1 थिस्सलुनीकियो 2 - Halbi

पौलुस चो चाल-चलन

¹ हे भाईमन, तुमी खुद ची जानेसास कि आमचो तुमचो लगे ऐतोर फकाहा नी होली,

² मान्तर तुमी खुद ची जानेसास कि पयले फिलिप्पी ने दुक उठातोर आउर उपद्रव सहलो थानले बले आमचो माहापुरू आमके असन साहास दिलो, कि आमी माहापुरू चो नगतखबर भारी बिरूदमन चो होते-होते बले तुमके सुनाऊ।

³ कसनबल्लोने आमचो उपदेश ना भरम ले आय आउर ना अशुद्धता ले, आउर ना छंद चो संगे आय;

⁴ मान्तर जसन माहापुरू आमके लायक ठेबाऊन भाती नगतखबर सोपलो, आमी असने ची वर्णन करूं से, आउर ऐ थाने मानेमन के नाई, मान्तर माहापुरू के, जोन आमचो मन-मन के जाचु आय, हरिक करूं आंव।

⁵ कसनबल्लोने तुमी जानेसास कि आमी ना तो केबीई चापलुसी चो गोठमन करा करते रऊँ, आउर ना लोभ चो काजे बाहना करते रऊँ, माहापुरू गोहई आसे;

⁶ आउर अगर आमी मसीह चो पठालोबिता होतोर लागुन तुमचो उपरे बोजा डालुक सकते रऊँ, तेबले बले आमी मानेमन ले मान नी चाहते रऊँ, आउर ना तुमचो ले, ना आउर काचीई ले।

⁷ मान्तर जसन ढंग ले आया आपलो लेकामन चो पालन पोषन करू आय, असने ची आमी बले तुमचो मंजी ने रऊन भाती कोमलता दकालु से;

⁸ आउर असने ची आमी तुमचो लालच करते, ना मात्र माहापुरू चो नगतखबर थाने आपलो-आपलो जीव बले तुमके देतोर तिआर रलु, ऐईकाजे कि तुमी आमचो लाड़रा होऊन जाऊ राआस।

⁹ कसनबल्लोने, हे भाईमन, तुमी आमचो मसागत आउर कष्ट के सुरता संगाऊ आहास; आमी तो ऐईकाजे रात दिन काम धन्धा करते-करते तुमचो ने माहापुरू चो नगतखबर परचार करलु कि तुमचो थानले काचीई उपरे भार नी होओ।

¹⁰ तुमी खुद ची गोहई आहास, आउर माहापुरू बले गोहई आय कि तुमी बिश्वासीमन चो मंजी ने आमचो बेवहार कसन पवितर आउर धारमीक आउर बेकसूर रली।

¹¹ तुमी जानेसास कि जसन बुआ आपलो लेकामन चो संगे बेवहार करू आय, असने ची आमी बले तुमचो थानले हरकोनी के उपदेश करते, आउर शान्ति देते, आउर समजाते रऊँ।

¹² कि तुमचो चाल-चलन माहापुरू चो लायक होओ, जोन तुमके आपलो राज आउर महिमा ने हाग देऊ आय।

थिस्सलुनीकी लोगमन चो रूप बदलतोर

¹³ ऐईकाजे आमी बले माहापुरू चो धन्यबाद हरमेशा करूं आंव कि जिदलदाय आमचो लागुन माहापुरू चो नगतखबर चो बचन तुमचो लगे पहुँचली, तेबे तुमी हुनके मानेमन चो नाई मान्तर माहापुरू चो बचन समजुन भाती (आउर सते ऐ असने ची आय) गरहन करलास; आउर हुन तुमी बिश्वासीमन थाने जोन बिश्वास संगाऊ आहास, असर करू आय।

¹⁴ ऐईकाजे तुमी, हे भाईमन, माहापुरू चो हुन कलीसियामन चो असन चाल चलुक मुरयालास जोन यहूदीया ने मसीह ईशु ने आसे, कसनबल्लोने तुमी बले आपलो लोगमन ले असने ची दुख पावलास जसन हुनमन यहूदिमन ले पाऊ रवत,

¹⁵ जोनमन परबु ईशु के आउर अगम गिआनीमन के बले मारून दिला आउर आमके कन्दराला, आउर माहापुरू हुनमन ले हरिक निआय, आउर हुनमन सपाय मानेमन चो बिरोद करू आत,

¹⁶ आउर हुनमन दुसर जातिमन ले हुनमन चो मुक्ति चो काजे गोठमन करतो ले आमके ठेबाऊ आत कि सदा आपलो पापमन चो नाप भरते रवत; मान्तर हुनमन उपरे माहापुरू चो भयंकर घोर रिस ऐऊन पहुँचली से।

कलीसिया ले भेट होतोर इच्छा

¹⁷ हे भाईमन, जिदलदाय आमी डण्डिक काजे, मन ने नाई मान्तर परकट ने, तुमचो ले अलग होऊन जाऊ रलु, तेबे आमी बड़े लालच चो संगे तुमचो मुंह दकतो काजे आउर बले खुबे कोशिश करलु।

¹⁸ ऐईकाजे आमी (बल्लोने मय पौलुस) गोटक हार नाई मान्तर दुयहार तुमचो लगे ऐऊक चाह ले, मान्तर शयतान आमके ठेबाऊन रलो।

¹⁹ अच्छा आमचो आशा नाहले हरिक नाहले बड़ाई चो मुकुट काय आय? काय आमचो परबु ईशु चो पुरे हुनचो ऐतोर समया तुमी ची नी हुआस?

²⁰ आमचो बड़ाई आउर हरिक तुमी ची आहास।