1यूहन्ना 2 - Halbi

ईशु आमचो सायक

¹ हे मोचो लेकामन, मय ऐ गोठमन तुमके ऐईकाजे लिकें से कि तुमी पाप नी करा; आउर अगर कोनी पाप कर दे, तेबे बुआ चो लगे आमचो गोटक सायता करू आसे, बल्लोने धरमी ईशु मसीह;

² आउर हुनी आमचो पापमन चो पशतावा आय, आउर मात्र आमचो ची नाई मान्तर पुईतराय जगत चो पापमन चो बले।

माहापुरू चो हुकुममन

³ मान्तर आमी हुनचो हुकुममन के मानुन्दे, तेबे ऐचो ले आमी जानु दें कि आमी हुनके जानलु से।

⁴ जोन कोनी ऐ बोलु आय, “मय हुनके जानले से,” आउर हुनचो हुकुममन के नी माने, हुन फंदी आय आउर हुनचो ने सत निआय;

⁵ मान्तर जोन कोनी हुनचो बचन थाने चल दे, हुनचो ने सते माहापुरू चो मया सिद्ध होली से। ऐचीई ले आमी जानु आंव कि आमी हुन थाने आंसु।

⁶ जोन कोनी ऐ बोलु आय कि मय हुन थाने बनुन रऊँ आय, हुनके जरूरत आय कि खुद बले असने ची चलो जसन हुन चलते रलो।

सपाय ले मया करा

⁷ हे लाड़रामन, मय तुमके कोनी नवा हुकुम नी लिके, मान्तर हुनी जुना हुकुम जोन मुर ले तुमके मिरली से; ऐ जुना हुकुम हुन बचन आय जेके तुमनमन सुनलासास।

⁸ फेर बले मय तुमके नवा हुकुम लिकें से, आउर ऐ हुनचो ने आउर तुमचो ने सते ठेबु आय; कसनबल्लोने अंधार मेटते जाऊ आय आउर सत चो उजर अदायं बरूक मुरयाली से।

⁹ जोन कोनी बोलु आय कि मय उजर ने आसे आउर आपलो भाई ले बईर संगाऊ आय, हुन ऐबले अंधार ने ची आसे।

¹⁰ जोन कोनी आपलो भाई ले मया संगाऊ आय हुन उजर ने रऊ आय, आउर ठोकरना नी खाऊक सके।

¹¹ मान्तर जोन कोनी आपलो भाई ले बईर संगाऊ आय हुन अंधार ने आसे आउर अंधार ने चलु आय, आउर नी जाने कि काहां जाये से, कसनबल्लोने अंधार हुनचो आँईक आन्दा करून दिली से।

चिठ्ठी लिकतोर कारन

¹² हे लेकामन, मय तुमके ऐईकाजे लिकें से कि हुनचो नाव ले तुमचो पाप छमा होली से।

¹³ हे बुआमन, मय तुमके ऐईकाजे लिकें से कि जोन मुर ले आसे तुमी हुनके जानास। हे जुआनमन, मय तुमके ऐईकाजे लिकें से कि तुमनमन हुन दुष्ट उपरे जय पावलासास। हे लेकामन, मय तुमके ऐईकाजे लिकले से कि तुमी बुआ के जानुन गेलासास।

¹⁴ हे बुआमन, मय तुमके ऐईकाजे लिकले से कि जोन मुर ले आसे तुमी हुनके जानुन गेलासास। हे जुआनमन मय तुमके ऐईकाजे लिकले से कि तुमी बलवान हुआ, आउर माहापुरू चो बचन तुमनमन ने बनुन रऊ आय, आउर तुमी हुन दुष्ट थाने जय पावलासास।

संवसार चो बारे ने जनातोर

¹⁵ तुमी ना तो संवसार ले आउर नाहले जगत थानो तीजमन ले मया संगाहा। अगर कोनी संवसार ले मया संगाऊ आय, तेबे हुनचो थाने बुआ चो मया निआय।

¹⁶ कसनबल्लोने जोन काई संवसार ने आसे, बल्लोने देंह चो इच्छा आउर आँईक चो इच्छा जीवना चो घमण्ड, हुन बुआ चो बाटले नुआय मान्तर संवसार ही चो बाटले आय।

¹⁷ संवसार आउर हुनचो इच्छामन दुनो मेटते जाऊ आय, मान्तर जोन माहापुरू चो इच्छा थाने चलु आय हुन हरमेशा बनुन रये दे।

आखरी समया चो धोका

¹⁸ हे लेकामन, ऐ आखरी समया आय; जसन तुमनमन सुनलासास कि मसीह चो बिरोधी ऐतो बिता आय, हुनचो अनुसार ऐबे बले खुबे असन मसीह-बिरूदी उठून उबा होला सोत; ऐचो ले आमी जानु से कि ऐ आखरी समया आय।

¹⁹ हुनमन निकरला सोत तो आमची थानले, मान्तर आमीमन थानचो रला नाई; कसनबल्लोने माना हुनमन आमीमन थानो होता, तेबे आमचो संगे रता; मान्तर निकरून ऐईकाजे गेला कि ऐ परकट होओ कि हुनमन सपाय आमीमन थानो नुआत।

²⁰ मान्तर तुमचो तो हुन पवितर ले अभिषेक होली से, आउर तुमी सपाय काई जानेसास।

²¹ मय तुमके ऐईकाजे नी लिकले कि तुमी सत के नी जानास, मान्तर ऐईकाजे कि हुनके जानास, आउर ऐईकाजे कि कोनी फंद, सत चो बाटले नुआय।

²² फंदी कोन आय? मात्र हुन जोन ईशु के मसीह होतोर ले इन्कार करू आय; आउर मसीह चो बिरोधी हुनी आय, जोन बुआ चो आउर बेटा चो इन्कार करू आय।

²³ जोन कोनी बेटा चो इन्कार करू आय हुनचो लगे बुआ बले निआय: जोन बेटा के मानु आय, हुनचो लगे बुआ बले आसे।

²⁴ जोन काई तुमी मुर ले सुनलासास, हुनी तुमचो ने बनुन रओ; जोन तुमी मुर ले सुनलासास, अगर हुन तुमचो ने बनुन रओ तेबे तुमी बले बेटा ने आउर बुआ ने बनुन राआ से।

अमर जीवना चो बायदा

²⁵ आउर जेचो हुन आमचो ले बायदा करलो हुन अमर जीवना आय।

²⁶ मय ऐ गोठमन तुमके हुनमन चो बारे ने लिकले से, जोन तुमके भरमाऊ आत;

²⁷ मान्तर तुमचो हुन अभिषेक जोन हुनचो बाटले कराए गेली, तुमचो ने बनुन रऊ आय; आउर तुमके ऐचो जरूरत निआय कि कोनी तुमके सिका ओत, बल्लोने जसन हुन अभिषेक जोन हुनचो बाटले कराए गेली तुमके सपाय गोठमन सिकाऊ आय, आउर ऐ सते आय आउर फंद नुआय; आउर जसन हुन तुमके सिका लो से हुसने ची तुमी हुन थाने बनुन रऊ आहास।

माहापुरू चो पिला

²⁸ आउर हे लेकामन, हुनचो थाने बनुन राहा कि जिदलदाय हुन परकट होओ तो आमके साआस होओ, आउर आमी हुनचो ईलो ने हुनचो पुरे लाज नी होऊ।

²⁹ अगर तुमी जानेसास, कि हुन धरमी आय, तेबे ऐ बले जाना कि जोन कोनी धरम चो कामकरू आय हुन हुनचो ले जनम लो से।