1 कुरिन्थियो 14 - Halbi

दुसर-दुसर भाषामन आउर अगम गोठ

¹ मया चो अनुकरन करा, आउर आत्मिक बरमन चो बले धुन ने राहा, खास करून ऐ कि अगम गोठ करा।

² कसनबल्लोने जोन दुसर भाषा ने गोठयाऊ आय हुन मानेमन ले नाई मान्तर माहापुरू ले गोठयाऊ आय; ऐईकाजे कि हुनचो गोठमन कोनी नी समजोत, कसनबल्लोने हुन भेद चो गोठमन आत्मा ने होऊन भाती बोलु आय।

³ मान्तर जोन अगम गोठ करू आय, हुन मानेमन ले उन्नती आउर उपदेश आउर शान्ति चो गोठमन बोलु आय।

⁴ जोन दुसर भाषा ने गोठयाऊ आय, हुन आपली ची उन्नती करू आय; मान्तर जो अगम गोठ करू आय, हुन कलीसिया चो उन्नती करू आय।

⁵ मय चाहायें से कि तुमी सपाय दुसर भाषामन ने गोठयाआ मान्तर ऐचो ले आगर ऐ चाहायें से कि अगम गोठ करा: कसनबल्लोने अगर दुसर भाषामन बोलतो बिता कलीसिया चो उन्नती काजे अनुवाद नी करे तो अगम गोठ करतो बिता हुनचो ले बडुन भाती आय।

दुसर भाषा चो भेद जानतोर जरूरी आय

⁶ ऐईकाजे हे भाईमन, अगर मय तुमचो लगे ऐऊन भाती दुसर भाषामन ने गोठयायें दे, आउर उजर नाहले गिआन नाहले अगम गोठ नाहले उद्देश्य चो गोठमन तुमनमन ले नी बोलें, तेबे मोचो ले तुमके काय फायदा होयेदे?

⁷ ऐई परकार अगर निरजीव तीजमन बले जोनमन ले शब्द निकरू आय, जसन बांवसी नाहले बीन, अगर हुनमन चो शब्द ने भेद नी होओ तो जोन फुका नाहले बजाया जाऊ आय, हुन कसन चिताया जायेदे?

⁸ आउर अगर तुरी चो शब्द अच्छा नी होओ, तेबे कोन लड़ीई चो काजे तिआर करेदे?

⁹ असने ची तुमी बले अगर जीब ले छुक-छुका गोठमन नी बोला, तेबे जोन काई बोला जाऊ आय हुन कसन समजा जाये दे? तुमी तो लेहरा ले गोठयातो बिता ठेबा से।

¹⁰ जगत ने कितलो ची परकार चो भाषामन केंव नी होओ, मान्तर हुनमन थानले कोनी बले बिना अरत चो नी होयदे।

¹¹ ऐईकाजे अगर मय कोनी भाषा चो अरत नी समजें, तेबे बोलतो बिता चो नजर ने परदेशीया ठेबें दे आउर बोलतो बिता मोचो नजर ने परदेशी ठेबे दे।

¹² ऐईकाजे तुमी बले जिदलदाय आत्मिक बरमन चो बाय ने आसास, तेबे असन कोशिश करा कि तुमचो बरदानमन चो उन्नती ले कलीसिया चो उन्नती होओ।

¹³ ऐई लागुन जोन दुसर भाषा बोलो, हुन पारथना करो कि हुनचो उचारन बले करूक सको।

¹⁴ ऐईकाजे अगर मय दुसर भाषा ने पारथना करें दें, तो मोचो आत्मा पारथना करू आय मान्तर मोचो अकल काम नी देये।

¹⁵ आउर काय करतोर आसे? मय आत्मा ले बले पारथना करें दें, आउर अकल ले बले पारथना करें दें; मय आत्मा ले गायें दें, आउर अकल ले बले गायें दें।

¹⁶ नाहले अगर तुय आत्मा ची ले धन्यबाद कर से, तेबे फेर अगिआनी तुचो धन्यबाद थाने आमीन कसन बले दे? कसनबल्लोने हुन तो नी जाने कि तुय काय बोल सीस?

¹⁷ तुय तो नुकु करून धन्यबाद करू आस, मान्तर दुसर जो उन्नती नी होयें।

¹⁸ मय आपलो माहापुरू चो धन्यबाद करू आंय, कि मय तुमी सपाय ले आगर दुसर भाषामन ने बोलु आंय।

¹⁹ मान्तर कलीसिया ने दुसर भाषा ने दस हजार गोठमन बल्लो ले बल्ले ऐ मोके आउर बले अच्छा जान पढ़ली से, कि दुसरमन के सिकातो काजे अकल ले पांच ची गोठ बलें।

दुसर भाषा अबिश्वासीमन चो काजे चिना

²⁰ हे भाईमन, तुमी समज ने लेखा नी बना: खराबी ने तो लेका राहा, मान्तर समज ने सियान बना।

²¹ नियम ने लिका आसे कि परबु बले से, “मय अनजान भाषा बोलतो बितामन चो बाटले, आउर पराया टोंड चो बाटले ऐ लोगमन ले गोठया यें दे तेबले बले हुनमन मोचो नी सुन दे।”

²² ऐईकाजे दुसर भाषामन बिश्वासीमन चो काजे नुआय, मान्तर अबिश्वासिमन चो काजे चिना आय; आउर अगम गोठ बिश्वासिमन काजे नाई, मान्तर अबिश्वासिमन चो काजे चिना आय।

²³ आउर अगर कलीसिया गोटक जगा रूंड़ा होओ, आउर सपाय चो सपाय दुसर भाषामन बलोत, आउर बाहार बितामन नाहले अबिश्वासी लोग भीतरे ऐ ओत तेबे काय हुनमन तुमके बया नी बोल दे?

²⁴ मान्तर अगर सपाय अगम गोठ करूक मुरयादे, आउर कोनी अबिश्वासी नाहले बाहार बितामन भितरे ऐ ओत, तेबे सपाय हुनके दोषी ठेबाऊन देदे आउर परक दे;

²⁵ आउर हुनचो मन चो भेद उजागर होऊन जाये दे, आउर तेबे हुन पाटा पडुन घसरुन भाती माहापुरू के पाँय पड़े दे, आउर माने दे कि सत-सत माहापुरू तुमचो मंजी ने आसे।

उपास ने नियम

²⁶ ऐईकाजे हे भाईमन, काय करतोर आसे? जिदलदाय तुमी रूंड़ा होऊ आस, तेबे हरकोनी चो मन ने भजन नाहले उपदेश नाहले दुसर भाषा नाहले उजर नाहले दुसर भाषा चो अरत सांगतोर रऊ आय। सपाय काई आत्मिक उन्नती चो काजे होतोर आसे।

²⁷ अगर दुसर भाषा ने गोठमन करतोर होओ तो दुय नाहले खुबे होओत तो तीन झान पारी-पारी ले बलोत, आउर गोटक माने उचारन करो।

²⁸ मान्तर अगर उचारन करतो बिता नी होओ, तेबे दुसर भाषा बोलतो बिता कलीसिया ने ओगाय रओ, आउर आपलो मन ले आउर माहापुरू ले गोठ बात करो।

²⁹ अगम गिआनीमन थानले दुय नाहले तीन बलोत, आउर बाकी लोग हुनमन चो बचन के परकोत।

³⁰ मान्तर अगर दुसर उपरे जोन बोसलो से, काई ईश्पर उजर होओ तो पयला ओगाय होऊन जाओं।

³¹ कसनबल्लोने तुमी सपाय गोटक-गोटक करून अगम गोठ करूक सकास, बल्ले सपाय सिकोत आउर सपाय शान्ति पाओत।

³² आउर अगम गिआनीमन चो आत्मा अगम गिआनीमन चो बस ने आसे।

³³ कसनबल्लोने माहापुरू गड़बड़ी चो नुआय, मान्तर शान्ति चो माहापुरू आय। जसन पवितर लोगमन चो सपाय कलीसियामन ने आसे।

³⁴ बायले लेकी कलीसिया चो सभा ने ओगाय रवत, कसनबल्लोने हुनमन के गोठयातोर हुकुम निआय, मान्तर अधीन रतोर हुकुम आसे, जसन नियम ने लिकलोर बले आसे।

³⁵ अगर हुनमन काई सिकुक चाह ले, तो घर ने आपलो-आपलो मनुक के पचारोत, कसनबल्लोने बायले लेकी चो कलीसिया ने गोठमन करतोर लाज चो गोठ आय।

³⁶ काय माहापुरू चो बचन तुमचो थानले निकरली से? नाहले मात्र तुमी ची लगले पोचली से?

³⁷ अगर कोनी माने आपन खुद के अगम गिआनी नाहले आत्मिक जन समजो, तेबे ऐ जानुन रओ कि जोन गोठमन मय तुमके लिके से, हुन परबु चो हुकुममन आय।

³⁸ मान्तर अगर कोनी ऐ नी मानो, तेबे हुनके बले नी माना।

³⁹ आउर हे भाईमन, अगम गोठ करतोर धुन ने राहा आउर दुसर भाषा बोलतो ले माना नी करा;

⁴⁰ मान्तर पूईतराय गोठमन शालीनता आउर नियमरूप ले करा जाओ।