऊ आस, जसन आमी बले तुमके दकुं आंव।

⁷ ऐईकाजे हे भाईमन, आमीमन आपलो सपाय दुक आउर कलेश ने तुमचो बिश्वास ले तुमचो बारे ने शान्ति पावलु।

⁸ कसनबल्लोने अदायं अगर तुमी परबु ने थीर राहा तेबे आमी जीव आंसु।

⁹ आउर जसन हरिक तुमचो लागुन आपलो माहापुरू चो पुरे आसे, हुनचो पलटा तुमचो बारे ने आमी कोन रीति ले माहापुरू चो धन्यबाद करूं दे?

¹⁰ आमी रात दिन खुबे ची पारथना करते रऊँ आंव कि तुमचो मुंह दकु आउर तुमचो बिश्वास चो घटी पुरा करूं।

कलीसिया काजे पारथना

¹¹ अदायं आमचो माहापुरू आउर बुआ खुद ची आउर आमचो परबु ईशु, तुमचो थाने ऐतोर आमचो अगवाई करो;

¹² आउर परबु असन करो कि जसन आमी तुमचो ले मया संगाऊ आंव, असने ची तुमचो मया बले आपस ने आउर सपाय मानेमन चो संगे बाड़ो, आउर उन्नती करते जाओ,

¹³ बल्ले हुन तुमचो मन-मन के असन थीर करो कि जिदलदाय आमचो परबु ईशु आपलो सपाय पवितर लोगमन चो संगे ऐओ, तेबे हुनमन आमचो माहापुरू आउर बुआ चो पुरे पवितरता ने बेकसूर ठेबोत।