1यूहन्ना 3 - Halbi

¹ दका, बुआ आमचो ले कसन मया करलो से कि आमी माहापुरू चो पिला बलाय जाऊ; आउर आमी आंव बले। ऐई लागुन संवसार आमके नी जाने, कसनबल्लोने हुन हुनके बले नी जानलो।

² हे लाड़रामन अदायं आमी माहापुरू चो पिला आंव, आउर ऐबे तक ऐ परकट नी होली कि आमी काय-काय होंआ! इतलो जानु से कि जिदलदाय हुन परकट होये दे तेबे आमी हुनचो असन होवां, कसनबल्लोने हुनके असने ची दक दे जसन हुन आसे।

³ आउर जोन कोनी हुनचो उपरे ऐ आशा संगाऊ आय, हुन आपन खुद के असने ची पवितर करू आय जसन हुन पवितर आय।

पाप आउर माहापुरू चो पिला

⁴ जोन कोनी पाप करू आय, हुन नियम चो बिरूद करू आय; आउर पाप तो नियम चो बिरूद आय।

⁵ तुमी जानेसास कि हुन ऐईकाजे परकट होली कि पापमन के हरून जाओ; आउर हुनचो आदत ने पाप निआय।

⁶ जोन कोनी हुन थाने बनुन रऊ आय, हुन पाप नी करे: जोन कोनी पाप करू आय, हुन ना तो हुनके दकलो से आउर ना हुनके जानलो से।

⁷ हे लेकामन, काचीई भरमातो ने नी ईआ। जोन धरम चो कामकरू आय, हुनी हुनचो असन धरमी आय।

⁸ जोन कोनी पाप करू आय हुन शयतान चो बाटले आय, कसनबल्लोने शयतान मुर ले ची पाप करते ईलो से। माहापुरू चो बेटा ऐईकाजे परकट होलो कि शयतान चो काममन के नाश करो।

⁹ जोन कोनी माहापुरू ले जनम लो से हुन पाप नी करे, कसनबल्लोने हुनचो बीज हुनचो थाने बनुन रऊ आय, आउर हुन पाप करूक नी सके कसनबल्लोने माहापुरू ले जनम लो से।

¹⁰ ऐचीई ले माहापुरू चो पिला आउर शयतान चो पिला जानाय जाऊ आत; जोन कोनी धरम चो काम नी करे हुन माहापुरू ले नुआय, आउर ना हुन जोन आपलो भाई ले मया नी संगाये।

आपस ने मया संगावा

¹¹ कसनबल्लोने जोन खबर तुमनमन मुर ले सुनलास, हुन ऐ आय कि आमी गोटक दुसर ले मया संगाऊ;

¹² आउर कैन चो असन नी बना जोन हुन दुष्ट ले रलो, आउर जोन आपलो भाई के घात करलो। आउर हुनके काय लागुन घात करलो? ऐई लागुन कि हुनचो काम खराप रये, आउर हुनचो भाई चो काम धरम चो रये।

¹³ हे भाईमन, अगर संवसार तुमके बईर करे से तो नी भक्याहा।

¹⁴ आमी जानु से कि आमी मरना ले नाकुन भाती जीवना ने अमरलु से; कसनबल्लोने आमी भाईमन ले मया संगाऊ आंव। जोन मया नी संगाये हुन मरना चो दसा ने रऊ आय।

¹⁵ जोन कोनी आपलो भाई ले बईर संगाऊ आय, हुन हत्यारा आय; आउर तुमी जानेसास कि कोनी हत्यारा ने अमर जीवना नी रये।

¹⁶ आमी तो मया ऐचीई ले जानलु कि हुन आमचो काजे आपलो जीव दिलो; आउर आमके बले भाईमन चो काजे परान देतोर आसे।

¹⁷ मान्तर जोन कोनी चो लगे संवसार चो धनमाल रओ आउर हुन आपलो भाई के कंगाल दकुन भाती हुनचो उपरे जीव दुकाऊक नी चाह ले, तेबे हुनचो थाने माहापुरू चो मया कसन बनुन रऊक सकु आय?

¹⁸ हे लेकामन, आमी बचन आउर जीब ची ले नाई, मान्तर काम आउर सत चो लागुन बले मया करूं।

माहापुरू चो पुरे साआस

¹⁹ ऐचीई ले आमी जानु दें कि आमी सत चो आंव; आउर जोन गोठ ने आमचो मन आमके दोष देये दे, हुनचो बारे ने आमी हुनचो पुरे आपलो मन के दिलासा देऊक सकवां;

²⁰ कसनबल्लोने माहापुरू आमचो मन ले बड़े आय, आउर सपाय काई जानु आय।

²¹ हे लाड़रा मन अगर आमचो मन आमके दोष नी देओ, तेबे आमके माहापुरू चो पुरे हिम्मत होऊ आय;

²² आउर जोन काई आमी मांगु आंव, हुन आमके हुनचो ले मिरू आय, कसनबल्लोने आमी हुनचो हुकुममन के मानु आंव आउर जोन हुनके भाऊ आय हुनी करू आंव।

²³ हुनचो हुकुम ऐ आय कि आमी हुनचो बेटा ईशु मसीह चो नाव थाने बिश्वास करूं, आउर जसन हुन आमके हुकुम दिलो से हुनचेई अनुसार आपस ने मया संगाहा।

²⁴ जोन हुनचो हुकुममन के मानु आय, हुन हुन थाने आउर हुन हुनमन ने बनुन रऊ आय: आउर ऐचीई ले, बल्लोने हुन आत्मा ले जोन हुन आमके दिलो से, आमी जानु से कि हुन आमचो ने बनुन रऊ आय।