1 पतरस 4 - Halbi

बदल लो बिती जीवना

¹ ऐईकाजे जसन कि मसीह देंह ने होऊन भाती दुख उठालो तेबे तुमी बले हुनी मनसा के हत्यार चो असन धारन करा, कसनबल्लोने जोन देंह ने दुख उठालो हुन पाप ले छुटुन गेलो,

² बल्ले अगम ने आपलो देंह चो जीवना मानेमन चो मनमानीमन चो अनुसार नाई मान्तर माहापुरू चो इच्छा चो अनुसार गुजारा।

³ कसनबल्लोने दुसर जातिमन चो इच्छा चो अनुसार काम करतोर, आउर लुचपन चो खराबी मनमानीमन, मतवारपन, खेला-कुद, मतवारपन, आउर घिन-घिना मुरती पुजा ने जोन थानले आमी पयले समया गवालु, हुनी खुबे होली।

⁴ ऐचो ले हुनमन अकचकित करू आत कि तुमी असन भारी ढीलाढाला ने हुनमन चो सात नी दिआस, आउर ऐईकाजे हुनमन अच्छा खराप बोलु आत;

⁵ मान्तर हुनमन हुनके जोन जीवता आउर मरलो बितामन चो नियाय करतो के तिआर आसोत, लेखा देदे।

⁶ कसनबल्लोने मरलो बितामन के बले नगतखबर ऐईकाजे सुनाया गेली कि देंह ने तो मानेमन चो अनुसार हुनमन चो नियाय होओ, मान्तर आत्मा ने हुनमन माहापुरू चो अनुसार जीव रवत।

माहापुरू चो महिमा काजे सेवा

⁷ सपाय गोठमन चो आखरी तुरते होतो बिती आय; ऐईकाजे सहन करू होऊन भाती पारथना चो काजे चेत ने राहा।

⁸ सपाय ले बड़ीया गोठ ऐ आय कि गोटक दुसर ले खुबे मया संगाहा, कसनबल्लोने मया कईं पापमन के ढ़ापुन देऊ आय।

⁹ बिना घुरमुरलोर गोटक दुसर चो आव-भगत करा।

¹⁰ जेके जोन बर मिरली से, हुन हुनके माहापुरू चो नाना परकार चो अनुग्रह चो अच्छा भण्डारीमन चो असन गोटक दुसर चो सेवा ने लगाआ।

¹¹ अगर कोनी बोल दे, तो असन बोलो माना माहापुरू चो बचन आय; अगर कोनी सेवा करो, तो हुनी शक्ति ले करो जोन माहापुरू देऊ आय; जेचो ले सपाय गोठमन ने ईशु मसीह चो दुवारा, माहापुरू चो महिमा परकट होओ। महिमा आउर राजपाट जुग-जुग हुनचेई आय। आमीन।

माहापुरू चो महिमा काजे दुक उठातोर

¹² हे लाड़रामन, जोन दुख रूपी आईग तुमचो परकतो काजे तुमचो थाने भड़कली से, ऐचो ले ऐ समजुन भाती अकचकित नी करा कि कोनी भयंकर गोठ तुमचो उपरे बीते से।

¹³ मान्तर जसन-जसन मसीह चो दुखमन ने शामिल होऊ आस, हरिक करा, जेचो ले हुनचो महिमा चो परकट होतो समया बले तुमी हरिक आउर उदुम हुआ।

¹⁴ फेर अगर मसीह चो नाव चो काजे तुमचो निन्दा करा जाये से तो तुमी धन्य आस, कसनबल्लोने महिमा चो आत्मा, जोन माहापुरू चो आत्मा आय, तुमचो उपरे छांया करू आय।

¹⁵ तुमचो थाने ले कोनी माने हत्यारा नाहले चोर नाहले कुकरमी होले, नाहले दुसर काम ने हाथ डाललोर लागुन दुख नी पाओ।

¹⁶ मान्तर अगर मसीह होलोर लागुन दुख पाओ, तेबे लाज नी हुआ, मान्तर ऐ गोठ चो काजे माहापुरू चो महिमा करा।

¹⁷ कसनबल्लोने हुन समया ऐऊन अमरली से कि पयले माहापुरू चो लोगमन चो नियाय करा जाय दे; आउर जसन कि नियाय चो मुर आमचो ची ले होये दे तो हुनमन चो काय आखरी होये दे जोन माहापुरू चो नगतखबर के नी मानोत?

¹⁸ आउर “अगर धरमी माने ची मशकिल ले मुक्ति पाये दे, तेबे भक्तिहीन आउर पापी चो काय ठिकाना?”

¹⁹ ऐईकाजे जोन माहापुरू चो इच्छा चो अनुसार दुख उठाऊ आत, हुनमन भलाई करते-करते आपलो-आपलो जीव के बिश्वास लायक बनातो बिता चो हाथ ने सोपुन दे ओत।