1 कुरिन्थियो 8 - Halbi

चेगालो बिती भात

¹ अदायं मुरतीमन चो पुरे पुजलो बिती तीजमन चो बारे ने आमी जानु से कि आमी सपाय के गिआन आसे। गिआन घमण्ड पयदा करू आय, मान्तर मया ले उन्नति होऊ आय।

² अगर कोनी समजो कि मय काई जाने, जसन जानतोर आय असने ऐबले नी जाने।

³ मान्तर अगर कोनी माहापुरू ले मया संगाऊ आय, तेबे माहापुरू हुनके चिताऊ आय।

⁴ आउर मुरतीमन चो पुरे पुजलो बिती तीजमन के खातोर बारे ने आमी जानु से कि मुरती जगत ने कोनी तीज नुआय, आउर गोटक के छांडुन आउर कोनी माहापुरू निआत।

⁵ अगर बादरी ने आउर धरतनी थाने खुबे असन ईश्पर बलाऊ आत जसन कि खुबे असन ईश्पर आउर खुबे असन परबु आसोत

⁶ तेबले बले आमचो काजे तो गोटक ची माहापुरू आसे: बल्लोने बुआ जेचो बाटले सपाय तीजमन आसोत, आउर आमी हुनचेई काजे आंसु। आउर गोटक ची परबु आय, बल्लोने ईशु मसीह जेचो बाटले सपाय तीजमन होली, आउर आमी बले हुनचेई बाटले आंव।

⁷ मान्तर सपाय के ऐ गिआन निआय, मान्तर कितरो तो ऐबले मुरतीमन के काई समजतोर कारन मुरतीमन चो पुरे पुजलो बिती तीज के काई समजुन भाती खाऊ आत, आउर हुनमन चो बिबक कमजोर होतोर लागुन अशुद्ध होऊन जाऊ आय।

⁸ भात आमके माहापुरू चो लगे नी अमराये। अगर आमी नी खाऊ तेबे आमचो काई नुकसान नुआय, आउर अगर खाऊँ दे तेबे काई लाब निआय।

⁹ मान्तर चेत ने राहा! असन नी होओ कि तुमचो ऐ छुटछाड़ा काहांय कमजोरमन चो काजे ठोकरना चो कारन होऊन जाओ।

¹⁰ कसनबल्लोने अगर कोनी तुय गिआनी के मुरती चो मंदिर ने भात खाते दकोत आउर हुन कमजोर जन होओ, तेबे काय हुनचो बिबक के मुरती चो पुरे पुजा करलो बिती चो तीज खातोर साहास नी होयेदे।

¹¹ ऐ रीति ले तुचो गिआन चो कारन हुन कमजोर भाई जेचो काजे मसीह मरलो, नष्ट होऊन जायेदे।

¹² ऐई परकार भाईमन चो बिरूद अपराध करतोर ले आउर हुनचो कमजोर बिबक के घाव पहुँचातो ने, तुमी मसीह चो बिरूद अपराध करू आस।

¹³ ऐ लागुन ऐई भात मोचो भाईमन के ठोकरना खुआ ओ, तेबे मय केबीई कोनी रीति ले मास नी खाये, नी होओ कि मय आपलो भाई चो काजे ठोकरना चो कारन बनेंदें।