1 कुरिन्थियो 2 - Halbi

पौलुस चो उपदेश

¹ हे भाईमन, जिदलदाय मय माहापुरू चो भेद सुनाते-सुनाते तुमचो लगे ईले, तो शब्दमन नाहले गिआन चो उत्तमता चो संगे नी ईले।

² कसनबल्लोने मय ऐ ठानुन रये कि तुमचो मंजी ईशु मसीह मान्तर कुरूस थाने चेगालोर मसीह के छांडुन आउर कोनी गोठ के नी जाने।

³ मय कमजोरी आउर डर चो संगे, आउर खुबे थरथरुन-थरथरुन तुमचो संगे रले;

⁴ आउर मोचो बचन, आउर मोचो परचार ने गिआन चो ललचातो बिती गोठमन निआय, मान्तर आत्मा आउर सामरत चो साकी गुआ रये,

⁵ ऐईकाजे कि तुमचो बिश्वास मानेमन चो गिआन थाने नाई, मान्तर माहापुरू चो सामरत थाने निरभर होओ।

आत्मिक गिआन

⁶ फेर बले सिद्ध लोगमन ने आमी गिआन सुनु आंव, मान्तर ऐ संवसार चो आउर ऐ संवसार चो नाश होतो बितामन हाकिममन चो गिआन नुआय;

⁷ मान्तर आमी माहापुरू चो हुन गुपत गिआन, भेद चो रीति थाने सांगु आंव, जेके माहापुरू जुग-जुग ले आमचो महिमा चो काजे ठेबालो।

⁸ जेके ऐ संवसार चो हाकिममन थानले कोनी नी जानला, कसनबल्लोने अगर हुनमन जानता तो चमक परबु के कुरूस थाने नी चेगाता।

⁹ मान्तर जसन लिकलोर आसे, “जोन गोठमन आँईकमन नी दकली आउर कान नी सुनली, आउर जोन गोठमन माने चो मन ने नी चेगली, हुनीमन ची आत जोन माहापुरू आपलो मया संगातो बितामन काजे तिआर करलो से।”

¹⁰ मान्तर माहापुरू हुनमन के आपलो आत्मा चो दुवारा आमचो उपरे परकट करलो, कसनबल्लोने आत्मा सपाय गोठमन, मान्तर माहापुरू चो गुन गोठमन बले जाचु आय।

¹¹ मानेमन थानले कोन कोनी माने चो गोठमन जानु आय, मात्र माने चो आत्मा जोन हुन थाने आसे? असने ची माहापुरू चो गोठमन बले कोनी नी जानोत, मात्र माहापुरू चो आत्मा।

¹² मान्तर आमीमन ने संवसार चो आत्मा नाई, मान्तर हुन आत्मा पावलु से जोन माहापुरू चो बाटले आय कि आमी हुन गोठमन के जानु जोन माहापुरू आमके दिलो से।

¹³ जेके आमी मानेमन चो गिआन चो सिका लो बिती गोठमन ने नाई, मान्तर आत्मा चो सिका लो बिती गोठमन ने, आत्मिक गोठमन आत्मिक गोठमन ले मिसान-मिसान भाती सुनाऊ आत।

¹⁴ मान्तर शारीरिक माने माहापुरू चो आत्मा चो गोठमन गरहन नी करे, कसनबल्लोने हुनमन हुनचो नजर ने मुरूकता चो गोठमन आय, आउर ना हुन हुनमन के जानुक सके कसनबल्लोने हुनमन चो जाच आत्मिक रीति ले होऊ आय।

¹⁵ आत्मिक जन सपाय काई जाचु आय, मान्तर हुन खुद काचीई ले जचाए नी जाये।

¹⁶ “कसनबल्लोने परबु चो मन कोन जानला से कि हुनके सिका ओ?” मान्तर आमीमन ने मसीह चो मन आसे।