1 कुरिन्थियो 3 - Halbi

मानेमन चो पाटे हिन्ड़तोर नुकु नुआय

¹ हे भाईमन, मय तुमनमन ले ऐ रीति ले गोठयाऊक नी सकले जसन आत्मिक लोगमन ले, मान्तर जसन शारीरिक लोगमन ले, आउर हुनमन ले जोन मसीह ने लेका आसोत।

² मय तुमके गोरस पिआ ले, अरन नी खुआले; कसनबल्लोने तुमी हुनके नी खाऊक सकते रलास; मान्तर ऐबले बले नी खाऊक सकास,

³ कसनबल्लोने ऐबले शारीरिक आस। ऐईकाजे कि जसन तुमचो थाने डाह आउर झगड़ा आसे, तो काय तुमी शारीरिक नुआस? आउर काय देंह चो रीति थाने नी चलास?

⁴ कसनबल्लोने जिदलदाय गोटक बोलु आय, “मय पौलुस चो आय,” आउर दुसर, “मय अपुल्लोस चो आय,” तो काय तुमी माने नुआस?

माहापुरू चो दासमन चो पयचान

⁵ अपुल्लोस काय आय? आउर पौलुस काय आय? मात्र सेवक, जेचो दुवारा तुमी बिश्वास करलास, जसन हरकोनी के परबु दिलो।

⁶ मय लगाले, अपुल्लोस सींचलो, मान्तर माहापुरू बड़ालो।

⁷ ऐईकाजे ना तो लगातो बिता काई आय आउर ना सींचतो बिता, मान्तर माहापुरू ची सपाय काई आय जोन बड़ाऊ बिता आय।

⁸ लगातो बिता आउर सींचतो बिता दुनो गोटक आत; मान्तर हरकोनी माने आपलो ची मसागत चो अनुसार आपलो ची भुती पाये दे।

⁹ कसनबल्लोने आमी माहापुरू चो सहकरमी आंव; तुमी माहापुरू चो खेती आउर माहापुरू चो बनावटी आस।

¹⁰ माहापुरू चो हुन अनुग्रह चो अनुसार जोन मोके दिया गेली, मय अकल बितामन राजमिस्त्रीमन चो समान पाया डालले, आउर दुसर हुन थाने रदा संगाऊ आय। मान्तर हरकोनी माने चलाक रओ कि हुन हुन थाने कसन रदा संगाय से।

¹¹ कसनबल्लोने हुन पाया के छांडुन जोन पढ़ली से, आउर हुन ईशु मसीह आय, कोनी दुसर पाया नी डालुक सके।

¹² अगर कोनी ऐ पाया थाने सोना नाहले चाँदी नाहले बड़े मोल पकना नाहले काट नाहले लाटा नाहले बुटा चो रदा संगा ओ,

¹³ तेबे हरकोनी चो काम परकट होऊन जाय दे; कसनबल्लोने हुन दिन हुनके सांगे दे, ऐईकाजे कि आईग चो संगे परकट होये दे आउर हुन आईग हरकोनी चो काम जाचे दे कि कसन आय।

¹⁴ जेचो काम हुनचो थाने बनुन थीर रये दे, हुन भुती पाये दे।

¹⁵ अगर काचीई काम जरून जाय दे, तो हुन हानि उठाये दे; मान्तर हुन खुद बाचुन जाय दे मान्तर जरते-जरते।

¹⁶ काय तुमी नी जानास कि तुमी माहापुरू चो मंदिर आहास, आउर माहापुरू चो आत्मा तुमचो थाने वास करू आय?

¹⁷ अगर कोनी माहापुरू चो मंदिर के नष्ट करे दे तो माहापुरू हुनके नष्ट करे दे, कसनबल्लोने माहापुरू चो मंदिर पवितर आय, आउर हुन तुमी आहास।

जगत चो गिआन ले बचा

¹⁸ कोनी आपन खुद के धोका नी दिआस। अगर तुमचो थानले कोनी ऐ संवसार ने आपन खुद के गिआनी समजो, तो मुरूक बनो कि गिआनी होऊन जाओ।

¹⁹ कसनबल्लोने ऐ संवसार चो गिआन माहापुरू चो लगे मुरूकता आय, जसन लिकलोर आसे, “हुन गिआनिमन के हुनमन चो चलाकी ने फासुन देऊ आय,”

²⁰ आउर फेर, “परबु गिआनिमन चो बिचारमन के जानु आय कि हुनमन फकाहा आत।”

²¹ ऐईकाजे मानेमन थाने कोनी घमण्ड नी करोत, कसनबल्लोने सपाय काई तुमचो आय।

²² काय पौलुस, काय अपुल्लोस, काय कयफा, काय जगत, काय जीवना, काय मरना, काय वर्तमान, काय अगम, सपाय काई तुमचो आय,

²³ आउर तुमी मसीह चो आस, आउर मसीह माहापुरू चो आय।