1 कुरिन्थियो 15 - Halbi

पौलुस चो नगतखबर आउर मसीह चो जीव उठतोर

¹ हे भाईमन, अदायं मय तुमके हुनी नगतखबर सांगे से जोन पयले सुनान चुकले से, जोन के तुमी अंगीकार बले करू राआस आउर जोन थाने तुमी थीर बले आसास।

² हुनचेई बाटले तुमचो मुक्ति बले होऊ आय, अगर हुन नगतखबर के जोन मय तुमके सुनाऊ रलें सुरता संगाऊ आस; नाहले तुमचो बिश्वास करतोर फकाहा होली।

³ ऐई लागुन मय सपाय ले पयले तुमके हुनी गोठ अमराऊन दिले, जोन मोके अमरू रली कि पवितर शास्त्र चो बचन चो अनुसार ईशु मसीह आमचो पापमन काजे मरून गेलो,

⁴ आउर तोपाय गेलो, आउर पवितर शास्त्र चो अनुसार तीसर दिन जीव बले उठलो,

⁵ आउर कयफा के तेबे बारो के दका दिलो।

⁶ फेर हुन पांच सव ले जादा भाईमन के गोटक संगे दका दिलो, जोन थानले खुबे असन ऐबे ले जीव आसोत मान्तर कितलो मरून गेला।

⁷ फेर हुन याकूब के दका दिलो तेबे सपाय पठालोबितामन के दका दिलो।

⁸ सपाय चो पाचे मोके बले दका दिलो, जोन माना आदरा दिनमन चो जनम ले सें।

⁹ कसनबल्लोने मय पठालोबितामन ने सपाय ले नानी आंय, मान्तर पठालोबिता बलाय जातोर लायक बले नुआय, कसनबल्लोने मय माहापुरू चो कलीसिया के कन्दराऊन रलें।

¹⁰ मान्तर मय जोन काई बले आय, माहापुरू चो अनुग्रह ले आय। हुनचो अनुग्रह जोन मोचो उपरे होली, हुन फकाहा नी होली; मान्तर मय हुन सपाय ले बडुन भाती मसागत बले करले तेबले बले ऐ मोचो बाटले नी होली मान्तर माहापुरू चो अनुग्रह ले जोन मोचो उपरे रली।

¹¹ ऐईकाजे भले मय आय; भले हुनमन होओत, आमी ऐई परचार करूं से आउर ऐई थाने तुमी बिश्वास बले करलास।

मरलो बितामन चो जीव उठतोर

¹² ऐईकाजे जिदलदाय कि मसीह चो ऐ परचार करा जाऊ आय कि हुन मरलो बितामन थानले जीव उठलो, तेबे तुमनमन थानले कितलो कसन बोलु आत कि मरलो बितामन चो जीव उठतोर आसे ची नाई?

¹³ अगर मरलो बितामन चो जीव उठतोर आसे ची नाई, तेबे मसीह बले नी जीव उठलो;

¹⁴ आउर अगर मसीह नी जीव उठलो, तेबे आमचो परचार करतोर बले फकाहा आय, आउर तुमचो बिश्वास बले फकाहा आय।

¹⁵ मान्तर आमी माहापुरू चो झूठा गोहई ठेबलु; कसनबल्लोने आमी माहापुरू चो बारे ने ऐ गोहई दिलु कि हुन मसीह के जोन जियाऊन दिलो, अगर नी जिआ लो अगर मरलो बिता नी जीव उठता।

¹⁶ आउर अगर मुरदा नी जीव उठता, तेबे मसीह बले नी जीव उठलो;

¹⁷ आउर अगर मसीह नी जीव उठलो, तेबे तुमचो बिश्वास फकाहा आय, आउर तुमी ऐबले आपलो पापमन ने फसलासास।

¹⁸ मान्तर जोन मसीह ने मरून गेला सोत, हुनमन बले नष्ट होला।

¹⁹ अगर आमी मात्र ऐई जीवना ने मसीह ले आशा संगाऊ से तेबे आमी सपाय मानेमन ले जादा अभागा आंव।

²⁰ मान्तर सत-सत मसीह मुरदामन थानले जीव उठलो से, आउर जोन सोऊन गेला सोत हुनमन थाने हुन पयला फल होलो।

²¹ कसनबल्लोने जिदलदाय माने चो बाटले मरना ईली, तेबे माने चेई बाटले मरलो बितामन चो जीव उठातोर बले ईली।

²² आउर जसन आदम ने सपाय मरू आत, असने ची मसीह ने सपाय जिआया जादे,

²³ मान्तर हरकोनी आपलो-आपलो बनवाड़ी ले; पयला फल मसीह फेर मसीह चो ईलो ने हुनचो लोग।

²⁴ ऐचो पाचे आखरी होये दे। हुन समया हुन पूईतराय बड़पन, आउर सपाय अधिकार, आउर सामरत चो आखरी करून राज के माहापुरू बुआ चो हाथ ने सोपुन देये दे।

²⁵ कसनबल्लोने जिदलदाय ले हुन आपलो बयरीमन के आपलो पाँयमन चो खाले नी धरून ऐये, हुदलदाय ले हुनचो राज करतोर जरूरी आय।

²⁶ सपाय ले आखरी बयरी जोन नष्ट करा जाये दे, हुन मरना आय।

²⁷ कसनबल्लोने “माहापुरू सपाय काई हुनचो पाँयमन खाले करून दिलो से,” मान्तर जिदलदाय हुन बोलु आय कि सपाय काई हुनचो अधीन करा गेली से तेबे छुकछुका आय कि जोन सपाय काई हुनचो अधीन करून दिलो, हुन खुद अलग रलो।

²⁸ आउर जिदलदाय सपाय काई हुनचो अधीन होऊन जाये दे, तेबे बेटा खुद बले हुनचो अधीन होऊन जाये दे, जोन सपाय काई हुनचो अधीन करून दिलो, बल्ले सपाय ने माहापुरू ची सपाय काई होओ।

²⁹ नी होले जोन लोग मरलो बितामन काजे डूबन धरू आत हुनमन काय कर दे? अगर मुरदा जीव उठता ची नाई तेबे फेर केंव हुनमन चो काजे डूबन धरता?

³⁰ आउर आमी बले केंव हर घड़ी खतरा ने पडु रऊँ आंव?

³¹ हे भाईमन, मोके हुन घमण्ड चो किरिया जोन आमचो मसीह ईशु ने मय तुमचो बारे ने करूं आंय कि मय रोजे दिना मरू आय।

³² अगर मय माने चो रीति थाने इफिसुस ने रान पशुमन ले लड़ले तो मोके काय फायदा होली? अगर मुरदा जिआया नी जादे, “तो ईआ, खाऊ-पीऊं, कसनबल्लोने काली के तो मरून ची जांवा।”

³³ धोका नी खाआ, “खराप संगत अच्छा आचरन के नशान देऊ आय।”

³⁴ धरम चो काजे जागरत हुआ आउर पाप नी करा; कसनबल्लोने कितलो असन आत जोन माहापुरू के नी जानोत। मय तुमके लाज करातो काजे ऐ बलें सें।

आमके कसन देंह मिरे दे?

³⁵ अदायं कोनी ऐ बोल दे, “मुरदा कोन रीति ले जीव उठु आत, आउर कसन देंह चो संगे ऐऊ आत?”

³⁶ हे अकल नाहलो! जोन काई तुय बुनु आस, जिदलदाय ले हुन नी मरे जिआया नी जाये।

³⁷ आउर जोन तुय बुन आस, ऐ हुन देंह नुआय जोन पयदा होतो बिती आय, मान्तर निरादान आय, भले गऊँ चो भले कोनी आउर अनाज चो।

³⁸ मान्तर माहापुरू आपलो इच्छा चो अनुसार हुनके देंह देऊ आय, आउर हरकोनी बीज के हुनचो खास देंह।

³⁹ सपाय देंह गोटक समान नुआय, मानेमन चो देंह आउर आय, पशुमन चो देंह आउर आय; चड़ीईमन चो देंह आउर आय; मछरीमन चो देंह आउर आय।

⁴⁰ सरगर देंह आसे आउर मरलो देंह बले आसे। मान्तर सरग देंहमन चो चमक आउर आय, आउर मरलोर आउर।

⁴¹ बेर चो चमक आउर आय, जोन चो तेज आउर आय, आउर तारामन चो तेज आउर आय, (कसनबल्लोने गोटक तारामन ले दुसर तारामन चो चमक ने अन्तर आसे)।

⁴² मुरदामन चो जीव उठतोर बले असने ची आय। देंह नाशवान दसा ने बुना जाऊ आय आउर अमर रूप ने जीव उठु आय।

⁴³ हुन अनादर चो संगे बुना जाऊ आय, आउर तेज चो संगे जीव उठु आय; कमजोर चो संगे बुना जाऊ आय, सामरत चो संगे जीव उठु आय।

⁴⁴ सादा देंह बुना जाऊ आय, आउर आत्मिक देंह जीव उठु आय: जसन कि सादा देंह आसे तो आत्मिक देंह बले आसे।

⁴⁵ असने ची लिकलोर बले आसे, कि “पईल माने, बल्लोने आदम जिन्दा प्राणी बनलो” आउर आखरी आदम जीवना देतो बिती आत्मा बनली।

⁴⁶ मान्तर पयले आत्मिक नी रली मान्तर सादा रली, ऐचो पाचे आत्मिक होली।

⁴⁷ पईल माने धरतनी ले बल्लोने माटी चो रलो; दुसर माने सरग चो आय।

⁴⁸ जसन हुन माटी चो रलो, असने ची हुनमन बले आत जोन माटी चो आत; आउर जसन हुन सरग चो आय, असने ची हुनमन बले आत जोन सरग चो आत।

⁴⁹ आउर जसन आमी हुनचो रूप धारन करलु जोन माटी चो रलो असने ची हुन सरग चो रूप बले धारन करूं दे।

⁵⁰ हे भाईमन, मय ऐ बलें सें कि मास आउर लऊ माहापुरू चो राज चो अधिकारी नी होऊक सकोत, आउर नाशवान अमरता चो अधिकारी होऊक सके।

⁵¹ दका, मय तुमके भेद चो गोठ बलें सें आमी सपाय नी मरवां, मान्तर सपाय बदलुन जांवा,

⁵² आउर ऐ क्षण भर ने, टिपरी मारते ची आखरी तुरी फुकते ची होये दे। कसनबल्लोने तुरी फुका जाय दे आउर मुरदा अमर दसा ने उठाया जादे, आउर आमी बदलुन जांवा।

⁵³ कसनबल्लोने जरूरी आय कि ये नाशवान देंह अमरता के पींदे दे, आउर ऐ मरनहार देंह अमरता के पींदे दे।

⁵⁴ आउर जिदलदाय ये नाशवान अविनाशी के पींदे दे, आउर ये मरनहार अमरता के पींदे दे, तेबे हुन बचन जो लिकलोर आसे पुरा होऊन जाय दे, “जय मरना के गिरुन दिलो।

⁵⁵ हे मरना, तुचो जय काहां रली? हे मरना, तुचो फेनी काहां रली?”

⁵⁶ मरना चो डंक पाप आय, आउर पाप चो बल नियम आय।

⁵⁷ मान्तर माहापुरू चो धन्यबाद होओ, जोन आमचो परबु ईशु मसीह चो बाटले आमके जयवन्त करू आय।

⁵⁸ ऐईकाजे हे मोचो लाड़रा भाईमन, जमखम आउर अटल राआ, आउर परबु चो काम ने हरमेशा बड़ते जाहा, कसनबल्लोने ऐ जानास कि तुमचो मसागत परबु ने फकाहा नुआय।