1 कुरिन्थियो 5 - Halbi

कलीसिया ने खराप नीति सदस्य

¹ ऐथा ले सुनतो ने ऐऊ आय कि तुमचो ने बेबीचार होऊ आय, मान्तर असन बेबीचार जोन दुसर जातिमन ने बले नी होये कि गोटक माने आपलो बुआ चो बायले के संगाऊ आय।

² आउर तुमी दुक तो नी करास, जेचो ले असन काम करतो बिता तुमचो मंजी थानले निकराया जातो, मान्तर घमण्ड करू आहास।

³ मय तो देंह चो दशा ले लापी रये, मान्तर आत्मा चो दशा ले तुमचो संगे होऊन भाती माना हाजिर चो दशा ने असन काम करतो बितामन चो बारे ने ऐ हुकुम देउन चुकले से

⁴ कि जिदलदाय तुमी आउर मोचो आत्मा, आमचो परबु ईशु चो सामरत चो संगे रूंड़ा आसास, तेबे असन माने आमचो परबु ईशु चो नाव ले

⁵ देंह चो बिनाश चो काजे शयतान के सोपा जाओ, बल्ले हुनचो आत्मा परबु ईशु चो दिन ने मुक्ति पाओ।

⁶ तुमचो घमण्ड करतोर अच्छा नुआय; काय तुमी नी जानास कि खिन्डिक असन खमीर पुईतराय चटकलो बिती आंटा के खमीर करून देऊ आय।

⁷ जुना खमीर निकराऊन भाती आपन खुद के शुद्ध करा कि नवा चटकलो बिती आंटा बनुन जाहा; बल्ले तुमी अखमीरी हुआ। कसनबल्लोने आमचो बले फसह, जोन मसीह आय, बलिदान होलो से।

⁸ ऐईकाजे ईआ, आमी तिआर ने हरिक मनाऊ, ना तो जुना खमीर ले आउर ना खराप आउर दुष्टता चो खमीर ले, मान्तर सीदा आउर सत चो अखमीरी रोटी ले।

खराप नीति काजे नियाय

⁹ मय आपलो चिठ्ठी ने तुमके लिकले से कि बेबीचारीमन चो संगत नी करा।

¹⁰ ऐ नाई कि तुमी बिलकुल ऐ जगत चो बेबीचारीमन, नाहले लोभाहामन, नाहले अंधार करतो बितामन, नाहले मुरती पुजा करूमन चो संगत नी करा; कसनबल्लोने ऐ दसा ने तो तुमके जगत थानले निकरून जातोर ची पड़ती।

¹¹ मान्तर मोचो कहना ऐ आय कि अगर कोनी भाई बलाय होऊन भाती, बेबीचारी, नाहले लोभाहा, नाहले मुरती पुजा करू, नाहले झगड़ा करतो बिता, नाहले मतवार, नाहले अंधार करू बिता होओ, तेबे हुनचो संगत नी कर; मान्तर असन माने चो संगे भात बले नी खा।

¹² कसनबल्लोने मोके बाहार बितामन चो नियाय करतोर ले काय काम? काय तुमी भीतर बितामन चो नियाय नी करास?

¹³ मान्तर बाहार बितामन चो नियाय माहापुरू करू आय। ऐईकाजे हुन कुकरमी के आपलो मंजी ले निकराऊन दिआस।