1यूहन्ना 4 - Halbi

आत्मामन के जाचा

¹ हे लाड़रा मन, हरकोनी आत्मा थाने बिश्वास नी करा, मान्तर आत्मामन के परका कि हुनमन माहापुरू चो बाटले आय कि नुआय; कसनबल्लोने खुबे असन फंदी अगम गिआनी जगत ने निकरून उबला सोत।

² माहापुरू चो आत्मा तुमी ऐ रीति ले चिताऊक सका से, जोन आत्मा मानु आय कि ईशु मसीह देंह ने होऊन भाती ईलो से हुन माहापुरू चो बाटले आय,

³ आउर जोन आत्मा ईशु के नी माने, हुन माहापुरू चो बाटले नुआय; आउर हुनी तो मसीह चो बिरोधी चो आत्मा आय, जेचो चरचा तुमी सुनुन चुकलासास कि हुन ऐतो बिता आय, आउर ऐबे बले जगत ने आसे।

⁴ हे लेकामन, तुमी माहापुरू चो आहास, आउर तुमीमन हुन थाने जय पावलासास, कसनबल्लोने जोन तुमचो थाने आसे हुन हुनचो ले जोन संवसार ने आसे, बड़े आय।

⁵ हुनमन संवसार चो आत, ऐई लागुन हुनमन संवसार चो गोठमन बोलु आत आउर संवसार हुनमन चो सुनु आय।

⁶ आमी माहापुरू चो आंव जोन माहापुरू के जाने, हुन आमचो सुनु आय; जोन माहापुरू के नी जाने हुन आमचो नी सुने। ऐई परकार आमी सत चो आत्मा आउर भरम चो आत्मा के चिताऊ आंव।

मया लागुन माहापुरू के जानतोर

⁷ हे लाड़रा मन, आमी आपस ने मया संगाऊ, कसनबल्लोने मया-माहापुरू ले आय। जोन कोनी मया करू आय, हुन माहापुरू ले जनम लो से आउर माहापुरू के जानु आय।

⁸ जोन मया नी संगाये हुन माहापुरू के नी जाने, कसनबल्लोने माहापुरू मया आय।

⁹ जोन मया माहापुरू आमचो ले संगाऊ आय, हुन ऐचो ले परकट होली कि माहापुरू आपलो एकला बेटा के जगत ने पठालो से कि आमी हुनचो दुवारा जीवना पाऊँ।

¹⁰ मया ऐ थाने निआय कि आमी माहापुरू ले मया करलु, मान्तर ऐ थाने आसे कि हुन आमके मया करलो आउर आमचो पापमन चो पशतावा चो काजे आपलो बेटा के पठालो।

¹¹ हे लाड़रामन जिदलदाय माहापुरू आमचो ले असन मया करलो, तेबे आमके बले आपस ने मया संगातोर आय।

मया लागुन माहापुरू के दकतोर

¹² माहापुरू के केबीई कोनी नी दकला; अगर आमी आपस ने मया संगावां, तेबे माहापुरू आमचो ने बनुन रऊ हाय आउर हुनचो मया आमचो ने सिद्ध होऊन गेली से।

¹³ ऐचीई ले आमी जानु से कि आमी हुनचो ने बनुन रऊ आंव, आउर हुन आमचो ने; कसनबल्लोने हुन आपलो आत्मा थानले आमके दिलो से।

¹⁴ आमी दकलु से बले आउर गोहई देऊ आंव कि बुआ बेटा के जगत चो मुक्तिकरू करून पठालो से।

¹⁵ जोन कोनी ऐ मानु आय कि ईशु माहापुरू चो बेटा आय, माहापुरू हुनचो थाने बनुन रऊ आय, आउर हुन माहापुरू ने।

¹⁶ जोन मया माहापुरू आमचो ले संगाऊ आय, हुनके आमी जानलु आउर आमके हुनचो ले बिश्वास आसे। माहापुरू मया आय, आउर जोन मया ने बनुन रऊ आय हुन माहापुरू ने बनुन रऊ आय, आउर माहापुरू हुनचो थाने बनुन रऊ आय।

¹⁷ ऐचीई ले मया आमचो ने सिद्ध होली कि आमके नियाय चो दिने हिम्मत होओ; कसनबल्लोने जसन हुन आय असने ची संवसार ने आमी बले आंव।

¹⁸ मया ने भय नी होये, मान्तर सिद्ध मया भय के दूर करून देऊ आय; कसनबल्लोने भय चो नाता डण्ड ले होऊ आय, आउर जोन भय करू आय हुन मया ने सिद्ध नी होला।

¹⁹ आमी ऐईकाजे मया करू आंव, कि पयले हुन आमचो ले मया करलो।

²⁰ अगर कोनी बले दे, “मय माहापुरू ले मया संगाऊ आय,” आउर आपलो भाई ले बईर संगा ओ तो हुन फंदी आय; कसनबल्लोने जोन आपलो भाई ले जेके हुन दकलो से मया नी संगाये, तो हुन माहापुरू ले बले जेके हुन नी दकलो मया नी संगाऊक सके।

²¹ हुनचो ले आमके ऐ हुकुम मिरली से, कि जोन कोनी माहापुरू ले मया संगाऊ आय हुन आपलो भाई ले बले मया संगा ओ।