1 पतरस 3 - Halbi

बायलेमन

¹ हे बायले लेकीमन, तुमी बले आपलो मुनुक चो अधीन राहा, ऐईकाजे कि अगर ऐ मन ले कोनी असन होओत जोन बचन के नी मानोत,

² तेबे बले तुमचो भय संगे पवितर चाल-चलन के दकुन भाती बिना बचन चो आपलो-आपलो बायले चो चाल-चलन दुवारा झिका जाओ

³ तुमचो सिंगार दकावटी नी होओ, आउर केश गाततोर, आउर सोना चो गाहनुमन, नाहले बरन-बरन चो फटीई पिन्दतोर,

⁴ मान्तर तुमचो लुकलो बिती आउर गुपत माने, नम्रता आउर मन चो दिनता चो अमर सजावट ले सजुन रवत, कसनबल्लोने माहापुरू चो नजर ने ऐचो मोल बड़े आय।

⁵ पयले जुग ने पवितर बायले लेकीमन बले, जोन माहापुरू थाने आशा संगाते रवत, आपन खुद के असने रीति ले फभाय होते आउर आपलो-आपलो मनुक चो अधीन रते रवत।

⁶ जसन सारा अब्राहाम चो हुकुम मानते आउर हुनके मालिक बोलते रये। असने परकार तुमी बले अगर भलाई करा आउर कोनी परकार चो भय ले बाय बिकाल नी हुआ, तेबे हुनचो बेटीमन ठेबा से।

मनुक

⁷ असने ची हे मनुकमन, तुमी बले अकल ले बायलेमन चो संगे जीवना गुजारा करा, आउर बायले लेकी के कमजोर तीज जानुन भाती हुनचो ईजीत करा, ऐ समजुन भाती कि आमी दुनो जीवना चो बर चो हकदार आंव, जेचो ले तुमचो पारथनामन ठेबुन नी जाओ।

आशीष चो हकदार होतोर बुलाहट

⁸ आउर सपाय चो सपाय गोटक मन आउर किरपामय आउर भाईचारा चो लाड़ संगातो बितामन, आउर करूनामय आउर सोज बना।

⁹ खराप चो पलटा खराप नी करा आउर ना झगड़ा चो पलटा झगड़ा दिआस; मान्तर ऐचो पलटा आशीष ची दिआस, कसनबल्लोने तुमी आशीष चो हकदार होतो काजे हाग दिया गेलासास।

¹⁰ कसनबल्लोने “जोन कोनी जीवना चो इच्छा संगाऊ आय, आउर अच्छा दिन दकुक चाहाऊं आय, हुन आपलो जीव के खराप ले आउर आपलो होटमन के छंद चो गोठमन करतो ले ठेबाऊन रओ।

¹¹ हुन खराप चो संग छांड़ो, आउर भलाई ची करो; हुन मिला-मिसा के डगरा ओ, आउर हुनचो खोज ने रओ।

¹² कसनबल्लोने परबु चो आँईकमन धरमीमन उपरे लगुन रऊ आय, आउर हुनचो कान हुनमन चो गुहार बाटे लगु रऊ आय; मान्तर परबु खराप करू बितामन चो बिरूद रऊ आय।”

भलाई करतोर लागुन कंदरातोर

¹³ अगर तुमी भलाई करतो काजे उतेज्जित राआ से तो तुमचो खराप करतो बिता फेर कोन आय?

¹⁴ अगर तुमी धरम चो लागुन दुख बले उठाहा, तेबे धन्य आस; मान्तर लोगमन चो डरालो ले नी डरा आउर ना घबराआ,

¹⁵ मान्तर मसीह के परबु जानुन भाती आपलो-आपलो मन ने पवितर माना। जोन कोनी तुमचो ले तुमचो आशा चो बारे ने काई पचार दे, हुनके जबाप देतो काजे हरमेशा तिआर राहा, मान्तर नम्रता आउर भय चो संगे;

¹⁶ आउर बिबक बले शुद्ध संगाहा, ऐईकाजे कि जोन गोठमन चो बारे ने तुमचो बदनामी होऊ आय हुनमन चो बारे ने हुनमन जोन मसीह ने तुमचो अच्छा चाल-चलन चो बेईजित करू आत, बेईजित होओत।

¹⁷ कसनबल्लोने अगर माहापुरू चो ऐई इच्छा होओ कि तुमी भलाई करलोर लागुन दुख उठाआ, तेबे ऐ खराबी करलोर लागुन दुख उठालो ले बड़ीया आय।

मसीह चो दुक

¹⁸ ऐईकाजे कि मसीह बले, आउर अधरमीमन काजे धरमी, पापमन चो लागुन गोटक हार दुख उठालो, बल्ले आमके माहापुरू चो लगे अमराओ हुन देंह चो भाव ले तो घात करा गेलो, मान्तर आत्मा चो भाव ले जिआया गेलो।

¹⁹ हुनी थाने हुन जाऊन भाती कयदी आत्मामन के बले परचार करलो,

²⁰ जोनमन हुन बितलो समया ने हुकुम नी मानला, जिदलदाय माहापुरू नूह चो दिनमन ने धीरज धरून भाती ठेबुन रये, आउर हुन जाहाज बनते रये, जोन थाने बसुन भाती खिन्डिक लोग बल्लोने आंट लोग पानी चो दुवारा बाचुन गेला।

²¹ हुनी पानी चो कहनी बले, बल्लोने डूबन, ईशु मसीह चो जीव उठलोर दुवारा, अदायं तुमके बचाऊ आय; ऐचो ले देंह चो मईल के धुर करतोर मतलब नुआय, मान्तर शुद्ध बिबक ले माहापुरू चो वश ने होऊन जातोर मतलब आय।

²² हुन सरग थाने जाऊन भाती माहापुरू चो उजा बाटे बसलो, आउर सरगदूत आउर अधिकारी आउर सामरती हुनचो हक करा गेला से।