1 कुरिन्थियो 7 - Halbi

बिहा चो असुल

¹ हुन गोठमन चो बारे ने जोन तुमनमन लिकलास, ऐ अच्छा आय कि माने बायले लेकी के नी छिंवो।

² मान्तर बेबीचार चो डर ले हरकोनी माने चो बायले, आउर हरकोनी बायले लेकी चो मनुक होओ।

³ मनुक आपलो बायले चो हक पुरा करो; आउर असने ची बायले बले आपलो मनुक चो।

⁴ बायले के आपलो देंह उपरे अधिकार निआय मान्तर हुनचो मनुक चो अधिकार आसे; असने ची मनुक के बले आपलो देंह उपरे अधिकार निआय, मान्तर बायले चो आसे।

⁵ तुमी एक दुसर ले अलग नी राहा; मान्तर मात्र खिन्डिक समया ले आपस चो सलाह ले कि पारथना चो काजे छुट्टी मिरो, आउर फेर गोटक संगे राहा; असन नी होओ कि तुमचो अधिरजा चो लागुन शयतान तुमके परको।

⁶ मान्तर मय जोन ऐ बलेंसें हुन अनुमती आसे ना कि हुकुम।

⁷ मय ऐ चाहायें से कि जसन मय आंय, असने ची सपाय माने होओत; मान्तर हरकोनी के माहापुरू चो बाटले अच्छा-अच्छा बर मिरली से; कोनी के कोनी परकार चो, आउर कोनी के कोनी आउर परकार चो।

ठेंगवामन चो काजे सला

⁸ मान्तर मय ठेंगवामन आउर रान्डीमन चो बारे ने बलेंसें कि हुनमन चो काजे असने ची रतोर अच्छा आय, जसन मय आसे।

⁹ मान्तर अगर हुनमन सहन नी करूक सकोत तो बिहा करोत; कसनबल्लोने बिहा करतोर जुआन रलो ले अच्छा आय।

बिहातामन चो काजे सला

¹⁰ जेचो बिहा होली से, हुनमन के मय नाई, मान्तर परबु हुकुम देये से कि बायले आपलो मनुक ले अलग नी होओ

¹¹ आउर अगर अलग बले होऊन जाओत, तेबे बिन बिहा करून रओत; नाहले आपलो मनुक ले फेर मिलन करोत आउर ना मनुक आपलो बायले के छांडो।

¹² दुसरमन ले परबु नाई मान्तर मय ची बलेंसें, अगर कोनी भाई चो बायले बिश्वास नी संगाये आउर हुनचो संगे रतो ने हरिक होओ, तेबे हुन हुनके नी छांडो।

¹³ जोन बायले लेकी चो मनुक बिश्वास नी संगाये, आउर हुनचो संगे रतोर ने हरिक होओ; हुन मनुक के नी छांडो।

¹⁴ कसनबल्लोने असन मनुक जोन बिश्वास नी संगाये, हुन बायले चो लागुन पवितर ठेबु आय; आउर असन बायले जोन बिश्वास नी संगाये, मनुक चो लागुन पवितर ठेबु आय; नाहले तुमचो पिला-झिला अशुद्ध होता, मान्तर अदायं तो पवितर आसोत।

¹⁵ मान्तर जोन माने बिश्वास नी संगाये, अगर हुन अलगे होओ तो अलगे होऊक दिआस, असन दसा ने कोनी भाई नाहले भईन गांट ने निआत। माहापुरू आमके मिला-मिसा चो काजे हाग दिलो से।

¹⁶ कसनबल्लोने हे बायले लेकी, तुय काय जानीस कि तुय आपलो मनुक चो मुक्ति करा से? आउर हे माने, तुय काय जानीस कि तुय आपलो बायले चो मुक्ति करा से?

माहापुरू चो हाग दिलोर अनुसार चला

¹⁷ जसन परबु हरकोनी के बाटलो से, आउर जसन माहापुरू हरकोनी के हाग दिलो से, असने ची हुन चलो। मय सपाय कलीसियामन ने असने ची ठेबायें से।

¹⁸ जोन खतना करलोर हाग दिआ गेलो से, हुन बिन खतना नी बनो। जोन बिन खतना हाग दिलोर आसे, हुन खतना नी कराओ।

¹⁹ ना खतना काई आय आउर ना बिन खतना, मान्तर माहापुरू चो हुकुममन के मानतोर ची सपाय काई आय।

²⁰ हरकोनी जन जोन हाल ने हाग दिलोर आसे, हुनी थाने रओत।

²¹ अगर तुय दास चो हाल ने हाग दिलोर आसीत तो चिन्ता निकर; मान्तर अगर तुय छुटछाड़ा होऊक सकसे, तो असने ची काम कर।

²² कसनबल्लोने जोन दास चो हाल ने परबु ने हाग दिलोर आसे, हुन परबु चो छुटछाड़ा करलोर आय। असने ची जोन छुटछाड़ा चो हाल ने हाग दिलोर आसे, हुन मसीह चो दास आय।

²³ तुमी दाम देऊन भाती घेनलोर आस; मानेमन चो दास नी बना।

²⁴ हे भाईमन जोन कोनी जोन हाल ने हाग दिलोर आसे, हुन हुनी थाने माहापुरू चो संगे रओ।

बिहा सम्बंध सवालमन चो जबाप

²⁵ कुंआरीमन चो बारे ने परबु चो काई हुकुम मोके नी मिरली, मान्तर बिश्वास लायक होतोर काजे जसन दया परबु मोचो उपरे करलो से, हुनचेई अनुसार सहमती देयें से।

²⁶ मोचो समज ने ऐ अच्छा आय कि आजी काली कलेश चो लागुन, माने जसन आय असने ची रओ।

²⁷ अगर तुचो बायले आसे, तो हुनचो ले अलग होतोर कोशिश नी कर; आउर अगर तुचो बायले निआय; तो बायले चो खोज नी कर।

²⁸ मान्तर अगर तुय बिहा बले कर से, तो पाप नुआय; आउर अगर कुंआरी बिहा होओ तो काई पाप नुआय। मान्तर असनमन के देंह चो दुख होयेदे, आउर मय बचातोर चाहायें से।

²⁹ हे भाईमन, मय ऐ बलेंसें कि समया कम करा गेलोर आसे, ऐईकाजे जरूरी आय कि जोनमन चो बायले आसोत, हुनमन असन होओत माना हुनमन चो बायले निआत;

³⁰ आउर गागतो बिता असन होओत, माना गागेत नाई; आउर हरिक करतो बिता असन होओत, माना हरिक नी करोत; आउर घेनतो बिता असन होओत, माना हुनचो लगे काई आसे ची नाई।

³¹ आउर ऐ संवसार चो संगे बेवहार करतो बितामन असन होओत, कि संवसार चो ची नी होओत; कसनबल्लोने ऐ संवसार चो रीति आउर बेवहार बदलते जाऊ आय।

³² आउर मय ऐ चाहाऊं आंय कि तुमके चिन्ता नी होओ। ठेंगवा माने परबु चो गोठमन चो चिन्ता ने रऊ आय कि परबु के कसन हरिक संगायदे।

³³ मान्तर बिहाता माने संवसार चो गोठमन चो चिन्ता ने रऊ आय कि आपलो बायले के कोन रीति ले हरिक संगायें दें।

³⁴ बिहाता आउर कुंआरी ने बले भेद आसे: कुंआरी परबु चो चिन्ता ने रऊ आय कि हुन देंह आउर आत्मा दुनो ने पवितर होओ, मान्तर बिहाता संवसार चो चिन्ता ने रऊ आय कि आपलो मनुक के हरिक संगाओ।

³⁵ मय ऐ गोठ तुमची लाब चो काजे बलेंसें, ना कि तुमके फांसतो काजे, मान्तर ऐईकाजे कि जसन सोभा देऊ आय असने ची करा जाओ, कि तुमी गोटक मन होऊन भाती परबु चो सेवा ने लगु राआ।

³⁶ अगर कोनी ऐ समजो कि मय आपलो हुन कुंआरी चो हक मारे से, जेचो उमर घटे से, आउर जरूरी बले होओ, तेबे जसन चाह ले हुसन करो, ऐ थाने पाप निआय, हुन हुनचो बिहा होऊक देओ।

³⁷ मान्तर जोन मन ने जमखम रऊ आय, आउर हुनके जरूरत नी होओ, मान्तर आपलो इच्छा उपरे अधिकार संगाओ, आउर आपलो मन ने ऐ गोठ ठानुन रओ कि हुन आपलो कुंआरी लेकी के ठेंगवा संगायेदे, हुन अच्छा करू आय।

³⁸ ऐईकाजे जोन आपलो कुंआरी चो बिहा करून देऊ आय, हुन अच्छा करू आय, आउर जोन बिहा नी करून देये, हुन आउर बले अच्छा करू आय।

³⁹ जिदलदाय ले कोनी बायले लेकी चो मनुक जीव रऊ आय, हुदलदाय ले हुन हुनचो ले बन्दली से; मान्तर अगर हुनचो मनुक मरून जाओ तेबे जोन के चाह ले बिहा करूक सके, मान्तर मात्र परबु ने।

⁴⁰ मान्तर जसन आसे अगर असने ची रओ, तो मोचो बिचार ने आउर बले धन्य आय; आउर मय समजें से कि माहापुरू चो आत्मा मोचो ने बले आसे।