1 पतरस 5 - Halbi

गोहड़ी चो चरेया

¹ तुमनमन ने जोन सियान आय, मय हुनमन चो असन सियान आउर मसीह चो दुखमन चो गोहई आउर परकट होतो बिती महिमा ने शामिल होऊन भाती हुनमन के ऐ समजायें से

² कि माहापुरू चो हुन गोहड़ी, जोन तुमचो मंजी ने आसे राका करा; आउर ऐ दबाव ले नाई मान्तर माहापुरू चो इच्छा चो अनुसार हरिक ले, आउर नीच-कमाई चो काजे नाई मान्तर मन लगान भाती कर।

³ जोन लोग तुमके सोपा गेला से, हुनमन उपरे अधिकार नी जताहा, मान्तर गोहड़ी चो काजे नमूना बना।

⁴ जिदलदाय परधान राका करू परकट होये दे, तेबे तुमके महिमा चो मुकुट दिया जाय दे जोन कोमचु नुआय।

माहापुरू के समर्पित करतोर आउर शयतान चो बिरूद करतोर

⁵ असने परकार हे जुआनमन, तुमी बले सियानमन चो आधीन राहा, मान्तर तुमी सपाय चो सपाय गोटक दुसर चो सेवा चो काजे दिनता ले करांड बान्दुन राहा, कसनबल्लोने “माहापुरू मनमानीमन चो बिरूद करू आय मान्तर सोजमन उपरे अनुग्रह करू आय।”

⁶ ऐईकाजे माहापुरू चो बलवान हाथ चो खाले दिनता ले राहा, जेचो ले हुन तुमके सही समया थाने बड़ाओ।

⁷ आपलो पुईतराय चिन्ता हुनचेई उपरे डालुन दिआस, कसनबल्लोने हुनके तुमचो धिआन आसे।

⁸ चेत हुआ, आउर चेता राहा, कसनबल्लोने तुमचो बिरूदी शयतान गरजतो बिता डुरका चो असन ऐ खोज ने रऊ आय, कि कोन के धरून खाये दे।

⁹ बिश्वास ने जमखम होऊन भाती, आउर ऐ जानुन भाती हुनचो सामना करा कि तुमचो भाई जोन संवसार ने आसोत असने ची दुख-सहे सोत।

¹⁰ अदायं माहापुरू जोन सपाय अनुग्रह चो देतो बिता आय, जोन तुमके मसीह ने आपलो अमर महिमा चो काजे हाग दिलो से, तुमचो डण्डिक काजे दुख उठालोर पाचे खुद ची तुमके सिद्ध आउर थीर आउर बलवान करे दे।

¹¹ हुनचेई राजपाट जुग-जुग रओ। आमीन।

आखरी जुहार

¹² मय सिलवानुस चो होते, जेके मय बिश्वास लायक भाई समजु आय कम ने लिकुन भाती तुमके समजाले से, आउर ऐ गोहई दिले से कि माहापुरू चो सत अनुग्रह ऐई आय, ऐई थाने थीर राहा।

¹³ जोन बेबीलोन ने तुमचो असन चुनलो लोग आसोत, हुन आउर मोचो बेटा मरकुस तुमके जुहार बले सोत।

¹⁴ मया चो चुमा ले गोटक दुसर के जुहार करा। तुमी सपाय के, जोन मसीह ने आसोत, शान्ति मिरते रओ।