1 कुरिन्थियो 4 - Halbi

मसीह चो बिश्वास लायक भण्डारी

¹ माने आमके मसीह चो सेवक आउर माहापुरू चो भेदमन चो भण्डारी समजोत।

² फेर ऐथा भण्डारी ने ऐ गोठ दका जाऊ आय कि हुन बिश्वास लायक होओ।

³ मान्तर मोचो नजर ने ऐ खुबे नानी गोठ आय कि तुमी नाहले मानेमन चो कोनी नियाय करू मोके परको, मान्तर मय खुद आपन खुद के नी परके।

⁴ कसनबल्लोने मोचो मन मोके कोनी गोठ ने दोषी नी ठेबा ये, मान्तर ऐचो ले मय बेकसूर नी ठेबे, कसनबल्लोने मोचो परकतो बिता परबु आय।

⁵ ऐईकाजे जिदलदाय दाय ले परबु नी ऐये, समया ले पयले कोनी गोठ चो नियाय नी करा: हुनी अंधार चो लुकलो गोठमन उजर ने दकाय दे, आउर मनमन चो बिचारमन के परकट करे दे, तेबे माहापुरू चो बाटले हरकोनी चो बड़ाई होये दे।

मसीह चो काजे मुरूक

⁶ हे भाईमन, मय ऐ गोठमन ने तुमचो काजे आपलो आउर अपुल्लोस चो चरचा कहनी चो रीति थाने करले से, ऐईकाजे कि तुमी आमचो दुवारा ऐ सिका कि लिकलो बिती ले पुरे नी बड़ा, आउर गोटक चो पक्ष ने आउर दुसर चो बिरूद ने गर्व नी करा।

⁷ कसनबल्लोने तुचो ने आउर दुसर ने कोन भेद करू आय? आउर तुचो लगे काय आसे जोन तुय (दुसर ले) नी पावलीस? आउर तुचो लगे काय आसे जोन तुय (दुसर ले) पावली सीस, तो असन घमण्ड केंव करू आस कि माना नी पावलीस?

⁸ तुमी तो संतुष्ट होऊन चुकलास, तुमी सवकार होऊन चुकलास, तुमी आमचो नाहलोर राज करलास; मान्तर नुकु होती कि तुमी राज करतास कि आमी बले तुमचो संगे राज करतु।

⁹ मोचो समज ने माहापुरू आमी पठालोबितामन के सपाय चो पाचे हुन लोगमन चो असन ठेबालो से, जेचो मरना चो हुकुम होऊन चुकली से; कसनबल्लोने आमी जगत आउर सरग दूतमन आउर मानेमन चो काजे गोटक नाटवा ठेबलु से।

¹⁰ आमी मसीह चो काजे मुरूक आंव, मान्तर तुमी मसीह ने अकल बितामन आस; आमी कमजोर आंव, मान्तर तुमी बलवान आस। तुमी ईजीत पाऊ आस, मान्तर आमी निरादर होऊ आंव।

¹¹ आमी ऐ घड़ी ले भुके पिआस आउर बिन फटीई आंसु, आउर ठुसामन खाऊँ से आउर गलिन-गलिन फिरू से;

¹² आउर आपली ची हाथमन ले काम करून मसागत करू आंव। लोग आमके खराप बोलु आत, आमी आशीष देऊ आंव; हुनमन कन्दराऊ आत, आमी सहु आंव।

¹³ हुनमन बदनाम करू आत, आमी बिनती करू आंव। आमी आजी तक जगत चो कचरा आउर सपाय तीजमन चो बाचलो कुचलो समान ठेबु आंव।

मसीह चो पाटे हिन्ड़तोर पौलुस चो सला

¹⁴ मय तुमके लाज करतो काजे ऐ गोठमन नी लिके, मान्तर आपलो लाड़रा लेका जानुन भाती तुमके जनायें से।

¹⁵ कसनबल्लोने अगर मसीह ने तुमचो सिकातो बिता दस हजार बले होता, तेबले बले तुमचो बुआ खुबे असन निआत, ऐईकाजे कि मसीह ईशु ने नगतखबर चो दुवारा मय तुमचो बुआ होले।

¹⁶ ऐईकाजे मय तुमनमन ले बिनती करे से कि मोचो असन चाल चला।

¹⁷ ऐईकाजे मय तीमुथियुस के जोन परबु ने मोचो लाड़रा आउर बिश्वास लायक बेटा आय, तुमचो लगे पठाले से। हुन तुमके मसीह ने मोचो गुन सुरता कराये दे, जसन कि मय हर जगा हरकोनी कलीसिया ने उपदेश करू आय।

¹⁸ कितलो तो असन फुलुन गेला से, माना मय तुमचो लगे ऐतोर ची नाई।

¹⁹ मान्तर परबु चाहा ओ तो मय तुमचो लगे झटके ची ऐयें दें, आउर हुन फुललो बितामन चो गोठमन के नाई, मान्तर हुनमन चो सामरत के जाने दे।

²⁰ कसनबल्लोने माहापुरू चो राज गोठमन ने नाई मान्तर सामरत ने आसे।

²¹ तुमी काय चाहायसास? काय मय बड़गी धरून भाती तुमचो लगे ऐऊ आंय, नाहले मया आउर नम्रता चो आत्मा चो संगे?