1 कुरिन्थियो 16 - Halbi

यरूशलेम चो कलीसिया चो काजे दान

¹ अदायं हुन चांदा चो बारे ने जोन पवितर लोगमन काजे करा जाऊ आय जसन हुकुम मय गलातिया चो कलीसियामन के दिले, असने ची तुमी बले करा।

² सपता चो पयला दिने तुमनमन थानले हरकोनी आपलो कमाई चो अनुसार खिन्डिक आपलो लगे संगाऊन छांडा कि मोचो ईलो ने चांदा नी करूक पड़ो।

³ आउर जिदलदाय मय ऐयें दें, तेबे जोन के तुमी चाहा से हुनमन के मय चिठ्ठीमन देऊन भाती पटाऊन देयें दें कि तुमचो दान यरूशलेम अमराऊन दे ओत।

⁴ अगर मोचो बले जातोर ठीक होली, तेबे हुनमन मोचो संगे जादे।

यातरा चो काम-काज

⁵ मय मकिदुनिया होऊन भाती तुमचो लगे ऐयें दें, कसनबल्लोने मोके मकिदुनिया होऊन भाती जातोर ची आय।

⁶ मान्तर होऊक सके कि तुमचो थाने ची ठेबुन जायें दें आउर सीतकार भर तुमचो थाने रयें दे, तेबे जोन बाटे मोचो जातोर होओ हुन बाटे तुमी मोके अमराऊन दिआस।

⁷ कसनबल्लोने मय अदायं बाट ने तुमचो ले भेट करूक नी चाहायें मान्तर मोके आशा आसे कि अगर परबु चाह ले तेबे खिन्डिक समया तक तुमचो संगे रयें दें।

⁸ मान्तर मय पिन्तेकुस्त तक इफिसुस ने रयें दें।

⁹ कसनबल्लोने मोचो काजे हुता गोटक बड़े आउर उपयोगी बाट खुला आसे, आउर बिरूदी खुबे असन आसोत।

¹⁰ अगर तीमुथियुस ऐऊन जाओ, तेबे दका कि हुन तुमचो थाने निडर रओ; कसनबल्लोने हुन मोचो असन परबु चो कामकरू आय।

¹¹ ऐईकाजे कोनी हुनके तुच्छ नी जानोत, मान्तर हुनके हरिक ले ऐ बाटे अमराऊन दिआस कि मोचो लगे ऐऊन जाओ; कसनबल्लोने मय हुनचो बाट टाके से कि हुन भाईमन चो संगे ऐओ।

¹² भाई अपुल्लोस ले मय खुबे बिनती करले से कि तुमचो लगे भाईमन चो संगे जाओ; मान्तर हुन ऐ समया जातोर काई बले इच्छा नी करलो, मान्तर जिदलदाय मवका पाऐ दे तेबे ऐऊन जाये दे।

आखरी हुकुम

¹³ चेता राआ, बिश्वास ने थीर राआ, साहास करा, बलवान हुआ।

¹⁴ जोन काई करू आस मया ले करा।

¹⁵ हे भाईमन, तुमी स्तिफनास चो घरलोगमन के जानास कि हुनमन अखाया चो पयला फल आत, आउर पवितर लोगमन चो सेवा चो काजे तिआर रऊ आत।

¹⁶ ऐईकाजे मय तुमचो ले बिनती करें से कि असनमन चो अधीन राआ, मान्तर हरकोनी जोन ऐ काम ने मसागत आउर सायता करू आत।

¹⁷ मय स्तिफनास आउर फूरतूनातुस आउर अखइकुस चो ईलो ले हरिक आंसे, कसनबल्लोने हुनमन तुमचो कमी के पुरा करला से।

¹⁸ हुनमन मोचो आउर तुमचो आत्मा के आराम दिला सोत, ऐईकाजे असनमन के माना।

नतीजा

¹⁹ आसिया चो कलीसियामन चो बाटले तुमके जुहार; अकविला आउर प्रिसकिला चो आउर हुनमन चो घर चो कलीसिया चो बले तुमके परबु ने खुबे-खुबे जुहार!

²⁰ सपाय भाईमन चो तुमके जुहार। पवितर चुमा ले आपस ने जुहार करा।

²¹ मय पौलुस चो आपलो हाथ ले लिकलोर जुहार।

²² अगर कोनी परबु ले मया नी संगा ओ तेबे हुन शरापित होओ। हे आमचो परबु, आव!

²³ परबु ईशु चो अनुग्रह तुमचो उपरे होते रओ।

²⁴ मोचो मया मसीह ईशु ने तुमी सपाय चो संगे रओ। आमीन।