1यूहन्ना 5 - Halbi

संवसार उपरे जय

¹ जेचो ऐ बिश्वास आसे कि ईशु ची मसीह आय, हुन माहापुरू ले उपजास होलो से; आउर जोन कोनी उपजास करतो बिता ले मया संगाऊ आय, हुन हुनचो ले बले मया संगाऊ आय जोन हुनचो ले उपजास होलो से।

² जिदलदाय आमी माहापुरू ले मया संगाऊ आंव आउर हुनचो हुकुममन के मानु आंव, तेबे ऐचीई ले आमी जानु आंव कि आमी माहापुरू चो पिलामन ले मया संगाऊ आंव।

³ कसनबल्लोने माहापुरू ले मया संगातोर ऐ आय कि आमी हुनचो हुकुममन के मानु; आउर हुनचो हुकुममन मशकिल नुआय।

⁴ कसनबल्लोने जोन काई माहापुरू ले उपजास होली से, हुन जगत थाने जय पाऊ आय; आउर हुन जीत जेचो ले संवसार थाने जय पाऊ आय आमचो बिश्वास आय।

⁵ संवसार थाने जय पावतो बिता कोन आय? मात्र हुन जेचो ऐ बिश्वास आसे कि ईशु, माहापुरू चो बेटा आय।

मसीह चो बारे गोहई

⁶ ऐई आय हुन जोन पानी आउर लऊ चो दुवारा ऐऊ रलो, बल्लोने ईशु मसीह हुन ना मात्र पानी चो दुवारा मान्तर पानी आउर लऊ दुनो चो दुवारा ऐऊ रलो। आउर ये आत्मा आय जोन गोहई देये से, कसनबल्लोने आत्मा सत आय।

⁷ आउर जोन गोहई देऊ आय, हुन आत्मा आय, कसनबल्लोने आत्मा सत आय।

⁸ गोहई देतो बिता तीन आत, आत्मा, आउर पानी, आउर लऊ; आउर तीनो गोटक ची गोठ थाने सहमत आत।

⁹ जिदलदाय आमी मानेमन चो गोहई मानु आंव, तेबे माहापुरू चो गोहई तो हुनचो ले बडुन भाती आय; आउर माहापुरू चो गोहई ऐ आय कि हुन आपलो बेटा चो बारे ने गोहई दिलो से।

¹⁰ जोन माहापुरू चो बेटा उपरे बिश्वास करू आय हुन आपलो ची ने गोहई संगाऊ आय। जोन माहापुरू उपरे बिश्वास नी करलो हुन हुनके फंदी ठेबालो, कसनबल्लोने हुन-हुन गोहई थाने बिश्वास नी करलो जोन माहापुरू आपलो बेटा चो बारे ने दिलो से।

अमर जीवना

¹¹ आउर हुन गोहई ऐ आय कि माहापुरू आमके अमर जीवना दिलो से, आउर ऐ जीवना हुनचो बेटा ने आसे।

¹² जेचो लगे बेटा आसे, हुनचो लगे जीवना आसे; आउर जेचो लगे माहापुरू चो बेटा निआय, हुनचो लगे जीवना बले निआय।

¹³ मय तुमके, जोन माहापुरू चो बेटा चो नाव थाने बिश्वास करू आहास, ऐईकाजे लिकलोर आसे कि तुमी जाना कि अमर जीवना तुमचो आय।

असरदार पारथना

¹⁴ आउर आमके हुनचो पुरे जोन साआस होऊ आय, हुन ऐ आय; कि अगर आमी हुनचो इच्छा चो अनुसार काई मांगु आंव तेबे हुन आमचो सुनु आय।

¹⁵ जिदलदाय आमी जानु आंव कि जोन काई आमी मांगु आव हुन आमचो सुनु आय, तेबे ऐ बले जानु आंव कि जोन काई आमी हुनचो ले मांगलु, हुन पावलु से।

¹⁶ अगर कोनी आपलो भाई के असन पाप करतोर दको जेचो फल मरना नी होओ, तो गुहार करा, आउर माहापुरू हुनके हुनमन काजे, जोनमन असन पाप करला से जेचो फल मरना नी होओ, जीवना देये दे। पाप असन बले होऊ, आय जेचो फल मरना आय, ऐचो बारे ने मय गुहार करतो काजे नी बले।

¹⁷ सपाय परकार चो अधरम तो पाप आय, मान्तर असन पाप बले आसे जेचो फल मरना नुआय।

नतीजा

¹⁸ आमी जानु से, कि जोन कोनी माहापुरू ले उपजास होला से, हुन पाप नी करे; मान्तर जोन माहापुरू ले उपजास होलो, हुनके हुन बचाऊन संगाऊ आय, आउर हुन दुष्ट हुनके छिंऊक नी सके।

¹⁹ आमी जानु से कि आमी माहापुरू ले आंव, आउर सपाय संवसार हुन दुष्ट चो वश ने पढ़ली से।

²⁰ आमी ऐ बले जानु से कि माहापुरू चो बेटा ईलो से आउर हुन आमके अकल दिलो से कि आमी हुन सत के चिताऊ; आउर आमी हुन थाने जोन सत आय, बल्लोने हुनचो बेटा ईशु मसीह ने रऊँ आंव। सत माहापुरू आउर अमर जीवना ऐई आय।

²¹ हे लेकामन, आपन खुद के मुरतीमन ले बचाऊन संगाहा।