1यूहन्ना 1 - Halbi

जीवना चो बचन के सांगतोर

¹ हुन जीवना चो बचन चो बारे ने जोन मुर ले रये, जेके आमीमन सुनलु, आउर जेके आपलो आँईकमन ले दकलु, बल्लोने जेके आमीमन धिआन ले दकलु आउर हाथमन ले छिंवलु।

² ऐ जीवना परकट होली, आउर आमीमन हुनके दकलु, आउर हुनचो गोहई देऊ से, आउर तुमके हुन अमर जिवना चो खबर देऊ से जोन बुआ चो संगे रये आउर आमचो उपरे परकट होलो।

³ जोन काई आमीमन दकलु आउर सुनलु से हुनचो खबर तुमके बले देऊ से, ऐईकाजे कि तुमी बले आमचो संगे शामिल हुआ; आउर आमचो ऐ सामिलता बुआ चो संगे आउर हुनचो बेटा ईशु मसीह चो संगे आय।

⁴ आउर ऐ गोठमन आमी ऐईकाजे लिकु से कि आमचो हरिक पुरा होऊन जाओ।

माहापुरू चो संगे शामिल होतोर

⁵ जोन खबर आमीमन हुनचो ले सुनलु आउर तुमके सुनाऊ से, हुन ऐ आय कि माहापुरू उजर आय आउर हुनचो ने काई बले अंधार निआय।

⁶ अगर आमी बोलुन्दे कि हुनचो संगे आमचो शामिल आसे आउर फेर अंधार ने चलले, तेबे आमी फंदी आंव आउर सत थाने नी चलु,

⁷ मान्तर अगर जसन हुन उजर ने आसे, असने ची आमी बले उजर ने चलुन्दे, तेबे गोटक दुसर ले सामिलता संगाऊ आव, आउर हुनचो बेटा ईशु चो लऊ आमके सपाय पापमन ले शुद्ध करू आय।

⁸ मान्तर आमी बोलुन्दे कि आमचो थाने काई बले पाप निआय, तेबे आपन खुद के धोका देऊ से, आउर आमचो ने सत निआय।

⁹ मान्तर आमी आपलो पापमन के मानुन्दे, तेबे हुन आमचो पापमन के छमा करतो आउर आमके सपाय अधरम ले शुद्ध करतो ने बिश्वास लायक आउर धरमी आय।

¹⁰ अगर आमी बोलुन्दे कि आमीमन पाप नी करलु, तेबे हुनके फंदी ठेबाऊ आय, आउर हुनचो बचन आमचो ने निआय।