1 कुरिन्थियो 12 - Halbi

पवितर आत्मा चो बर

¹ हे भाईमन, मय नी चाहायें कि तुमी आत्मिक बरमन चो बारे ने अनजान राहा।

² तुमी जानास कि जिदलदाय तुमी दुसर जाति राआस, तेबे कोंदी मुरतीमन चो पाटे जसन चलाया जाते राआस असने ची चलते राआस।

³ ऐईकाजे मय तुमके जनाऊन देये से कि जोन कोनी माहापुरू चो आत्मा चो अगुवाई ले बोलु आय, हुन नी बले कि ईशु शरापित आय; आउर ना कोनी पवितर आत्मा चो बिना बोलुक सके कि ईशु परबु आय।

⁴ बर तो कईं परकार चो आसे, मान्तर आत्मा गोटक ची आय;

⁵ आउर सेवा बले कईं परकार चो आय, मान्तर परबु गोटक ची आय;

⁶ आउर असरदार काम कईं परकार चो आय, मान्तर माहापुरू गोटक ची आय, जोन सपाय ने हर परकार चो असर पयदा करू आय।

⁷ मान्तर सपाय चो फायदा पहुँचातो काजे हरकोनी के आत्मा चो उजर दिया जाऊ आय।

⁸ कसनबल्लोने गोटक के आत्मा चो दुवारा अकल चो गोठमन दिया जाऊ आय, आउर दुसर के हुनी आत्मा चो अनुसार गिआन चो गोठमन।

⁹ कोनी के हुनी आत्मा ले बिश्वास, आउर कोनी के हुनी गोटक आत्मा ले चेंगा करतोर बर दिया जाऊ आय।

¹⁰ फेर कोनी के सामरत चो काम करतोर शक्ति, आउर कोनी के अगम गोठ चो, आउर कोनी के आत्मामन चो परक, आउर कोनी के अनेक परकार चो भाषा, आउर कोनी के भाषामन चो अरत सांगतोर।

¹¹ मान्तर ऐ सपाय असरदार काम हुनी गोटक आत्मा करू आय, आउर जोन के जोन चाहाऊं आय हुन बाटुन देऊ आय।

देंह गोटक धड़ खुबे

¹² कसनबल्लोने जोन परकार देंह तो गोटक आय आउर हुनचो धड़ खुबे असन आसे, आउर हुन गोटक देंह चो सपाय धड़ खुबे होलो ने बले सपाय मिसुन भाती गोटक ची देंह आत, हुनी परकार मसीह बले आय।

¹³ कसनबल्लोने आमी सपाय काय यहूदी होओत काय यूनानी, काय दास होओ काय छुटछाड़ा, गोटक ची आत्मा चो बाटले गोटक देंह होतो काजे डूबन धरलु, आउर आमी सपाय के गोटक ची आत्मा पिआया गेली।

¹⁴ ऐईकाजे कि देंह ने गोटक ची धड़ नाई मान्तर खुबे असन आसे।

¹⁵ अगर पाँय बोलो, “मय हाथ नुआय, ऐईकाजे देंह चो नुआय,” तेबे काय हुन ऐ लागुन देंह चो नुआय?

¹⁶ आउर अगर कान बोलो, “मय आँईक नुआय, ऐईकाजे देंह चो नुआय,” तेबे काय हुन ऐ लागुन देंह चो नुआय?

¹⁷ अगर पूईतराय देंह आँईक ची होती तो सुनतोर काहां होती? अगर पूईतराय देंह कान ची होती तेबे सुंगतोर काहां होती?

¹⁸ मान्तर सतसत माहापुरू धड़मन के आपलो इच्छा चो अनुसार गोटक-गोटक करून देंह ने संगालो से।

¹⁹ अगर हुनमन सपाय गोटक ची धड़ होता, तेबे देंह काहां ले होती?

²⁰ मान्तर अदायं धड़ तो खुबे असन आसोत, मान्तर देंह गोटक ची आय।

²¹ आँईक हाथ ले नी बोलुक सके, “मोके तुचो जरूरत निआय,” आउर ना मुण्ड पाँयमन ले बोलुक सके, “मोके तुमचो जरूरत निआय।”

²² मान्तर देंह चो हुन धड़ जोन दुसरमन ले कमजोर लागु आत, खुबे ची जरूरत आसे;

²³ आउर देंह चो जोन धड़मन के आमी मान चो लायक नी समजु हुनीमन के आमी जादा मान देऊ आंव; आउर आमचो शोभा हीन धड़ आउर बले खुबे शोभायमान होऊन जाऊ आय,

²⁴ फेर बले आमचो सोभाबिती धड़मन के ऐचो जरूरत निआय। मान्तर माहापुरू देंह के असन बनाऊन दिलो से कि जोन धड़ के मान चो कमी रली हुनी के आउर बले खुबे मान मिरो।

²⁵ बल्ले देंह ने फूट नी पड़ो, मान्तर धड़ गोटक दुसर चो बराबर चिन्ता करोत।

²⁶ ऐईकाजे अगर गोटक धड़ दुक पाऊ आय तेबे सपाय धड़ हुनचो संगे दुक पाऊ आत; आउर अगर गोटक धड़ चो बड़ाई होऊ आय, तेबे हुनचो संगे सपाय धड़ हरिक बनाऊ आत।

²⁷ ऐई परकार तुमी सपाय मिसुन भाती मसीह चो देंह आस, आउर अलग-अलग हुनचो धड़ आस;

²⁸ आउर माहापुरू कलीसिया ने अलग-अलग माने तिआर करलो से; पयला पठालोबिता, दुसर अगम गिआनी, तीसर गुरजी, फेर सामरत चो काम करतो बितामन, फेर चेंगा करतो बितामन, आउर उपकार करतो बितामन, आउर जुगाड़ करतो बितामन, आउर नाना परकार चो भाषा बोलतो बितामन।

²⁹ काय सपाय पठालोबिता आत? काय सपाय अगम गिआनी आत? काय सपाय उपदेशक आत? काय सपाय सामरत चो काम करतो बितामन आत?

³⁰ काय सपाय के चेंगा करतोर बर मिरली से? काय सपाय नाना परकार चो भाषा बोलु आत?

³¹ काय सपाय अनुवाद करू आत? तुमी बड़े ले बड़े बरमन चो धनु ने राआ। मान्तर मय तुमके आउर बले सपाय ले अच्छा बाट सांगेंसें।