1 कुरिन्थियो 6 - Halbi

आपसी झगड़ा मन चो निपटारा

¹ काय तुमचो ले कोनी के ऐ हिम्मत आसे कि जिदलदाय दुसर चो संगे झगड़ा हुआ, तो नियाय चो काजे अधरमीमन चो लगे जाओ आउर पवितर लोगमन चो लगे नी जाओ?

² काय तुमी नी जानास कि पवितर लोग जगत चो नियाय करदे? ऐईकाजे जिदलदाय तुमके जगत चो नियाय करतोर होयेदे, तेबे काय तुमी नानी ले नानी झगड़ा चो बले फयसला करतोर लायक नुआस?

³ काय तुमी नी जानास कि आमी सरग दूतमन चो नियाय करूंदे? तेबे काय संवसार चो गोठमन चो फयसला नी करू?

⁴ अगर तुमके जगत चो गोठमन चो फयसला करतोर होओ, तेबे काय हुनीमन के बसाआ से जोन कलीसिया ने काई नी समजा जाओत?

⁵ मय तुमके लाज करतो काजे ऐ बलेंसें। काय सत-सत तुमनमन ने गोटक बले अकल बिता नी मिरे, जोन आपलो भाईमन चो फयसला करूक सको?

⁶ तुमनमन ने भाई-भाई ने पेशी होऊ आय, आउर हुन बले बिश्वासिमन चो पुरे।

⁷ मान्तर सत-सत तुमनमन ने बड़े दोष तो ऐ आय कि आपस ने पेशी करू आहास। अनियाय केंव नी सहास? आपलो हानि केंव नी सहास?

⁸ मान्तर तुमी तो खुद अनियाय करू आस आउर हानि पहुँचाऊ आस, आउर हुन बले भाईमन के।

⁹ काय तुमी नी जानास कि अनियायी लोग माहापुरू चो राज चो हकदार नी होदे? धोका नी खाआ; ना बेश्यागामी, ना मुरती पुजा करू, ना दुसर चो बायले नेतो बिता, ना लुच, ना पुरूषगामी,

¹⁰ ना चोर, ना लोभीई, ना मतवार, ना झगड़ा करतो बिता, ना नशातो बितामन माहापुरू चो राज चो बेटा होदे।

¹¹ आउर तुमनमन ले कितरो असने ची रवत, मान्तर तुमी परबु ईशु मसीह चो नाव ले आउर आमचो माहापुरू चो आत्मा ले धुआ गेलास आउर पवितर होलास आउर धरमी ठेबलास।

देंह आउर आत्मा ने माहापुरू चो महिमा

¹² सपाय तीजमन मोचो काजे नगत तो आत, मान्तर सपाय तीजमन लाब चो नुआत; सपाय तीजमन मोचो काजे अच्छा आत, मान्तर मय कोनी गोठ चो अधीन ने नी होयें।

¹³ भात पेट चो काजे, आउर पेट भात काजे आय, मान्तर माहापुरू ऐके आउर हुनके दुनो के नष्ट करे दे। मान्तर देंह बेबीचार चो काजे नुआय, मान्तर परबु चो काजे आय, आउर परबु देंह चो काजे आय।

¹⁴ माहापुरू आपलो सामरत ले परबु के जिआलो, आउर आमके बले जीआये दे।

¹⁵ काय तुमी नी जानास कि तुमचो देंह मसीह चो अंग आय? तो काय मय मसीह चो अंग धरून भाती हुनमन के बेश्या चो अंग बनायेंदें? केबीई नाई।

¹⁶ काय तुमी नी जानास कि जोन कोनी बेश्या ले संगत करू आय, हुन हुनचो संगे गोटक देंह होऊ आय? कसनबल्लोने लिकलोर आसे, “हुनमन दुनो गोटक देंह होदे।”

¹⁷ आउर जोन परबु चो संगत ने रऊ आय, हुन हुनचो संगे गोटक आत्मा होऊ आय।

¹⁸ बेबीचार ले बाचु राहा। जितरो दुसर पाप माने करू आय हुन देंह चो बाहरे आय, मान्तर बेबीचार करतो बिता आपली देंह चो बिरूद पाप करू आय।

¹⁹ काय तुमी नी जानास कि तुमचो देंह पवितर आत्मा चो मंदिर आय, जोन तुमनमन ने बसली से आउर तुमके माहापुरू चो बाटले मिरली से; आउर तुमी आपलो नुआस?

²⁰ कसनबल्लोने दाम देऊन घेनाय गेलासास, ऐईकाजे आपलो देंह चो बाटले माहापुरू चो महिमा करा।