1 पतरस 2 - Halbi

चुनलो बिती पकना आउर हुनचो चुनलो लोग

¹ ऐईकाजे सपाय परकार चो बईरभाव आउर छंद आउर कपट आउर कुचर आउर निन्दा के दूर करून,

² नवा जनम लो पिलामन चो असन निंगल आत्मिक गोरस चो आशा करा, बल्ले हुनचो दुवारा मुक्ति पावतो काजे बाड़ते जाहा,

³ कसनबल्लोने तुमनमन परबु चो किरपा चो सुआद चाकलासास।

⁴ हुनचो लगे ऐऊन भाती, जेके मानेमन तो बेकार ठेबाला मान्तर माहापुरू चो लगे चुनलो बिती आउर बड़े मोल जीव पकना आय,

⁵ तुमी बले खुदे जीवता पकनामन चो असन आत्मिक घर बनते जायसास, जेचो ले याजकमन चो पवितर समाज बनुन भाती, असन आत्मिक बलिदान चेगाहा जोन ईशु मसीह चो दुवारा माहापुरू के कबुल आसे।

⁶ ऐई लागुन पवितर शास्त्र ने बले ईली से “दका, मय सिय्योन ने कोना चो टोक चो चुनलो बिती आउर बड़े मोल पकना धरू आय: आउर जोन कोनी हुनचो उपरे बिश्वास करे दे, हुन कोनी रीति ले लाज नी होये दे।”

⁷ आउर तुमचो काजे जोन बिश्वास करू आस हुन बड़े मोल आय, मान्तर जोन बिश्वास नी करोत हुनमन काजे “जोन पकना के राजमिस्त्रीमन बेकार ठेबाऊ रला, हुनी कोनया चो टोक होऊन गेली,”

⁸ आउर, “ठेच लगतोर पकना आउर ठोकरना खातोर चटान होऊन गेली से,” कसनबल्लोने हुनमन तो बचन के नी मानुन भाती ठोकरना खाऊ आत आउर ऐईकाजे हुनमन ठेबाया बले जाऊ रवत।

⁹ मान्तर तुमी गोटक चुनलो बिती बंश, आउर राज पनधारी याजकमन चो समाज, आउर पवितर लोग, आउर (माहापुरू चो) निज परजा आस, ऐईकाजे कि जोन तुमके अंधार थानले आपलो भयंकर उजर ने हाग दिलो से, हुनचो गुन परकट करा।

¹⁰ तुमी पयले तो काई बले नी रलास मान्तर अदायं माहापुरू चो परजा आस; तुमचो उपरे दया नी होऊ रये मान्तर अदायं तुमचो उपरे दया होली से।

माहापुरू काजे जिवतोर

¹¹ हे लाड़रामन, मय तुमचो ले गुहार करें से कि तुमी आपन खुद के परदेशी आउर यातरी जानुन भाती हुन संवसारिक मनमानीमन ले जोन आत्मा ले लड़ीई करू आय, बचुन राआ।

¹² दुसर जातिमन ले तुमचो चाल-चलन अच्छा होओ; ऐईकाजे जोन-जोन गोठमन ने हुनमन तुमके कुकरमी जानुन भाती बदनाम करू आत, हुनमन तुमचो अच्छा काममन के दकुन भाती हुनीमन चो लागुन किरपादृष्टी चो दिने माहापुरू चो महिमा करोत।

अधिकारीमन चो अधीन राआ

¹³ परबु चो काजे मानेमन चो ठेबालो बिती हरकोनी जुगाड़करू चो आधीन राहा, राजा चो ऐईकाजे कि हुन सपाय थाने परधान आय,

¹⁴ आउर हाकिममन मन चो, कसनबल्लोने हुनमन कुकरमीमन के डण्ड देतो काजे आउर अच्छा करम करतो बितामन चो परशंसा चो काजे हुनचो पटाया गेला सोत।

¹⁵ कसनबल्लोने माहापुरू चो इच्छा ऐ आय कि तुमी अच्छा काम करतोर दुवारा निरबुद्धि लोगमन चो अगिआनता चो गोठमन के ढ़ाकुन दिआस।

¹⁶ आपन खुद के छुटछाड़ा जाना, मान्तर आपलो ये छुटछाड़ा के बुराई चो काजे आड़ नी बनाआ; मान्तर आपन खुद के माहापुरू चो दास समजुन भाती चला।

¹⁷ सपाय चो ईजीत करा, भाईमन ले मया संगाआ, माहापुरू ले डरा, राजा चो मान करा।

मसीह चो दुक चो कहनी

¹⁸ हे सेवा करूमन, हर परकार चो भय चो संगे आपलो मालिकमन चो अधीन राआ, ना मात्र हुनमन चो जोन अच्छा आउर सोज होओ मान्तर हुनमन चो बले जोन कुटील होओ।

¹⁹ कसनबल्लोने अगर कोनी माहापुरू चो बिचार करून अनियाय ले दुख उठाते-उठाते कलेश सहु आय तेबे ऐ बड़ीया आय।

²⁰ कसनबल्लोने अगर तुमनमन अपराध करून घुंसा खाआ आउर धीरज धरा, तेबे ऐ थाने काय बड़ाई चो गोठ आय? मान्तर अगर अच्छा काम करून दुख उठाऊ आस आउर धीरज धरू आस, तेबे ऐ माहापुरू के भाऊ आय।

²¹ आउर तुमी ऐचीई काजे हाग दिलोर बले गेलासास, कसनबल्लोने मसीह बले तुमचो काजे दुख उठाऊन भाती तुमके गोटक सिक देऊन गेलो से कि तुमी बले हुनचो पाँय-चिनामन थाने चला।

²² ना तो हुन पाप करलो आउर ना हुनचो मुंह ले छंद चो कोनी गोठ निकरली।

²³ हुन झगड़ा सुनुन भाती झगड़ा नी करते रये, आउर दुख उठाऊन भाती काकीई बले धमकी नी देते रये, मान्तर आपन खुद के सते नियायी चो हाथ ने सोपते रये।

²⁴ हुन खुदे ची आमचो पापमन के आपलो देंह थाने धरून भाती कुरूस थाने चेगलो, जेचो ले आमी पापमन चो काजे मरून भाती धारमिकता चो काजे जीवना बिताऊ। हुनचेई मार खादलो ले तुमी चेंगा होलास।

²⁵ कसनबल्लोने तुमी पयले भुलकलो बिती मेंडामन चो असन रलास, मान्तर अदायं आपलो परानमन चो राका करू आउर अध्यक्ष चो लगे फिरून ईलासास।